Views: 2
ដោយ៖ ដេប៉ូ / ភ្នំពេញ៖ ក្រសួងយុត្តិធម៌ នៅថ្ងៃទី៥ ខែសីហា ឆ្នាំ២០២២ បានចេញសេចក្តីប្រកាសព័ត៌មានមួយ ដោយបង្ហាញការសោកស្តាយ ចំពោះគណបក្សនយោបាយ និងអង្គការសង្គមស៊ីវិល មួយចំនួន ដើម្បីមកជួបពិភាក្សា តទល់មុខគ្នាដោយផ្ទាល់ នៅចំពោះមុខមហាជន តាមរយៈការផ្សាយផ្ទាល់ តាមបណ្ដាញសារព័ត៌មាន សំដៅជម្រះចោល នូវកង្វល់មិនត្រឹមត្រូវនានា ជុំវិញការធ្វើវិសោធនកម្ម លើកទី១០ នៃរដ្ឋធម្មនុញ្ញនេះ។
បើយោងតាមសេចក្តីប្រកាសព័ត៌មាននេះ បានបញ្ជាក់ថាៈ កាលពីថ្ងៃទី២៩ ខែកក្កដា ឆ្នាំ២០២២ កន្លងទៅ ក្រសួងយុត្តិធម៌ បានអញ្ជើញគណបក្សនយោបាយ និងអង្គការសង្គមស៊ីវិល ដែលយល់ថា ឬអះអាងថា ការធ្វើវិសោធនកម្ម លើកទី១០ នៃរដ្ឋធម្មនុញ្ញ នៃព្រះរាជាណាចក្រកម្ពុជា ប៉ះពាល់ដល់របបប្រជាធិបតេយ្យ សេរីពហុបក្ស និងរបបរាជានិយម អាស្រ័យដោយរដ្ឋធម្មនុញ្ញ ឬរបបសភានិយម ដើម្បីមកជួបពិភាក្សា តទល់មុខគ្នាដោយផ្ទាល់ នៅចំពោះមុខមហាជន តាមរយៈការផ្សាយផ្ទាល់ តាមបណ្ដាញសារព័ត៌មាន សំដៅជម្រះចោលនូវ កង្វល់មិនត្រឹមត្រូវនានា ជុំវិញការធ្វើវិសោធនកម្ម លើកទី១០ នៃរដ្ឋធម្មនុញ្ញនេះ។ ប៉ុន្តែ រហូតមកដល់ពេលនេះ គណបក្សនយោបាយទាំង ៤ ដែលបានដាក់ញត្តិជូនទៅរដ្ឋសភា ជំទាស់នឹងការធ្វើ វិសោធនកម្មលើកទី១០ នៃរដ្ឋធម្មនុញ្ញនេះ និងអង្គការសង្គមស៊ីវិល ចំនួន ១០៤ ដែលបានចេញសេចក្ដីថ្លែងការណ៍ សម្តែងនូវកង្វល់នានា ជុំវិញការធ្វើវិសោធនកម្មនេះ ពុំបានអញ្ជើញចូលរួម តាមការអញ្ជើញរបស់ ក្រសួងយុត្តិធម៌ នោះទេ។
ក្រសួងយុត្តិធម៌ បានបញ្ជាក់ ក្នុងសេចក្តីប្រកាសព័ត៌មាន របស់ខ្លួនថា ប្រសិនបើគណបក្ស នយោបាយ និងអង្គការសង្គមស៊ីវិលទាំងនោះ ពិតជាមានបំណងដោយសុទ្ធចិត្ត ដើម្បីចង់ការពាររដ្ឋធម្មនុញ្ញ, របបប្រជាធិបតេយ្យ សេរីពហុបក្ស, របបរាជានិយម អាស្រ័យដោយរដ្ឋធម្មនុញ្ញ ឬរបបសភានិយម ដូចអ្វីដែលបានអះអាង ពិតប្រាកដមែននោះ, គួរណាស់តំណាងគណបក្សនយោបាយ ឬតំណាងអង្គការសង្គមស៊ីវិលទាំងនោះ អញ្ជើញតាមការអញ្ជើញរបស់ក្រសួងយុត្តិធម៌ ដើម្បីស្វែងយល់ឱ្យបានត្រឹមត្រូវ អំពីខ្លឹមសារ និងគោលបំណងពិតប្រាកដ នៃការធ្វើវិសោធនកម្ម លើកទី១០ នេះ ឬដើម្បីលើកយកទឡ្ហីករណ៍ មកតទល់ពន្យល់គ្នា ទៅវិញទៅមក ជាមួយក្រសួងយុត្តិធម៌ ដោយមានការផ្សាយផ្ទាល់ តាមបណ្ដាញសារព័ត៌មាន ដើម្បីអាចឱ្យសាធារណជន អាចយល់ច្បាស់ថា តើវិសោធនកម្មរដ្ឋធម្មនុញ្ញ លើកទី១០ នេះ ពិតជាបានប៉ះពាល់ដល់ របបប្រជាធិបតេយ្យសេរីពហុបក្ស ឬរបបរាជានិយម អាស្រ័យដោយរដ្ឋធម្មនុញ្ញ ឬរបបសភានិយម ដូចអ្វីដែលគណបក្សនយោបាយ ទាំង ៤ ឬ អង្គការសង្គមស៊ីវិល ទាំង ១០៤ បានលើកឡើងនោះដែរ ឬទេ? ។
ក្រសួងយុត្តិធម៌ មានការសោកស្តាយ ដោយគណបក្សនយោបាយ និងអង្គការសង្គមស៊ីវិល ខាងលើ មិនបានចូលរួម តាមការអញ្ជើញ ខាងលើនេះ ក្រោមលេសនានា ដោយមិនសមហេតុផល។
ក្រសួងយុត្តិធម៌ សង្ឃឹមថា តាមរយៈការបកស្រាយបំភ្លឺ ជាបន្តបន្ទាប់របស់ តំណាងរាជរដ្ឋាភិបាល, គណបក្សនយោបាយទាំង ៤ និងអង្គការសង្គមស៊ីវិល ទាំង ១០៤ ពិតជាអាចទទួលយក នូវការពន្យល់បកស្រាយបំភ្លឺរបស់ តំណាងរាជរដ្ឋាភិបាល អំពីខ្លឹមសារ និងគោលបំណងពិតប្រាកដ នៃការធ្វើវិសោធនកម្មរដ្ឋធម្មនុញ្ញនេះ៕/V