Views: 11
ប្រែសម្រួលៈបំណង(ស្ត្រេតថែមស៍)៖ កូរ៉េខាងជើងនៅថ្ងៃពុធនេះបានបាញ់កាំជ្រួចផ្លោងចម្ងាយខ្លីពីរគ្រាប់ចេញពីឆ្នេរខាងកើតរបស់ខ្លួន នៅពេលតែមួយថ្ងៃមុនការអញ្ជើញមកដល់កូរ៉េខាងត្បូងពីសំណាក់អនុប្រធានាធិបតីអាម៉េរិកលោកស្រី កាម៉ាឡា ហារីស។
ការបាញ់បង្ហោះនេះបានកើតឡើងពីរថ្ងៃក្រោយពីកងកម្លាំងកូរ៉េខាងត្បូងនិងអាម៉េរិកធ្វើសមយុទ្ធយោធារួមគ្នានៅក្នុងដែនទឹកនៅឯនាយឆ្នេរខាងកើតរបស់កូរ៉េខាងត្បូងដែលមានការចូលរួមពីនាវាដឹកយន្តហោះមួយផង។
កាលពីថ្ងៃអាទិត្យ កូរ៉េខាងជើងបានបាញ់កាំជ្រួចផ្លោងមួយឆ្ពោះទៅកាន់សមុទ្រនៅឯនាយឆ្នេរខាងកើតរបស់ខ្លួន។
នាយសេនាធិការកងទ័ពចំរុះកូរ៉េខាងត្បូង បាននិយាយថា កាំជ្រួចកាលពីថ្ងៃពុធត្រូវបានបាញ់ចេញពីតំបន់ស៊ូណាន់(Sunan)នៃរដ្ឋធានីព្យុងយ៉ាង នៅចន្លោះម៉ោង៦:១០ និង៦:២០ ល្ងាច។ពួកវាបានហោះចម្ងាយប្រមាណ៣៦០គីឡូម៉ែត្រនៅកំពស់៣០គីឡូម៉ែត្រ។
សេចក្តីថ្លែងការណ៍មួយរបស់នាយសេនាធិការកងទ័ពកូរ៉េខាងត្បូងបាននិយាយថា « ការបង្ករឿងរបស់កូរ៉េខាងជើងនឹងកាន់តែពង្រឹងការតាំងចិត្តរបស់កូរ៉េខាងត្បូងនិងសមត្ថភាពឆ្លើយតប ហើយវាក៏កាន់តែធ្វើអោយកូរ៉េខាងជើងឯកោពីសហគមន៍អន្តរជាតិ»។
កងឆ្មាំសមុទ្រជប៉ុនក៏បានរាយការណ៍អំពីការសាកល្បងកាំជ្រួចមួយ ដែលរដ្ឋមន្ត្រីការពារជាតិនៃប្រទេសនេះបានថ្កោលទោសនិងចាត់ទុកថាជា«ទង្វើមិនអាចទទួលយកបាន»។
ក្រោយធ្វើទស្សនកិច្ចជប៉ុន អនុប្រធានាធិបតីអាម៉េរិកត្រូវទៅដល់រដ្ឋធានីសេអ៊ូលនិងទៅទស្សនាតំបន់គ្មានកងទ័ពនៅព្រំដែនកូរ៉េទាំងពីរនៅថ្ងៃព្រហស្បតិ៍។
សារព័ត៌មានរដ្ឋកូរ៉េខាងជើងមិនបាននិយាយអំពីការបាញ់កាំជ្រួចនេះទេ តែមេដឹកនាំរបស់ខ្លួនលោក គីម ជុងអ៊ុន ធ្លាប់បាននិយាយថាកូរ៉េខាងជើងអភិវឌ្ឍសព្វាវុធនុយក្លេអ៊ែរនិងកាំជ្រួចក្នុងគោលបំណងការពារខ្លួនទល់នឹងការគំរាមពីអាម៉េរិក៕
បុរសម្នាក់ឈរមើលអេក្រងទូរទស្សន៍នៅស្ថានីយរថភ្លើងមួយបង្ហាញការផ្សាយព័ត៌មានស្តីពីកូរ៉េខាងជើងបាញ់កាំជ្រួចកាលពីថ្ងៃ២៨កញ្ញា
