Views: 4
ប្រែសម្រួលៈបំណង(france24)៖ សារព័ត៌មានក្នុងស្រុកបាននិយាយកាលពីថ្ងៃអាទិត្យថា អ៊ីរ៉ង់បានលុបចោលអង្គភាពប៉ូលីសសីលធម៌របស់ខ្លួនបន្ទាប់ពីផ្ទុះការតវ៉ាប្រឆាំងហិង្សានៅទូទាំងប្រទេសអស់ពេលពីរខែមកនេះដោយសារការចាប់ខ្លួននាងម៉ាសា អាមីនី(Mahsa Amini)និងការស្លាប់របស់នាងនៅក្នុងកន្លែងឃុំឃាំងរបស់ប៉ូលីសសីលធម៌ដោយសារតែនាងស្លៀកពាក់មិនសមស្របតាមក្រិតច្បាប់សម្លៀកបំពាក់ស្ត្រីអ៊ីរ៉ង់។
ការតវ៉ាប្រឆាំងដឹកនាំដោយក្រុមស្ត្រីដែលចង់បានសេរីភាព ដែលអាជ្ញាធរហៅថា«កុបកម្ម» បានរីករាលដាលនៅទូទាំងអ៊ីរ៉ង់ចាប់តាំងពីស្ត្រីដើមកំណើតឃឺដវ័យ២២ឆ្នាំនេះបានស្លាប់ក្នុងកន្លែងឃុំឃាំងរបស់ប៉ូលីសសីលធម៌កាលពីថ្ងៃ១៦កញ្ញា នៅបីថ្ងៃក្រោយប៉ូលីសចាប់ខ្លួននាងនៅទីក្រុងតេអេរ៉ង់។
ប៉ូលិសសួរនាំស្ត្រីអ៊ីរ៉ង់ម្នាក់មុនពេលចាប់ខ្លួននាងដោយសារស្លៀកពាក់មិនសមរម្យនៅទីក្រុងតេអេរ៉ង់ កាលពីថ្ងៃ២៣កក្កដា ឆ្នាំ២០០៧
ពួកបាតុករបានដុតកន្សែងរុំក្បាលរបស់គេនិងបានស្រែកពាក្យស្លោកប្រឆាំងរដ្ឋាភិបាល ហើយចាប់តាំងពីការស្លាប់របស់នាងអាមីនី ស្ត្រីអ៊ីរ៉ង់កាន់តែច្រើនឡើងនាំគ្នាឈប់ពាក់កន្សែងរុំក្បាល។
អគ្គរដ្ឋអាជ្ញាម៉ូហាម៉ាត ចាហ្វា ម៉ុនតាហ្សេរី(Mohammad Jafar Montazeri) ត្រូវបានទីភ្នាក់ងារសារព័ត៌មានISNAស្រង់សម្តីដែលបាននិយាយថា« ប៉ូលីសសីលធម៌អត់ពាក់ព័ន្ធអីនឹងតុលាការទេ និងដូច្នេះវាត្រូវបានលុបចោល»។
សូមបញ្ជាក់ថា ចាប់តាំងពីបដិវត្តន៍អ៊ីស្លាមឆ្នាំ១៩៧៩ដែលបានទម្លាក់របបរាជានិយមគាំទ្រដោយអាម៉េរិកនៅអ៊ីរ៉ង់ មានក្រុមត្រួតពិនិត្យសម្លៀកបំពាក់ជាច្រើន ទាំងសំរាប់បុរសនិងស្ត្រីត្រូវបានបង្កើតឡើងនៅអ៊ីរ៉ង់។តែក្រោមការដឹកនាំរបស់ប្រធានាធិបតីប្រកាន់តឹង ម៉ាម៉ូដ អាម៉ាឌីណេចាត(Mahmoud Ahmadinejad) ប៉ូលីសសីលធម៌ ត្រូវបានបង្កើតឡើងដើម្បីផ្សព្វផ្សាយវប្បធម៌ភាពរម្យទមនិងកន្សែងរុំក្បាលសំរាប់ស្រ្តី។
ការប្រកាសលុបចោលអង្គភាពប៉ូលីសនេះកើតឡើងមួយថ្ងៃក្រោយពីលោកអគ្គរដ្ឋអាជ្ញា ម៉ុនតាហ្សេរី បាននិយាយថា«ទាំងសភានិងតុលាការកំពុងធ្វើការ»លើបញ្ហាអំពីថាតើច្បាប់តំរូវអោយស្ត្រីគ្របក្បាលដោយកន្សែងនោះគួរផ្លាស់ប្តូរចោលឬអត់។
សូមបញ្ជាក់ថា ការពាក់កន្សែងរុំក្បាលនេះត្រូវបានដាក់អោយអនុវត្តយ៉ាងតឹងរ៉ឹងចាប់តាំងពីឆ្នាំ១៩៨៣។ប៉ូលិសសីលធម៌នេះដំបូងព្រមាន មុនពេលចាប់ផ្តើមការបង្ក្រាបនិងចាប់ខ្លួនស្ត្រីកាលពី១៥ឆ្នាំមុន។
ក្រុមប៉ូលិសសីលធម៌ធម្មតាមផ្សំដោយបុរសក្នុងឯកសណ្ឋានបៃតងចាស់ និងស្ត្រីពាក់រ៉ូបពណ៌ខ្មៅគ្របតាំងពីក្បាលដល់ចុងជើង
ឃុំវិញការតវ៉ាប្រឆាំងកក្រើកប្រទេសនេះ រដ្ឋាភិបាលទីក្រុងតេអេរ៉ង់បន្ទោសសត្រូវរបស់ខ្លួន រួមមានអាម៉េរិក អ៊ីស្រាអែលនិងអង់គ្លេសរួមទាំងក្រុមជនជាតិឃឺដនៅក្រៅប្រទេស ថាបានពន្យុះអោយមានការតវ៉ាប្រឆាំងរដ្ឋាភិបាលអ៊ីរ៉ង់។
មនុស្សជាង៣០០នាក់បានស្លាប់ក្នុងការតវ៉ាប្រឆាំងហិង្សានាពេលពីរខែមកនេះ រួមមានបុគ្គលិកសន្តិសុខមួយចំនួនផង នេះបើតាមការបញ្ចេញអោយដឹងពីឧត្តមសេនីយ៍អ៊ីរ៉ង់ម្នាក់កាលពីថ្ងៃចន្ទ។តែអង្គការសិទ្ធិមនុស្សមួយតាំងនៅក្រុងអូស្លូ បាននិយាយថាមនុស្សយ៉ាងតិច៤៤៨នាក់ត្រូវបានសម្លាប់ដោយកងកម្លាំងសន្តិសុខអ៊ីរ៉ង់នៅក្នុងការតវ៉ាប្រឆាំងទូទាំងប្រទេសនាពេលកន្លងមក៕