Views: 12
ដោយៈបាយ័ន / សៀមរាបៈ គណៈកម្មការគ្រប់គ្រងគម្រោងហូកា (HoKa) នៃ ក្រសួងទេសចរណ៍ បានប្រកាសជ្រើសរើសបេក្ខជន និងបេក្ខនារី ចូលរួមវគ្គបណ្តុះបណ្តាល គ្រូបង្គោលហូកា និងជំនាញបច្ចេកទេស លើជំនាញការិយាល័យជួរមុខ (Front Office) និងសេវាកម្មម្ហូបអាហារ និងភេសជ្ជៈ (Food and Beverage Services) នៅខេត្តសៀមរាប ខេត្តបន្ទាយមានជ័យ និងខេត្តបាត់ដំបង ។ នេះបើតាម ការប្រកាសរបស់ក្រសួងទេសចរណ៍ នៅថ្ងៃទី១៦ ខែសីហា នេះ។
លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ និងជាប្រធានលេខា ធិការដ្ឋាន នៃគណៈកម្មការគ្រប់គ្រងគម្រោង ហូកា បានឱ្យដឹងថាៈ ការបណ្ដុះបណ្ដាល លើជំនាញការិយាល័យជួរមុខ និងសេវាកម្មម្ហូបអាហារ និងភេសជ្ជៈសម្រាប់ខេត្តទាំង ៣ នេះ គ្រោងធ្វើឡើង ចាប់ពីខែកញ្ញា ដល់ខែវិច្ឆិកា ឆ្នាំ២០២២ ពោលគឺ ផ្ដល់ការបណ្ដុះ បណ្ដាល ដោយផ្ទាល់តែម្ដង។
លោក ជួប រតនា បានបញ្ជាក់ថាៈ នៅខេត្តសៀមរាប វគ្គបណ្តុះបណ្តាលគ្រូបង្គោល ហូកា ត្រូវការជ្រើសរើសបេក្ខជន និងបេក្ខនារី ចូលរៀនជំនាញ ផ្នែកការិយាល័យជួរមុខ ចំនួន ២០ នាក់, ជំនាញបច្ចេកទេសផ្នែកការិយាល័យជួរមុខ និងសេវាកម្មម្ហូបអាហារ និងភេសជ្ជៈ ចំនួន ៤០ នាក់។
នៅខេត្តបន្ទាយមានជ័យ វគ្គបណ្តុះបណ្តាលគ្រូបង្គោល ហូកា ត្រូវការជ្រើសរើស បេក្ខជន បេក្ខនារី ចូលរៀនជំនាញ ផ្នែកការិយាល័យជួរមុខ ចំនួន ២០ នាក់, ផ្នែកសេវាកម្ម ម្ហូបអាហារ និងភេសជ្ជៈ ចំនួន ២០ នាក់, ជំនាញបច្ចេកទេសផ្នែក ការិយាល័យជួរមុខ និងផ្នែកសេវាកម្មម្ហូបអាហារ និងភេសជ្ជៈ ចំនួន ៤០ នាក់ ។
នៅខេត្តបាត់ដំបង វគ្គបណ្តុះបណ្តាលគ្រូបង្គោល ហូកា ត្រូវការជ្រើសរើស បេក្ខជន បេក្ខនារី ចូលរៀនជំនាញផ្នែកការិយាល័យជួរមុខ ចំនួន ២០ នាក់, ផ្នែកសេវាកម្ម ម្ហូបអាហារ និងភេសជ្ជៈ ចំនួន ២០ នាក់, ជំនាញបច្ចេកទេស ផ្នែកការិយាល័យជួរមុខ និងសេវាកម្មម្ហូបអាហារ និងភេសជ្ជៈ ចំនួន ៤០ នាក់ ។
បេក្ខជន និងបេក្ខនារី ដែលមានចំណាប់អារម្មណ៍ លើវគ្គបណ្តុះបណ្តាល ខាងលើ អាចដាក់ពាក្យផ្ទាល់ មកកាន់គណៈកម្មការគ្រប់គ្រងគម្រោង ហូកា នៃក្រសួងទេសចរណ៍ តាមរយៈលោក ផន សុភ័ក្ត្រ ០៧៨ ២១៤ ២៤៥ ។
មន្ទីរទេសចរណ៍ខេត្តសៀមរាប តាមរយៈលោក ប្រាក់ ចាន់ផល្លា ០១២ ៦៦៤ ៤១៧ ។ មន្ទីរទេសចរណ៍ខេត្តបន្ទាយមានជ័យ តាមរយៈលោក ដឿន ដា ០៩២ ៩១៩ ៨៩១។ មន្ទីរទេសចរណ៍ខេត្តបាត់ដំបង តាមរយៈលោក នី រស្មី ០៨៩ ៥៦៥ ២៧៥/០៦៩ ៣៩៩ ៣១២ ។
លោកបានបន្ថែមទៀតថាៈ វគ្គបណ្ដុះបណ្ដាលនេះដែរ រៀបចំដោយ គណៈកម្មការ គ្រប់គ្រងគម្រោងហូកា (HoKa) នៃក្រសួងទេសចរណ៍ ក្រោមកិច្ចសហការជាមួយ អង្គការអន្តរជាតិខាងការងារ (ILO) និងមូលនិធិអភិវឌ្ឍន៍ជំនាញ (SDF) ដើម្បីចូលរួមពង្រឹង និងលើកកម្ពស់សមត្ថភាព ជំនាញវិជ្ជាជីវៈ ដល់អ្នកជំនាញទេសចរណ៍ ក្នុងសេវាកម្មស្នាក់នៅនិងភោជនីយដ្ឋាន ឱ្យមានគុណភាពខ្ពស់បន្ថែមទៀត ព្រមទាំងទ្រទ្រង់ ដល់ការបណ្តុះបណ្តាល ខាងក្នុងមូលដ្ឋាន អាជីវកម្មទេសចរណ៍ ក្នុងបរិបទនៃការស្តារ និងងើបឡើងវិញ ក្នុងវិស័យទេសចរណ៍ ក្រោយវិបត្តិជំងឺកូវីដ-១៩៕/V
