Views: 2
ប្រែសម្រួលៈបំណង(ដេល្លីម៉េល)៖ កូរ៉េខាងត្បូងនិងអាម៉េរិកបានចាប់ផ្តើមសមយុទ្ធរួមគ្នាជាមួយនឹងនាវាដឹកយន្តហោះអាម៉េរិកមួយកាលពីថ្ងៃសុក្រទី០៧តុលា នៅមួយថ្ងៃបន្ទាប់ពីកូរ៉េខាងជើងបាញ់កាំជ្រួចផ្លោងនិងកូរ៉េខាងត្បូងបញ្ចេញយន្តហោះប្រដេញទៅស្ទាក់យន្តហោះប្រយុទ្ធរបស់កូរ៉េខាងជើងក្នុងប្រតិកម្មទៅនឹងអ្វីដែលទំនងជាសមយុទ្ធទម្លាក់គ្រាប់របស់កូរ៉េខាងជើង។
នាយសេនាធិការកងទ័ពចំរុះកូរ៉េខាងត្បូងបាននិយាយថា សមយុទ្ធកងទ័ពជើងទឹកនេះនឹងត្រូវធ្វើឡើងនៅក្នុងដែនទឹកនៅឯនាយឆ្នេរខាងកើតរបស់កូរ៉េខាងត្បូងចាប់ពីថ្ងៃ៧ដល់៨តុលា ។វាកើតឡើងក្រោយកូរ៉េខាងជើងបាញ់កាំជ្រួចផ្លោងពីរគ្រាប់ចូលក្នុងសមុទ្រកាលពីថ្ងៃព្រហស្បតិ៍ និងក្រោយមកបានបញ្ជូនយន្តហោះប្រយុទ្ធមកក្បែរព្រំដែនកូរ៉េខាងត្បូង។
នាយសេនាធិការបាននិយាយថា «យើងនឹងបន្តពង្រឹងសមត្ថភាពប្រតិបត្តិការនិងការត្រៀមខ្លួនរបស់យើងក្នុងការឆ្លើយតបនឹងការបង្ករឿងណាមួយពីកូរ៉េខាងជើង តាមរយៈសមយុទ្ធរួមគ្នាជាមួយ…ក្រុមប្រយុទ្ធនៃនាវាដឹកយន្តហោះUSS Ronald Reagan»។
តាមពិតក្រុមប្រយុទ្ធនៃនាវាដឹកយន្តហោះនេះបានចូលរួមក្នុងសមយុទ្ធការពារកាំជ្រួចត្រីភាគីជាមួយនាវារបស់កងទ័ពកូរ៉េខាងត្បូងនិងជប៉ុនរួចហើយនៅសប្តាហ៍នេះ ជាហេតុនាំអោយកូរ៉េខាងជើងប្រតិកម្មដោយបាញ់កាំជ្រួចមួយរំលងជប៉ុន។
មន្ត្រីយោធាទៅពីអាម៉េរិក ជប៉ុនិងកូរ៉េខាងត្បូង នៅថ្ងៃសុក្រនេះបានពិភាក្សាគ្នាអំពីដំណើរវិវត្តន៍សភាពការណ៍ចុងក្រោយនិងបានថ្កោលទោសការបាញ់បង្ហោះកាំជ្រួចរបស់កូរ៉េខាងជើងហើយយល់ស្របគ្នាថា សមយុទ្ធជើងទឹកត្រីភាគីកាលពីពេលថ្មីៗបានធ្វើអោយប្រសើរលទ្ធភាពរបស់គេក្នុងការឆ្លើយតបចំពោះកូរ៉េខាងជើង។
សមយុទ្ធទម្លាក់គ្រាប់បែកដ៏កម្ររបស់យន្តហោះប្រយុទ្ធកូរ៉េខាងជើងយ៉ាងតិចប្រាំបីគ្រឿងនិងយន្តហោះទម្លាក់គ្រាប់បួនគ្រឿងកាលពីថ្ងៃព្រហស្បតិ៍បណ្តាលអោយកូរ៉េខាងត្បូងបញ្ជូនចេញយន្តហោះប្រយុទ្ធដល់ទៅ៣០គ្រឿង។ពួកវាសម្ញែងឬទ្ធិដាក់គ្នានៅព្រំដែនកងទ័ពចំពេលមានភាពតានតឹងខ្លាំងឡើងរវាងកូរ៉េទាំងពីរ។
កាលពីថ្ងៃព្រហស្បតិ៍ រដ្ឋាភិបាលទីក្រុងព្យុងយ៉ាងបានថ្កោលទោសការបញ្ជូននាវាដឹកយន្តហោះអាម៉េរិកមកក្បែរឧបទ្វីបកូរ៉េឡើងវិញដោយថាវាបង្កការគំរាមធ្ងន់ធ្ងរចំពោះស្ថិរភាពនៃសភាពការណ៍។នៅក្នុងសេចក្តីថ្លែងការណ៍ ក្រសួងការបរទេសកូរ៉េខាងជើងក៏បានរិះគន់រដ្ឋាភិបាលទីក្រុងវ៉ាស៊ីនតោនចំពោះការកោះប្រជុំក្រុមប្រឹក្សាសន្តិសុខអង្គការសហប្រជាតិដើម្បីពិភាក្សាថ្កោលទោសការបាញ់សាកល្បងកាំជ្រួចរបស់ខ្លួន ដោយថាវាជាវិធានការតតបទៅនឹងសមយុទ្ធរួមគ្នារវាងកូរ៉េខាងត្បូងនិងអាម៉េរិកតែប៉ុណ្ណោះ៕
