Views: 5
ប្រែសម្រួល : កញ្ញាដាលីស (ដេល្លីម៉េល) ៖ អាជ្ញាធរបន្តុបដោយវិមានក្រឹមឡាំងនៅក្នុងតំបន់ចំនួនបួនរបស់អ៊ុយក្រែន ដែលស្ថិតក្រោមការគ្រប់គ្រងរបស់រុស្ស៊ីបានអះអាងពីជ័យជម្នះកាលពីថ្ងៃអង្គារទី២៧កញ្ញា ក្នុងការបោះឆ្នោតអំពីការកាត់យកទឹកដី ដែលទាក់ទាញការខឹងសម្បាជាសកល ខណៈរដ្ឋាភិបាលក្រុងមូស្គូបានព្រមានថា ខ្លួនអាចប្រើប្រាស់អាវុធនុយក្លេអ៊ែរដើម្បីការពារទឹកដីនេះ។
អ៊ុយក្រែននិងសម្ពន្ធមិត្តរបស់ខ្លួនបានថ្កោលទោសការបោះឆ្នោតប្រជាមតិនេះថាជាការក្លែងបន្លំ ដោយនិយាយថាលោកខាងលិចនឹងមិនទទួលស្គាល់លទ្ធផលឆ្នោតដែលកើតចេញពីការឈ្លានពានរបស់រុស្ស៊ីក្នុងរយៈពេលប្រាំពីរខែមកនេះទេ។
អាជ្ញាធរគាំទ្ររុស្ស៊ីនៅខេត្តហ្សាប៉ូរីហ្សហ្សា (Zaporizhzhia)បាននិយាយថា ៩៣,១១ ភាគរយនៃអ្នកបោះឆ្នោតបានគាំទ្រការចូលរួមក្នុងប្រទេសរុស្ស៊ី នេះបើយោងតាមលទ្ធផលបឋមកាលពីល្ងាចថ្ងៃអង្គារ។
នៅខេត្តឃើសុន (Kherson) ដែលជាតំបន់កាន់កាប់ដោយមូស្គូមួយទៀតនៅភាគខាងត្បូងអ៊ុយក្រែន ក្រុមមន្ត្រីបាននិយាយថា អ្នកបោះឆ្នោតជាង ៨៧,០៥ ភាគរយបានគាំទ្រចំណាត់ការនេះ បន្ទាប់ពីសន្លឹកឆ្នោតទាំងអស់ត្រូវបានរាប់។
នៅក្នុងខេត្តលូហានសខ៍ (Luhansk) ភាគខាងកើតដែលគ្រប់គ្រងដោយពួកបំបែកខ្លួនគាំទ្ររុស្ស៊ី អាជ្ញាធរក្នុងតំបន់បាននិយាយថា ច្រើនជាង ៩៨,៨២ភាគរយបានបោះឆ្នោតគាំទ្រការកាត់យកទឹកដី នេះបើយោងតាមអាជ្ញាធរក្នុងតំបន់។
ហើយក្រុមមន្ត្រីនៅក្នុងខេត្តដូណិតសខ៍ (Donetsk)ដែលគ្រប់គ្រងដោយរដ្ឋាភិបាលក្រុងមូស្គូ ក៏បានអះអាងពីជ័យជម្នះផងដែរ ដោយស្ថាប័នស្ទង់មតិក្នុងស្រុកបាននិយាយថា ៩៩,២៣ភាគរយនៃការបោះឆ្នោតគឺគាំទ្រការកាត់យកទឹកដី។
ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយមុននេះក្នុងកិច្ចប្រជុំតាមទូរទស្សន៍ជាមួយពួកមន្ត្រីថា “ការសង្គ្រោះប្រជាជននៅក្នុងទឹកដីដែលការបោះឆ្នោតប្រជាមតិនេះកំពុងប្រព្រឹត្តទៅ…គឺជាការយកចិត្តទុកដាក់របស់សង្គមទាំងមូលរបស់យើងនិងរបស់ប្រទេសទាំងមូល”។
អ្នកនាំពាក្យរបស់គាត់ លោក ឌីមីទ្រី ប៉េស្កូវ (Dmitry Peskov)បាននិយាយថា ការបោះឆ្នោតនឹងមានផលប៉ះពាល់ផ្នែកច្បាប់ “យ៉ាងខ្លាំង” ហើយថាការបោះប្រជាមតិនេះ”ក៏នឹងមានផលវិបាកសម្រាប់សន្តិសុខផងដែរ” ដោយសំដៅទៅលើការគំរាមកំហែងរបស់រដ្ឋាភិបាលក្រុងមូស្គូក្នុងការប្រើប្រាស់អាវុធនុយក្លេអ៊ែរដើម្បីការពារទឹកដីរបស់ខ្លួន៕
ប្រជាជននៅខេត្តទាំងបួនរបស់អ៊ុយក្រែនបោះឆ្នោតគាំទ្រការដាក់បញ្ចូលទឹកដីទៅក្នុងប្រទេសរុស្ស៊ី
