Views: 2
ប្រែសម្រួលៈបំណង(ស្ត្រេតថែមស៍)៖ កូរ៉េខាងជើងកាលពីព្រឹកថ្ងៃអង្គារនេះបានបាញ់កាំជ្រួចផ្លោងមួយរំលងជប៉ុនជាលើកដំបូងក្នុងរយៈពេលប្រាំឆ្នាំមកនេះ ដោយបណ្តាលអោយអ្នកស្រុកនិងមន្ត្រីជប៉ុនរត់រកកន្លែងជ្រកនៅពេលដំណើរការរថភ្លើងត្រូវបានផ្អាកជាបណ្តោះអាសន្ននៅជប៉ុនខាងជើង។
នាយសេនាធិការកងទ័ពចំរុះកូរ៉េខាងត្បូង និងកងឆ្មាំសមុទ្រជប៉ុនបានរាយការណ៍អំពីការសាកល្បងកាំជ្រួចនេះ ដោយវាត្រូវបានបាញ់ចេញពីឆ្នេរខាងកើតកូរ៉េខាងជើង។
នាយខុទ្ទកាល័យនិងជាអ្នកនាំពាក្យរដ្ឋាភិបាលជប៉ុនលោក ហ៊ីរ៉ូកាហ្ស៊ុយ ម៉ាតស៊ូណូ (កណ្តាល)រត់ពេលដល់ការិយាល័យនាយករដ្ឋមន្ត្រីកាលពីព្រឹកថ្ងៃអង្គារ ទី៤ តុលា
(រូបឯកសារ)ទូរទស្សន៍កូរ៉េខាងត្បូងផ្សាយអំពីការសាកល្បងកាំជ្រួចរបស់កូរ៉េខាងជើងកាលពីថ្ងៃ២៨កញ្ញា ២០២២
រដ្ឋាភិបាលជប៉ុនបានព្រមានអោយពលរដ្ឋខ្លួនរកកន្លែងការពារខ្លួន នៅពេលកាំជ្រួចកូរ៉េខាងជើងទំនងជាហោះលើជប៉ុនមុនធ្លាក់ចូលក្នុងមហាសមុទ្រប៉ាស៊ីហ្វិក។វាបាននិយាយថា ជប៉ុនមិនបានប្រើវិធានការអ្វីមួយដើម្បីបំផ្លាញកាំជ្រួចដែលហោះកាត់ទឹកដីជប៉ុនជាលើកដំបូងចេញពីកូរ៉េខាងជើងចាប់តាំងពីឆ្នាំ២០១៧មក។
នៅម៉ោងប្រមាណ៧និង២៩នាទីព្រឹក ប្រព័ន្ធព្រមានជាមុនអំពីកាំជ្រួចបានអោយសញ្ញា ដោយកញ្ចក់ទូរទស្សន៍ជាតិ NHKប្រែជាផ្សាយសារព្រមានប្រុងជើងការ។វាផ្សាយថា«កូរ៉េខាងជើងទំនងជាបានបាញ់កាំជ្រួចមួយ។សូមភៀសខ្លួនចូលអាគារឬជម្រកក្រោមដី»។
NHK បាននិយាយថា ការព្រមាននេះសំរាប់តំបន់ខាងជើងចំនួនពីររបស់ជប៉ុន កន្លែងដែលគេរំពឹងថាកាំជ្រួចនឹងឆ្លងកាត់។
ការសាកល្បងនេះនាំអោយក្រុមហ៊ុនផ្លូវដែកខាងកើតជប៉ុនផ្អាកប្រតិបត្តិការផ្លូវដែកនៅតំបន់ខាងជើង។
អ្នកនាំពាក្យរដ្ឋាភិបាលជប៉ុនលោក ហ៊ីរ៉ូកាហ្ស៊ុយ ម៉ាតស៊ូណូ(Hirokazu Matsuno)បាននិយាយក្នុងសន្និសីទកាសែតមួយថា «អំពើរបស់កូរ៉េខាងជើងជាបន្តបន្ទាប់ រួមមានការបាញ់សាកល្បងកាំជ្រួចផ្លោង គំរាមសន្តិភាពនិងស្ថិរភាពរបស់ជប៉ុន តំបន់និងសហគមន៍អន្តរជាតិ ហើយបង្កការប្រឈមធ្ងន់ធ្ងរមួយចំពោះសហគមន៍អន្តរជាតិទាំងមូល រួមទាំងជប៉ុន»។
ថ្លែងទៅកាន់អ្នកយកព័ត៌មាននៅពេលក្រោយមក នាយករដ្ឋមន្ត្រីជប៉ុន បានហៅអំពើរបស់កូរ៉េខាងជើងថា«សាហាវ»និងថារដ្ឋាភិបាលរបស់លោកនឹងបន្តប្រមូលនិងវិភាគព័ត៌មានអំពីការបាញ់នេះ។
ចំណែកនាយសេនាធិការកងទ័ពចំរុះកូរ៉េខាងត្បូង បាននិយាយថាវាទំនងជាកាំជ្រួចផ្លោងចម្ងាយមធ្យមមួយ ដែលត្រូវបានបាញ់ចេញពីខេត្តចាហ្កាង(Jagang)របស់កូរ៉េខាងជើង។តែទូរទស្សន៍Asahiរបស់ជប៉ុនដែលបាននិយាយយោងតាមប្រភពរដ្ឋាភិបាលមិនបញ្ចេញឈ្មោះ បាននិយាយថាកូរ៉េខាងជើងអាចបានបាញ់កាំជ្រួចផ្លោងឆ្លងទ្វីបមួយនិងវាបានធ្លាក់ចូលក្នុងសមុទ្រក្រោយហោះបានប្រមាណ៣.០០០គីឡូម៉ែត្រពីជប៉ុន។
វាជាការបាញ់បង្ហោះកាំជ្រួចលើកទីប្រាំក្នុងរយៈពេលដប់ថ្ងៃមកនេះ ចំពេលអាម៉េរិក កូរ៉េខាងត្បូង រួមទាំងជប៉ុនបញ្ចេញសាច់ដុំយោធា ដែលរួមមានការធ្វើសមយុទ្ធប្រឆាំងនាវាមុជទឹកត្រីភាគី ក្នុងគោលបំណងត្រៀមទប់ទល់នឹងកូរ៉េខាងជើងផង។លំហាត់យោធាដូច្នេះវាកាន់តែធ្វើអោយរដ្ឋាភិបាលទីក្រុងព្យុងយ៉ាងខឹង ដោយសារតែខ្លួនចាត់ទុកវាជាការហាត់សមសំរាប់ចូលឈ្លានពានកូរ៉េខាងជើង៕
