Views: 3
ប្រែសម្រួល : កញ្ញាដាលីស (ស្ត្រេតថែមស៍) ៖ រដ្ឋមន្ត្រីការបរទេសកូរ៉េខាងត្បូងលោក ផាក ជីន (Park Jin) ធ្វើទស្សនកិច្ចលើកដំបូងទៅកាន់ប្រទេសចិននៅថ្ងៃចន្ទ ទី៨ សីហានេះខណៈរដ្ឋាភិបាលរបស់ប្រធានាធិបតី យូន ស៊ុកយ៉ូល (Yoon Suk-yeol) ព្យាយាមធានាឡើងវិញដល់ទីក្រុងប៉េកាំងអំពីទំនាក់ទំនងរបស់ពួកគេទោះបីជាទីក្រុងសេអ៊ូលមានទំនាក់ទំនងកាន់តែខ្លាំងជាមួយសហរដ្ឋអាម៉េរិក និងភាពតានតឹងជុំវិញកោះតៃវ៉ាន់ក៏ដោយ។
ក្រសួងការបរទេសកូរ៉េខាងត្បូងបាននិយាយថា លោកផាកគ្រោងនឹងស្នាក់នៅរយៈពេលបីថ្ងៃនៅទីក្រុងកំពង់ផែ ឈីងតាវ (Qingdao) ភាគខាងកើតដែលក្នុងអំឡុងនោះលោកនឹងជួបពិភាក្សាជាមួយរដ្ឋមន្ត្រីការបរទេសចិនលោក វ៉ាង យី។ លោកផាកគឺជាមន្ត្រីជាន់ខ្ពស់ដំបូងគេដែលធ្វើដំណើរទៅកាន់ប្រទេសចិនចាប់តាំងពីលោកយូនចូលកាន់តំណែងកាលពីខែឧសភា។
ដំណើរទស្សនកិច្ចរបស់លោកធ្វើឡើងបន្ទាប់ពីទីក្រុងប៉េកាំងបានសម្តែងការខឹងសម្បាចំពោះដំណើរទស្សនកិច្ចរបស់ប្រធានសភាអាម៉េរិក លោកស្រី ណាន់ស៊ី ផេឡូស៊ី នៅកោះតៃវ៉ាន់កាលពីសប្តាហ៍មុន។
លោកយូនបានប្រឈមនឹងការរិះគន់ពីសមាជិកសភា ដែលខ្លះមកពីគណបក្សកាន់អំណាចរបស់គាត់ សម្រាប់មិនបានជួបជាមួយលោកស្រីផេឡូស៊ី។ លោកយូន ដែលកំពុងសម្រាកវិស្សមកាល បានទូរស័ព្ទជាមួយលោកស្រីជំនួសវិញ។ ការិយាល័យរបស់លោកបាននិយាយថា ការសម្រេចចិត្តនេះត្រូវបានធ្វើឡើងដោយគិតពីផលប្រយោជន៍ជាតិ ហើយថាមិនមានសម្ពាធណាមួយពីទីក្រុងប៉េកាំងនោះទេ។
សម្ពាធមានខ្ពស់សម្រាប់ដំណើរទស្សនកិច្ចរបស់លោកផាក ខណៈទីក្រុងសេអ៊ូលព្យាយាមដើរលើខ្សែបន្ទាត់កណ្តាលរវាងសម្ពន្ធភាពរបស់ខ្លួនជាមួយសហរដ្ឋអាម៉េរិកនិងជាមួយប្រទេសចិនដែលជាដៃគូពាណិជ្ជកម្មកំពូលរបស់កូរ៉េខាងត្បូង ចំពេលមានការប្រជែងឥទ្ធិពលកាន់តែខ្លាំងឡើង។
លោកផាកបាននិយាយថា ដំណើរទស្សនកិច្ចរបស់លោកនឹងក្លាយជាឱកាសដើម្បីកាត់បន្ថយការយល់ច្រឡំនិងជំរុញកិច្ចសហប្រតិបត្តិការលើវិស័យនានា រួមទាំងពាណិជ្ជកម្ម សុខាភិបាល និងបរិស្ថាន។
លោកបាននិយាយនៅក្នុងសន្និសីទសារព័ត៌មានមួយថា “តាមរយៈការលើកកម្ពស់ទំនាក់ទំនងកម្រិតខ្ពស់ជាយុទ្ធសាស្ត្រយ៉ាងសកម្ម យើងអាចយល់កាន់តែច្បាស់អំពីគ្នាទៅវិញទៅមកកាត់បន្ថយការយល់ច្រឡំមិនចាំបាច់ និងពង្រីកផលប្រយោជន៍រួម”។
លោកផាកបានកត់សម្គាល់ថា នៅពេលលោកបានជួបលោកវ៉ាងក្នុងកិច្ចប្រជុំរដ្ឋមន្ត្រីការបរទេស G20 កាលពីខែមុនក្នុងប្រទេសថៃ លោកបាននិយាយថាការពង្រឹងសម្ពន្ធភាពរបស់កូរ៉េខាងត្បូងជាមួយអាម៉េរិកនិងការចូលរួមក្នុងវេទិកាសេដ្ឋកិច្ចដែលគាំទ្រដោយអាម៉េរិកសម្រាប់តំបន់អាស៊ី ដែលទីក្រុងប៉េកាំងនិយាយថាត្រូវបានរៀបចំឡើងដើម្បីបំបែកបំបាក់ប្រទេសនានាពីសេដ្ឋកិច្ចរបស់ខ្លួនគឺមិនមែនមានន័យថា “ព្រងើយកន្តើយឬទុកចោល” ទំនាក់ទំនងជាមួយចិននោះទេ។
ភាគីទាំងពីរក៏ប្រឈមមុខនឹងលទ្ធភាពផ្ទុះជម្លោះជុំវិញប្រព័ន្ធការពារមីស៊ីលរបស់អាម៉េរិក Thaad ដែលឈរជើងក្នុងប្រទេសកូរ៉េខាងត្បូងក៏ដូចជាការចូលរួមរបស់ទីក្រុងសេអ៊ូលនៅក្នុងសម្ពន្ធមិត្តបន្ទះឈីបដឹកនាំដោយអាម៉េរិក ដែលពាក់ព័ន្ធនឹងតៃវ៉ាន់និងជប៉ុន ដែលចិនជំទាស់៕
លោកផាកគ្រោងនឹងស្នាក់នៅរយៈពេលបីថ្ងៃនៅទីក្រុងកំពង់ផែ ឈីងតាវ