Views: 10
ដោយៈដេប៉ូ/សៀមរាប៖ កិច្ចប្រជុំលើកទី២៤ ក្រុមប្រឹក្សាភិបាលនៃមជ្ឈមណ្ឌលជីវៈចម្រុះអាស៊ាន (ACB) បានប្រព្រឹត្តទៅរយៈពេលពីរថ្ងៃ ពោលគឺចាប់ពីថ្ងៃទី៣-៤ខែតុលាឆ្នាំ២០២២។កិច្ចប្រជុំនេះដើម្បីពិនិត្យ និងពិភាក្សាលើឯកសារមួយចំនួន។
គួរបញ្ជាក់ថានៅក្នុងក្របខ័ណ្ឌកិច្ចប្រជុំឧត្តមមន្ដ្រីបរិស្ថានអាស៊ាន លើកទី៣៣និងកិច្ចប្រជុំពាក់ព័ន្ធ នេះរៀបចំឡើងដោយក្រសួងបរិស្ថាន ដោយមានរបៀបវារៈមួយចំនួន។ក្នុងនេះ៖របាយការណ៍ពាក់ព័ន្ធនឹងសេចក្តីសម្រេចនានារបស់កិច្ចប្រជុំលើកទី២៣ ក្រុមប្រឹក្សាភិបាលនៃមជ្ឈមណ្ឌល ACB កាលពីថ្ងៃទី១៣-១៤ខែកញ្ញាឆ្នាំ២០២១,របាយការណ៍ពាក់ព័ន្ធនឹងសេចក្តីសម្រេចនានារបស់កិច្ចប្រជុំលើកទី៣២ នៃក្រុមការងារបច្ចេកទេសស្តីពីការអភិរក្សធនធានធម្មជាតិនិងជីវៈចម្រុះអាស៊ាន (AWGNCB) កាលពីថ្ងៃទី៩-១០ ខែសីហា ឆ្នាំ២០២២ រួមទាំងវឌ្ឍនភាព និងសកម្មភាពការងាររបស់ AWGNCB, ផែនការការងារ-ថវិការបស់មជ្ឈមណ្ឌល ACB សម្រាប់ឆ្នាំ ២០២១-២០២២ និងគម្រោងសំណើសម្រាប់ឆ្នាំ២០២៣çសកម្មភាពការងារដើម្បីត្រៀមសម្រាប់សន្និសីទកំពូលរដ្ឋជាភាគី នៃអនុសញ្ញាសហប្រជាជាតិស្តីពីជីវៈចម្រុះលើកទី១៥ (UNCBD COP-15)ç បញ្ហាផ្សេងៗ៖ ១.ការងារគ្រប់គ្រងនិងប្រតិបត្តិមជ្ឈមណ្ឌល ACB និង ២.កាលបរិច្ឆេទនិងទីកន្លែងនៃកិច្ចប្រជុំបន្ទាប់ (កិច្ចប្រជុំលើកទី២៥) ក្រុមប្រឹក្សាភិបាលនៃមជ្ឈមណ្ឌល ACB សម្រាប់ឆ្នាំ២០២៣ ខាងមុខ។
សូមបញ្ជាក់ថា កិច្ចប្រជុំលើកទី២៤ ក្រុមប្រឹក្សាភិបាលនៃមជ្ឈមណ្ឌលជីវៈចម្រុះអាស៊ាន (ACB) បើកដំណើរដោយ លោកស្រី ចាន់ សុម៉ាលី អនុរដ្ឋលេខាធិការក្រសួងបរិស្ថាននិងមានការអញ្ជើញ ចូលរួមពីថ្នាក់ដឹកនាំនៃបណ្តាប្រទេសអាស៊ានទាំង១០ ដៃគូអនុវត្តគម្រោង និងអ្នកពាក់ព័ន្ធ តាមរយៈការចូលរួមកិច្ចប្រជុំផ្ទាល់ និងតាមប្រព័ន្ធអនឡាញ សរុបចំនួនជាង៧០រូប។ កិច្ចប្រជុំនេះ រៀបចំឡើងក្នុងគោលបំណងពិនិត្យពិភាក្សានិងសម្រេចលើ៖១.សកម្មភាពនិងលទ្ធផលការងាររបស់មជ្ឈមណ្ឌល ACB សម្រាប់ឆ្នាំ២០២១-២០២២, ២.របាយការណ៍ចំណាយថវិកាឆ្នាំ២០២១-២០២២ និងគម្រោងសំណើសម្រាប់ឆ្នាំ២០២៣និង៣.កិច្ចសហការនានាជាមួយដៃគូសម្រាប់ការងារជីវៈចម្រុះអាស៊ាន។
តាមរយៈកិច្ចប្រជុំនេះ កម្ពុជានឹងស្នើឱ្យមានការធ្វើបច្ចុប្បន្នភាពលើ ASEAN Joint Statement ដែលបានអានដោយប្រទេស ប្រ៊ុយណេ នៅក្នុងកិច្ចប្រជុំ COP-15 ផ្នែកទី១ នៅឆ្នាំ២០២១ ដើម្បីលើកឡើងនូវបញ្ហាថ្មីៗបន្ថែមទៀតសម្រាប់ត្រៀមធ្វើបទអន្តរាគមន៍នៅក្នុងកិច្ចប្រជុំថ្នាក់ដឹកនាំជាន់ខ្ពស់ (High Level Segment) នៃសន្និសីទកំពូលរដ្ឋជាភាគីនៃអនុសញ្ញាសហប្រជាជាតិស្តីពីជីវៈចម្រុះលើកទី១៥ ផ្នែកទី២ នៅទីក្រុងម៉ុងរ៉េអាល់ ប្រទេសកាណាដា នាខែធ្នូខាងមុខ ហើយដែលកម្ពុជានឹងត្រូវថ្លែងតំណាងតំបន់ក្នុងនាមជាប្រធានអាស៊ាន៕សរន / N