Views: 1
ប្រែសម្រួលៈបំណង(ដេល្លីម៉េល)៖ កូរ៉េខាងជើងនៅថ្ងៃព្រហស្បតិ៍ទី៦តុលានេះបានបាញ់កាំជ្រួចផ្លោងពីរគ្រាប់បន្ថែមនៅពេលក្រុមប្រឹក្សាសន្តិសុខអង្គការសហប្រជាជាតិជួបពិភាក្សាគ្នាអំពីការបាញ់កាំជ្រួចដ៏បង្ករឿងរបស់ខ្លួនកាលពីពីរថ្ងៃមុននេះដោយហោះរំលងជប៉ុន ។
កិច្ចប្រជុំមួយរបស់ក្រុមប្រឹក្សាសន្តិសុខអង្គការសប្រជាជាតិនៅបុរីញូវយ៉កកាលពីថ្ងៃ៥តុលា ឆ្នាំ២០២២។ក្រោយកូរ៉េខាងជើងបាញ់កាំជ្រួចផ្លោងកាលពីថ្ងៃអង្គារ សហរដ្ឋអាម៉េរិកកោះប្រជុំក្រុមប្រឹក្សាសន្តិសុខអង្គការសហប្រជាជាតិជាបន្ទាន់ដោយមានការគាំទ្រពីបារាំង អាល់បានី អង់គ្លេស ន័រវេស្សនិងអៀឡង់
វាជាការបាញ់បង្ហោះកាំជ្រួចរបស់កូរ៉េខាងជើងលើកទីប្រាំមួយក្នុងរយៈពេលមិនដល់ពីរសប្តាហ៍ផងនិងកើតឡើងនៅពីរថ្ងៃក្រោយខ្លួនបានបាញ់កាំជ្រួចផ្លោងចម្ងាយមធ្យមមួយហោះរំលងជប៉ុននាំអោយរដ្ឋាភិបាលទីក្រុងតូក្យូចេញការព្រមានជម្លៀសមនុស្ស។
យោធាកូរ៉េខាងត្បូងបាននិយាយថា ខ្លួនបានចាប់បានសញ្ញាកាំជ្រួចផ្លោងចម្ងាយខ្លីពីរដើមត្រូវបានបាញ់ចេញពីតំបន់សាមសុក(Samsok)ក្នុងរដ្ឋធានីព្យុងយ៉ាងឆ្ពោះទៅកាន់សមុទ្រខាងកើត ដែលគេស្គាល់ថា សមុទ្រជប៉ុន។
នាយសេនាធិការកងទ័ពចំរុះកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា «យោធារបស់យើងបានបង្កើនការតាមឃ្លាំមើលនិងកំពុងរក្សាការត្រៀមខ្លួនខ្ពស់បំផុត ដោយសម្របសម្រួលជាមួយសហរដ្ឋអាម៉េរិក»។
ក្នុងពេលជាមួយគ្នា កងឆ្មាំសមុទ្រជប៉ុនបានបញ្ជាក់អះអាងអំពីការបាញ់កាំជ្រួចផ្លោងពីរដើមផងដែរ ដោយនាយករដ្ឋមន្ត្រី ហ្វ៊ុយមីអូ គីស៊ីដា បានប្រាប់អ្នកយកព័ត៌មានថា ការបាញ់ផ្លោងនៅមួយរយៈពេលចុងក្រោយនេះ«មិនអាចទទួលយកបាន។សូម្បីតែក្នុងរយៈពេលដ៏ខ្លីចាប់តាំងពីចុងខែកញ្ញា នេះជាលើកទីប្រាំមួយហើយ។វាមិនអាចទទួលយកបានដាច់ខាត»។
ការបាញ់សាកល្បងរបស់កូរ៉េខាងជើងកាលពីថ្ងៃអង្គារដែលមន្ត្រីនិងអ្នកវិភាគថាជាកាំជ្រួចHwasong-12ដែលធ្វើដំណើរឆ្ងាយបំផុតក្នុងចំណោមការសាកល្បងកាំជ្រួចរបស់កូរ៉េខាងជើងនាពេលកន្លងមក នាំអោយសហរដ្ឋអាម៉េរិកកោះប្រជុំក្រុមប្រឹក្សាសន្តិសុខអង្គការសហប្រជាជាតិជាបន្ទាន់។តែសម្ពន្ធមិត្តរបស់កូរ៉េខាងជើង គឺចិនបានបន្ទោសរដ្ឋាភិបាលទីក្រុងវ៉ាស៊ីនតោនថាជាដើមចមដែលនាំអោយរដ្ឋាភិបាលទីក្រុងព្យុងយ៉ាងបាញ់កាំជ្រួចបន្តបន្ទាប់នេះ។
ឯកអគ្គរដ្ឋទូតចិនប្រចាំនៅអង្គការសហប្រជាជាតិលោក ហ្គេង សួង(Geng Shuang)បាននិយាយថា ការបាញ់បង្ហោះរបស់កូរ៉េខាងជើងកាលពីពេលថ្មីៗ«មានជាប់ពាក់ព័ន្ធជិតដិតណាស់»នឹងសមយុទ្ធយោធារវាងអាម៉េរិកនិងសម្ពន្ធមិត្ត។ហ្គេង បានប្រាប់ក្រុមប្រឹក្សាសន្តិសុខថា«អាម៉េរិកបំពុលបរិយាកាសសន្តិសុខតំបន់»។
សូមបញ្ជាក់ថា កូរ៉េខាងត្បូង ជប៉ុននិងអាម៉េរិកបានធ្វើសមយុទ្ធយោធានៅប៉ុន្មានសប្តាហ៍មកនេះ រួមទាំងសមយុទ្ធជើងទឹកដ៏ធំនិងលំហាត់ប្រឆាំងនាវាមុជទឹកផង។
អាម៉េរិកបាននិយាយកាលពីថ្ងៃពុធថា ខ្លួនបញ្ជូននាវាUSS Ronald Reaganទៅកាន់ឧបទ្វីបកូរ៉េសំរាប់ដំណើរមកកាន់តំបន់នេះជាលើកទីពីរក្នុងរយៈពេលមិនដល់មួយខែផង។
នៅថ្ងៃព្រហស្បតិ៍នេះដែរ ក្រសួងការបរទេសកូរ៉េខាងជើងបានចេញសេចក្តីថ្លែងការណ៍រិះគន់កិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិ និងចោទប្រកាន់អាម៉េរិកថា«បង្កការគំរាមស្ថិរភាពនៃសភាពការណ៍នៅលើឧបទ្វីបកូរ៉េ»ជាមួយនឹងការបញ្ជូននាវាដឹកយន្តហោះមកកាន់តំបន់៕
