Views: 9
ដោយៈ ប.ជ័យ / បន្ទាយមានជ័យ: នគរបាលស្រុកភ្នំស្រុក សហការជាមួយមន្ត្រីជំនាញ នៃមន្ទីរសាធារណការ និងដឹកជញ្ជូន ខេត្តបន្ទាយមានជ័យ រួមជាមួយអាជ្ញាធរដែនដីស្រុក ឃុំ ភូមិ បានចុះកាយប្រឡាយរំដោះទឹកជំនន់ នៅចំណុចខាងលិចសាលាបឋមសិក្សាជ័យឧត្តម និងជួយសម្រួលចរាចរណ៍ ជូនប្រជាពលរដ្ឋ តាមបណ្តោយផ្លូវកៅស៊ូ (268A ភ្នំស្រុក ព្រៃមាន់) ដែលកំពុងរងការលិចលង់ ដោយសារទឹកជំនន់។
ពាក់ព័ន្ធនឹងករណីនេះ លោកឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ នៅថ្ងៃទី២២ ខែកញ្ញា ឆ្នាំ២០២២ បានបញ្ជូនកម្លាំងនគរបាល ជាច្រើននាក់ សហការជាមួយកម្លាំងអធិការដ្ឋាននគរបាលស្រុក និងប៉ុស្ត៍រដ្ឋបាលភ្នំដី ទៅចូលរួម ច្រកដីដាក់ការ៉ុង បិទទំនប់ទឹកផ្លូវចូល ភូមិស្ពានក្មេង ឃុំភ្នំដី ស្រុកភ្នំស្រុក។
ទន្ទឹមគ្នានោះដែរ កម្លាំងនគរបាលមួយចំនួន បន្តយាមល្បាត និងទ្រោលសភាពការណ៍ ការពារសន្តិសុខ សណ្តាប់ធ្នាប់ សុវត្ថិភាពជូនប្រជាជន និងត្រៀមកម្លាំង សម្ភារ មធ្យោបាយ រួចជាស្រេច ត្រៀមចាំអន្តរាគមន៍ ក្នុងករណីមានហេតុការអាសន្នកើតឡើងជាយថាហេតុ៕ V / N