Views: 9
ប្រែសម្រួល : កញ្ញាដាលីស (ដេល្លីម៉េល) ៖ លោកស្រី ព្រីស៊ីលឡា ព្រីសលី (Priscilla Presley) ត្រូវជាម្តាយរបស់នាង លីសា ម៉ារី ព្រីសលី (Lisa Marie Presley)បាននិយាយថា កូនស្រីរបស់លោកស្រីបានស្លាប់ហើយ ក្រោយត្រូវបានបញ្ជូនទៅមន្ទីរពេទ្យយ៉ាងប្រញាប់ក្នុងរដ្ឋកាលីហ្វ័រញ៉ាកាលពីថ្ងៃព្រហស្បតិ៍ទី១២មករា ដោយសារគាំងបេះដូង។
វេបសាយកម្សាន្ត TMZ បានរាយការណ៍ដោយដកស្រង់ប្រភពមិនបញ្ចេញឈ្មោះ ថា កូនស្រីអាយុ ៥៤ ឆ្នាំរបស់តារាចម្រៀងសំឡេងមាសអាម៉េរិក លោក អែលវីស ព្រីសលី (Elvis Presley) បានស្ថិតក្នុងស្ថានភាពសន្លប់ស្តូកស្តឹងក្រោមជំនួយអុកស៊ីសែនសង្គ្រោះជីវិត។
វេបសាយនេះបាននិយាយថាអ្នកចំរៀងនិងអ្នកនិពន្ធបទចំរៀង នាងព្រីសលី”បាត់បង់ស្មារតី” នៅពេលដែលស្ត្រីមេផ្ទះរបស់នាងបានរកឃើញនាងនៅផ្ទះរបស់នាងកាលពីព្រឹកថ្ងៃព្រហស្បតិ៍នៅសង្កាត់កាឡាបាស (Calabasas) ជាតំបន់ជាយក្រុងឡូសអាន់ជើឡេស ដែលល្បីល្បាញខាងគេហដ្ឋានរបស់តារាល្បីៗ។
អតីតស្វាមីរបស់នាងឈ្មោះ ដាននី ខូ (Danny Keough) ដែលរស់នៅក្នុងផ្ទះនោះដែរ បានធ្វើចលនាដង្ហើម CPR រហូតដល់គ្រូពេទ្យមកដល់ និងដឹកនាងទៅមន្ទីរពេទ្យ។
វេបសាយដដែលបាននិយាយថា ប្រភពរបស់ខ្លួនបានសង្កត់ធ្ងន់ថា វាមិនមែនជាការប៉ុនប៉ងធ្វើអត្តឃាតរបស់តារាចម្រៀងរូបនេះនោះទេ។
លោកស្រី ព្រីស៊ីលឡា ព្រីសលី (Priscilla Presley) ត្រូវជាម្តាយ បានចូលប្រើបណ្តាញសង្គមTwitter ដើម្បីបញ្ជាក់ថាកូនស្រីរបស់លោកស្រីបានស្លាប់ហើយ។
មុននេះលោកស្រីបានសរសេរថា “កូនស្រីជាទីស្រឡាញ់របស់ខ្ញុំ លីសា ម៉ារី ត្រូវបានបញ្ជូនទៅមន្ទីរពេទ្យ។ ពេលនេះនាងកំពុងទទួលបានការថែទាំល្អបំផុត។ សូមព្រះថែរក្សានាងហើយក្រុមគ្រួសាររបស់យើងកំពុងបន់ស្រន់។ យើងមានអារម្មណ៍ថាមានការបន់ស្រន់ពីជុំវិញពិភពលោក ហើយយើងសុំឯកជនភាពក្នុងអំឡុងពេលនេះ”៕
នាង លីសា ម៉ារី ព្រីសលី បានស្លាប់ដោយសារគាំងបេះដូងកាលពីថ្ងៃព្រហស្បតិ៍
