Views: 1
ប្រែសម្រួល : កញ្ញាដាលីស (ដេល្លីម៉េល) ៖ ខណៈអ្នកគាំទ្រវើលខាប់ដ៏ច្រើនសន្ធឹកសន្ធាប់កំពុងចូលមើលពេញៗក្នុងកីឡដ្ឋាននៅទូទាំងប្រទេសកាតា ទាហានអាម៉េរិកប្រហែល ៨.០០០ នាក់ ដែលឈរជើងនៅក្បែរនោះ បានត្រួតពិនិត្យដែនអាកាសតំបន់មជ្ឈិមបូព៌ាដ៏ចលាចលពីមូលដ្ឋានដ៏សំខាន់ ដែលគ្រប់គ្រងដោយប្រទេសសម្បូរថាមពលមួយនេះ។
សាងសង់នៅលើវាលខ្សាច់រាបស្មើស្ថិតនៅចម្ងាយប្រហែល៣០គីឡូម៉ែត្រពីភាគនិរតីនៃរដ្ឋធានីដូហា ប្រទេសកាតា មូលដ្ឋានទ័ពអាកាសអាល់យូដេអ៊ីត (Al-Udeid)ធ្លាប់ត្រូវបានចាត់ទុកជាមូលដ្ឋានដ៏រសើបខ្លាំងមួយ ដែលមន្ត្រីយោធាអាម៉េរិកបានកំណត់ថាវាគ្រាន់តែជាកន្លែងមួយ “នៅអាស៊ីភាគនិរតី” ប៉ុណ្ណោះ។
សព្វថ្ងៃនេះ មជ្ឈមណ្ឌលដ៏ធំទូលាយនេះគឺជាត្បូងយុទ្ធសាស្ត្ររបស់កាតា ដែលបង្ហាញពីភាពជាដៃគូសន្តិសុខដ៏តឹងរ៉ឹងរបស់រដ្ឋឈូងសមុទ្រអារ៉ាប់មួយនេះជាមួយសហរដ្ឋអាម៉េរិកដែលឥឡូវនេះបានចាត់ទុករដ្ឋាភិបាលក្រុងដូហាជាសម្ពន្ធមិត្តមិនមែនណាតូដ៏សំខាន់។
នៅចំណុចខ្ពស់បំផុតនៃសង្គ្រាមរបស់សហរដ្ឋអាម៉េរិកនៅអាហ្វហ្គានីស្ថាន អ៊ីរ៉ាក់ និងស៊ីរី ទាហានជាង ១០.០០០ នាក់បានហៅមូលដ្ឋានទ័ពនិងទីតាំងផ្សេងទៀតនៅក្នុងប្រទេសកាតាជាផ្ទះរបស់ពួកគេ។ ចំនួនទាហានបានថយចុះមួយភាគប្រាំចាប់តាំងពីរដ្ឋបាលលោកបៃដិនបានចាប់ផ្តើមដកកងកម្លាំងមួយចំនួនពីមជ្ឈិមបូព៌ាក្នុងការរៀបចំសម្រាប់អ្វីដែលគេហៅថាការប្រកួតប្រជែងរវាងមហាអំណាច ដែលកំពុងកើតមានជាមួយចិននិងរុស្ស៊ី។
ប៉ុន្តែកាតានៅតែបន្តចាក់លុយចូលទៅក្នុងមូលដ្ឋាននេះ គឺជាង ៨ ពាន់លានដុល្លារចាប់តាំងពីឆ្នាំ ២០០៣។ ក្នុងដំណើរទស្សនកិច្ចមួយកាលពីថ្ងៃសុក្រទី២ធ្នូ អ្នកកាសែតរបស់ទីភ្នាក់ងារសារព័ត៌មាន Associated Press បានឃើញបន្ទាយនិងសាលបរិភោគអាហារថ្មីៗ ខណៈទាហានជើងអាកាសពិភាក្សាគ្នាអំពីការកែលម្អផ្សេងទៀតនៅមូលដ្ឋាន។ ហើយក្រុមកងទ័ពអាកាសបាននិយាយថា ការបង្កើតក្រុមការងារថ្មីផ្តោតលើដ្រូននិងបច្ចេកវិជ្ជាក្រៅសមរភូមិផ្សេងទៀតនៅមូលដ្ឋានអាល់យូដេអ៊ីតបានបង្ហាញថា រដ្ឋាភិបាលក្រុងវ៉ាស៊ីនតោននៅបន្តនៅទីនោះ បើទោះបីជាមានការបារម្ភអំពីការដកទ័ពចេញក៏ដោយ។
វរសេនីយ៍ទោ អេរីន ព្រីលឡា (Erin Brilla) នៃកងទ័ពអាកាសអាម៉េរិកបានប្រាប់ AP ថា “មានការប្តេជ្ញាចិត្តយ៉ាងខ្លាំងពីកងទ័ពអាកាសអាម៉េរិកចំពោះតំបន់នេះ។ យើងកំពុងស្នាក់នៅទីនេះក្នុងសមត្ថភាពដ៏មានស្ថិរភាព”៕
កងទ័ពអាម៉េរិក ៨.០០០ នាក់ឈរជើងការពារដែនអាកាសកាតាអំឡុងវើលខាប់