Views: 10
ប្រែសម្រួលៈបំណង(ដេល្លីម៉េល)៖ កងកម្លាំងអ៊ុយក្រែនបានទម្លុះខ្សែការពាររុស្ស៊ីនៅភាគខាងត្បូងប្រទេសនៅពេលបន្តរុលទៅមុខនៅភាគខាងកើត ដោយវាយចាប់យកទឹកដីបន្ថែមទៀតមកវិញ នៅក្នុងតំបន់ដែលរុស្ស៊ីទើបកាត់យកដាក់ជាផ្នែកនៃទឹកដីរបស់ខ្លួន ហើយគំរាមខ្សែផ្គត់ផ្គង់របស់ទាហានរុស្ស៊ី។
ដោយទម្លុះទម្លាយខ្សែការពារធំបំផុតនៅភាគខាងត្បូងចាប់តាំងពីសង្គ្រាមចាប់ផ្តើម កងកម្លាំងអ៊ុយក្រែនបានវាយចាប់យកមកវិញភូមិជាច្រើននៅតាមទន្លេដ្នីប្រូ(Dnipro)កាលពីថ្ងៃចន្ទ នេះបើតាមការបញ្ជាក់ពីមន្ត្រីអ៊ុយក្រែន។
បញ្ជាការភាគខាងត្បូងអ៊ុយក្រែនបាននិយាយថា កងកម្លាំងអ៊ុយក្រែននៅភាគខាងត្បូងបានបំផ្លាញរថក្រោះរុស្ស៊ី៣១គ្រឿងនិងយានបាញ់រ៉ុក្កែតមួយ ។
ជ័យជម្នះនៅភាគខាងត្បូងឆ្លុះបញ្ចាំងការវាយរុលទៅមុខកាលពីពេលថ្មីៗរបស់កងកម្លាំងអ៊ុយក្រែននៅភាគខាងកើត ទោះជាក្នុងពេលរុស្ស៊ីដាក់តំបន់ទាំងនោះជាឧបសម្ពន្ធរបស់ខ្លួន បញ្ជាកំណែនទ័ពថ្មីនិងគំរាមប្រើនុយក្លេអ៊ែរក្តី។អ៊ុយក្រែនបានធ្វើការរុលទៅមុខដ៏សំខាន់នៅតំបន់ពីរក្នុងចំណោមតំបន់បួន ដែលរដ្ឋាភិបាលទីក្រុងមូស្គូរៀបចំធ្វើប្រជាមតិនិងដាក់បញ្ចូលពួកវាជាផ្នែកនៃទឹកដីរុស្ស៊ី។
ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បាននិយាយថា កងទ័ពអ៊ុយក្រែនបានចាប់យកមកវិញទីប្រជុំជនជាច្រើនក្នុងតំបន់មួយចំនួន ហើយការប្រយុទ្ធគ្នាក៏កំពុងកើតមាននៅផ្នែកជាច្រើនតាមរណសិរ្សជួរមុខ។
នៅភាគខាងត្បូង ទាហានអ៊ុយក្រែនបានចាប់យកមកវិញទីប្រជុំជន ឌូតចានី(Dudchany)តាមមាត់ទន្លេដ្នីប្រូ ។ការរុលទៅមុខនៅប៉ែកខាងត្បូងប្រទេសផ្តោតលើខ្សែផ្គត់ផ្គង់សំរាប់ទាហានរុស្ស៊ីប្រមាណ២៥.០០០នាក់នៅតាមមាត់ទន្លេដ្នីប្រូ នៅពេលកងកម្លាំងអ៊ុយក្រែនបានបំផ្លាញស្ពានដ៏សំខាន់ឆ្លងទន្លេនេះមួយដោយបង្ខំអោយកងកម្លាំងរុស្ស៊ីប្រើស្ពានដែកបណ្តោះអាសន្ន៕
កងកម្លាំងអ៊ុយក្រែនទម្លុះខ្សែការពាររុស្ស៊ីនៅភាគខាងត្បូងហើយរុលចូលភាគខាងកើត