Views: 2
ដោយ: កាំពី / ក្រចេះ: មន្ទីរកសិកម្មរុក្ខាប្រមាញ់និងនេសាទ ខេត្តក្រចេះ បានប្រារព្វពិធីលែងកូនត្រី និងមេពូជចំនួន ៤ម៉ឺនក្បាល ចូលទៅក្នុងបឹងធម្មជាតិឈ្មោះថាបឹងរំអិលដើម្បីអបអរសាទរទិវា មច្ឆជាតិ ១ កក្តដា ក្រោមអធិបតីលោក ប៉ែន លីណាត អភិបាលរងខេត្ត រួមនិងប្រជានេសាទសហគមន៍ប្រមាណជាង ២០០ នាក់ ស្ថិតក្នុងឃុំសំបុក ស្រុកចិត្របុរីខេត្តក្រចេះ កាលពីព្រឹកថ្ងៃ១៨ខែ សីហា ឆ្នាំ២០២២នេះ។
លោក ទ្រី សុភក្តិ ប្រធានមន្ទីរកសិកម្មរុក្ខាប្រមាញ់ និងនេសាទរខេត្ត បានឲ្យដឹងថា៖ ដោយទទួលបានការអនុញ្ញាតពីលោក វ៉ា ថន អភិបាលខេត្ត ឲ្យរៀបចំទិវាមច្ឆជាតិថ្នាក់ខេត្ត នៅក្នុងបឹងរំអិល ឃុំសំបុក ស្រុកចិត្របុរីនេះ ថ្ងៃនេះនឹងលែងកូនត្រីក្នុងស្រុក សរុបចំនួន ៤ ម៉ឺនក្បាល និងត្រីមេពូជចំនួន១៥ គីឡូក្រាម រួមមាន ត្រីប្រា ត្រីឆ្ពិន ត្រីកាហែ ត្រីក្អែក អន្ទង់ ត្រីរ៉ស និងត្រីក្រាញ់ ចូលក្នុងបឹងរំអិល ដើម្បីបង្កើនផលស្តុកនៅក្នុងធម្មជាតិឱ្យកាន់តែសម្បូរណ៍ឡើងថែមទៀត សម្រាប់ប្រើប្រាស់ក្នុងសហគមន៍មូលដ្ឋាន ។ លោកបញ្ជាក់ទៀតថា ៖ បឹងរំអិលនេះ មានទំហំប្រមាណ ៣២ ហិកតា និងមានកន្លែងអភិរក្សត្រីមេពូជចំនួន ២,៥ ហិកតា ដោយមានទឹកទាំងរដូវប្រាំង និងរដូវវស្សា សហគមន៍នេសាទ បានរៀបចំបង្កើតឡើងនៅឆ្នាំ២០០៩ មានសមាជិកសហគមន៍សរុបចំនួន ២០៧ នាក់ ស្មើនឹង១៥៤គ្រួសារ និង បានចុះបញ្ជីទទួលស្គាល់ជាផ្លូវការដោយប្រកាសលេខ ៦២៨ ប្រក.កសក នៅឆ្នាំ២០១១ របស់ក្រសួងកសិកម្ម រុក្ខាប្រមាញ់ និងនេសាទ។
លោក ប៉ែន លីណាត អភិបាលរងខេត្តក្រចេះបានបញ្ជាក់ថា ៖ កំណើនប្រជាពលរដ្ឋ ក៏ដូចជាកំណើន ប្រជានេសាទ ដែលរស់នៅជុំវិញបឹងរំអលនេះ មានការកើនឡើងយ៉ាងឆាប់រហ័ស បានដាក់សម្ពាធយ៉ាងធ្ងន់បន្ថែមទៀត ធ្វើឲ្យមានផលប៉ះពាល់ជាអវិជ្ជមាន ដល់ធនធានជលផល និងធនធានធម្មជាតិផ្សេងៗទៀត ដែលស្ថិតនៅតែជាឧបសគ្គ ចម្បង ក្នុងការធ្វើឲ្យបានសម្រេចតាមផែនការប្រើប្រាស់អភិវឌ្ឍធនធានជលផល និងធនធានធម្មជាតិដទៃទៀត ប្រកបដោយចីរភាព ។ ដោយហេតុ នេះហើយទើបរាជរដ្ឋាភិបាលបានរៀបចំកម្មវិធីកំណទម្រង់ គោលនយោបាយវិស័យ ជលផល ដ៏ស៊ីជម្រៅមួយជាប្រវត្តិសាស្ត្រ ដោយបានលុបឡូត៍នេសាទទាំងអស់ ហើយបានប្រគល់សិទ្ធិអំណាច ទៅឲ្យ សហគមន៍គ្រប់គ្រង និងប្រើប្រាស់ធនធានដោយផ្ទាល់នោះ បានធ្វើឲ្យប្រជាកសិករអាចមានលទ្ធភាពចូលរួមយ៉ាងសកម្ម នៅក្នុងការសម្រេចចិត្ត និងរៀបចំផែនការកម្មវិធីអភិវឌ្ឍន៍នានា របស់មូលដ្ឋានរៀងៗខ្លួន ហើយរួមចំណែកទទួលខុសត្រូវ និងធ្វើជាម្ចាស់លើការគ្រប់គ្រងធនធានធម្មជាតិដោយខ្លួនឯង។ ដូច្នេះសូមបងបប្អូនប្រជាសហគមន៍ សូចូលរួមថែរក្សាបឹងនេះឲ្យបានល្អទាំងអស់ កុំប្រើឧបករណ៍នេសាទល្មើសច្បាប់ ក្នុងការធ្វើនេសាទ ជាពិសេសគឺឧបករណ៍ឆក់ ស្បៃមុងជាដើម និង ខិតខំដាំដើមឈើបន្ថែម៕