Views: 9
ដោយ៖ សុវណ្ណកុម្ភៈ / ភ្នំពេញ៖ ពេលនេះ គឺមានរយៈពេលជាង ២ សប្ដាហ៍មកហើយ ដែលក្រុមកីឡាលើកទម្ងន់កម្ពុជា ចេញទៅហាត់ រយៈពេលវែង នៅទីក្រុងគួនមីង ប្រទេសចិន ។ ការហ្វឹកហាត់នៅប្រទេសចិន ជំហានដំបូង ជួបបញ្ហាប្រឈមខ្លះៗ ដូចជាអាកាសធាតុ និងភាសាជាដើម ប៉ុន្តែអត្តពលិក បានបន្សាំខ្លួនបានល្អបណ្តើរៗហើយ ក្រោយបានហ្វឹកហាត់រយៈពេលប្រមាណ ២ សប្តាហ៍មកនោះ។
អ្នកស្រី ទ្រី ថាវី គ្រូបង្វឹកកីឡាលើកទម្ងន់កម្ពុជា បានប្រាប់ឲ្យដឹង ពីទីក្រុងគួនមីង ប្រទេសចិន មកថាៈ ចំពោះសិទ្ធផល នៅមិនទាន់វាយតម្លៃបានទេ ពីព្រោះកាហ្វឹកហាត់នៅចិនទើបតែមានរយៈពេលខ្លី។ ទោះជាយ៉ាងណា បើនិយាយពីសម្ភារៈ សម្រាប់ការហ្វឹកហាត់ គឺនៅចិនមានកម្រិតស្តង់ដា។ ជាពិសេសគឺ មានគ្រូជំនាញច្បាស់លាស់ មានផែនការហ្វឹកហាត់ត្រឹមត្រូវ តាមបច្ចេកទេសថ្មី គឺវាស្របទៅតាមនិយាមបច្ចេកទេសអន្តរជាតិ ដែលអាចខុសពី នៅកម្ពុជាខ្លះដែរ។
អ្នកស្រី គ្រូបង្វឹក បានបន្តថាៈ ប៉ុន្តែកីឡាករ កីឡាការិនី គឺឆាប់ចាប់បាននូវអ្វី ដែលគ្រូជំនាញ ចិន ផ្តល់ឲ្យ ដោយសារការហ្វឹកហាត់ដំបូងនេះ គឺចាប់ផ្ដើមធ្វើតេស្តបច្ចេកទេស សមត្ថភាព និងកាយសម្បទា ដើម្បីឲ្យគ្រូយល់ពីកម្រិតសមត្ថភាព របស់អត្តពលិកកម្ពុជា មុនពេលដាក់ ផែនការហ្វឹកហាត់ ជាក់លាក់ ឲ្យស្របតាមកម្លាំង និងសមត្ថភាពរបស់ពួកគេ។
អ្នកស្រី ទ្រី ថាវី រំពឹងថាៈ ការហ្វឹកហាត់ រយៈពេលវែងនៅប្រទេសចិន នឹងអាចមានលទ្ធផល ល្អ នៅស៊ីហ្គេមឆ្នាំ២០២៣ ពីព្រោះ កីឡាករ កីឡាការិនី សុទ្ធតែមានឆន្ទៈខ្ពស់ ក្នុងការហ្វឹកហាត់ ដែលពីមួយថ្ងៃទៅមួយថ្ងៃ គ្រូបង្វឹកចិន បានបន្ថែមគីឡូ និងបង្ហាញរបៀបលើកថ្មីៗ។
សូមបញ្ជាក់ថា កាលពីថ្ងៃទី១៥ ខែកញ្ញា ឆ្នាំ២០២២ ក្រោមមជំនួយឥតសំណងរបស់ រដ្ឋាភិបាល និងប្រជាជនចិន កម្ពុជាបានបញ្ជូនប្រតិភូ គ្រូបង្វឹក និងអត្តពលិកជម្រើសជាតិ ១៦១នាក់ លើ ១២ ប្រភេទកីឡា ទៅហ្វឹកហាត់នៅប្រទេសចិន រយៈពេល ៦ ខែ រហូតដល់ស៊ីហ្គេម ឆ្នាំ២០២៣។
ទោះបីជាយ៉ាងណាក៏ដោយ ក្រោយបញ្ចប់បេសកកម្ម សម្រាប់ស៊ីហ្គេម បើសិនជាគ្មាន ការប្រែប្រួលនោះទេ អត្តពលិកជម្រើសជាតិកម្ពុជា នឹងត្រឡប់ទៅហាត់នៅចិន បន្ដទៀត រហូតចប់កិច្ចព្រមព្រៀង រយៈពេល ២ ឆ្នាំ។ ក្នុងនោះ ក៏មានគ្រូបង្វឹក និងអត្តពលិកកីឡា លើកទម្ងន់ សរុប ១០ នាក់ទៀតផង។
សម្រាប់កីឡាស៊ីហ្គេមលើកទី៣២ ឆ្នាំ២០២៣ សហព័ន្ធកីឡាលើកទម្ងន់កម្ពុជា បានត្រៀម ១៤ វិញ្ញាសា ផ្នែកបុរស ៧ វិញ្ញាសា និងផ្នែកនារី ៧ វិញ្ញាសា ធ្វើការប្រកួតប្រជែងជាមួយក្តីរំពឹង មេដាយមាសមួយគ្រឿង តាមសន្ទស្សន៍របស់ គណៈកម្មាធិការជាតិ រៀបចំការប្រកួតស៊ីហ្គេម ឆ្នាំ២០២៣៕ V / N