Views: 3
ប្រែសម្រួលៈបំណង(ដេល្លីម៉េល)៖ក្រសួងការបរទេសនៃប្រទេសឯកោនេះបាននិយាយកាលពីថ្ងៃអង្គារទី៤តុលាថា កូរ៉េខាងជើងគាំទ្រការកាត់យកផ្នែកខ្លះនៃទឹកដីអ៊ុយក្រែនពីសំណាក់រដ្ឋាភិបាលទីក្រុងមូស្គូនិងបានចោទប្រកាន់សហរដ្ឋអាម៉េរិកថា«អនុវត្តស្តង់ដាទ្វេដូចក្រុមបងធំ»ដោយជ្រៀតជ្រែកកិច្ចការរបស់ប្រទេសផ្សេង។
ទីភ្នាក់ងារសារព័ត៌មានរដ្ឋកូរ៉េខាងជើងKCNA បាននិយាយអំពីសេចក្តីសំរេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិដឹកនាំធ្វើដោយអាម៉េរិក ដែលថ្កោលទោសការកាត់យកទឹកដីនេះ តែត្រូវរុស្ស៊ីវ៉េតូប្រឆាំងកាលពីថ្ងៃសុក្រសប្តាហ៍មុន។ KCNAបាននិយាយថា កូរ៉េខាងជើងគាំទ្រការអះអាងរបស់រុស្ស៊ីដែលថា ប្រជាជនក្នុងតំបន់ទាំងនោះបានជ្រើសយកការក្លាយជាផ្នែកនៃប្រទេសរុស្ស៊ី។
រដ្ឋាភិបាលទីក្រុងគៀវនិងពួកមេដឹកនាំលោកខាងលិច បានថ្កោលទោសការរៀបចំធ្វើប្រជាមតិនៅក្នុងតំបន់ដែលរុស្ស៊ីទើបកាត់យកដោយចាត់ទុកជាជាព្រឹត្តិការក្លែងបន្លំមួយ ហើយរដ្ឋាភិបាលទីក្រុងវ៉ាស៊ីនតោន អំពាវនាវអោយរដ្ឋជាសមាជិកអង្គការសហប្រជាជាតិកុំទទួលស្គាល់ការផ្លាស់ប្តូរឋានៈប្រទេសអ៊ុយក្រែនណាមួយ ហើយសុំអោយរុស្ស៊ីដកទាហានចេញពីតំបន់ដែលខ្លួនបានវាយដណ្តើមយក។
ចូ ឆុល ស៊ូ(Jo Chol Su) អគ្គនាយកនៃនាយកដ្ឋានអង្គការអន្តរជាតិនៅក្រសួងការបរទេសកូរ៉េខាងជើង បាននិយាយថា ការបោះប្រជាមតិនេះត្រឹមត្រូវស្របតាមធម្មនុញ្ញអង្គការសហប្រជាជាតិ តែអាម៉េរិកកំពុង«អនុវត្តស្តង់ដាទ្វេដូចក្រុមបងធំ»ដោយបានចូលឈ្លានពានប្រទេសផ្សេងៗក្នុងបំណងរក្សាឧត្តមភាពរបស់ខ្លួន។
លោកបាននិយាយនៅក្នុងសេចក្តីថ្លែងការណ៍ដែលចុះផ្សាយក្នុងKCNAថា «ដើម្បីរក្សាពិភពប៉ូលតែមួយគ្មានគូរជែង អាម៉េរិកជ្រៀតជ្រែកកិច្ចការផ្ទៃក្នុងរបស់ប្រទេសឯករាជ្យនានានិងរំលោភសិទ្ធិស្របច្បាប់របស់គេ ។អាម៉េរិកបង្កសង្គ្រាមឈ្លានពានប្រឆាំងរដ្ឋអធិបតេយ្យនានា រួមមានអតីតយូហ្គោស្លាវី អាហ្វហ្គានីស្ថាននិងអ៊ីរ៉ាក់ តែក្រុមប្រឹក្សាសន្តិសុខមិនដែលរករឿងអាម៉េរិកអីសោះ»។
លោកបានបន្ថែមថា ក្រុមប្រឹក្សាសន្តិសុខនឹងប្រឈមផលវិបាក បើខ្លួនដើរតាមការអនុវត្តតាមតែអំពើចិត្តរបស់អាម៉េរិក និងប្រព្រឹត្តបែបស្តង់ដាទ្វេ។
សូមបញ្ជាក់ថា អ៊ុយក្រែនបានផ្តាច់ទំនាក់ទំនងការទូតជាមួយកូរ៉េខាងជើង កាលពីខែកក្កដាក្រោយពីរដ្ឋាភិបាលទីក្រុងព្យុងយ៉ាងទទួលស្គាល់សាធារណរដ្ឋបំបែកខ្លួនពីរនៅអ៊ុយក្រែនខាងកើត៕
ចូ ឆុល ស៊ូ មន្រ្តីក្រសួងការបរទេសកូរ៉េខាងជើង