Views: 10
ប្រែសម្រួលៈបំណង(ដេល្លីម៉េល)៖ដោយអំពាវនាវនាវអោយរដ្ឋាភិបាលទីក្រុងប៉េកាំងជួយទាក់ទាញរដ្ឋាភិបាលទីក្រុងព្យុងយ៉ាងកុំអោយបន្តអភិវឌ្ឍកម្មវិធីកាំជ្រួចនិងនុយក្លេអ៊ែរ ប្រធានាធិបតីកូរ៉េខាងត្បូងលោក យូន ស៊ុកយ៉ូល បាននិយាយ «ចិនមិនត្រឹមតែមានការទទួលខុសត្រូវតែមានសមត្ថភាពប្រើឥទ្ធិពលរបស់ខ្លួនលើឥរិយាបទរបស់កូរ៉េខាងជើង»។
លោក យូន ស៊ុកយ៉ូល បានបញ្ជាក់ថា កូរ៉េខាងត្បូងនិងដៃគូនឹងឆ្លើយតបជាមួយនឹង«អ្វីដែលមិនធ្លាប់មានពីមុន»បើកូរ៉េខាងជើបន្តសាកល្បងនុយក្លេអ៊ែរ
ក្នុងកិច្ចសម្ភាសន៍មួយជាមួយទីភ្នាក់ងារសារព័ត៌មានរ៉យទ័រកាលពីថ្ងៃចន្ទ លោកយូនបានទទូចសុំអោយចិន ដែលជាសម្ពន្ធមិត្តជិតដិតរបស់រដ្ឋាភិបាលទីក្រុងព្យុងយ៉ាង បំពេញការទទួលខុសត្រូវរបស់ខ្លួនក្នុងនាមជាសមាជិកក្រុមប្រឹក្សាសន្តិសុខដែលមានសិទ្ធវ៉េតូមួយ និងថា«ការមិនបានបំពេញការទទួលខុសត្រូវបែបនេះនឹងនាំដល់ការហូរចូលទ្រព្យយោធាមកកាន់តំបន់នេះ»។
លោកបានបន្ថែមថា«អ្វីដែលប្រាកដគឺថា ចិនមានសមត្ថភាពប្រើឥទ្ធិពលលើកូរ៉េខាងជើង និងចិនមានការទទួលខុសត្រូវក្នុងការចូលរួមដំណើរការនេះ។វាអាស្រ័យលើរដ្ឋាភិបាលទីក្រុងប៉េកាំងសំរេចចិត្តថាតើខ្លួននឹងប្រើឥទ្ធិពលនេះដើម្បីសន្តិភាពនិងស្ថិរភាពដែរឬអត់»។
លោកយូនកានកត់សំគាល់ថា« អំពើរបស់កូរ៉េខាងជើងកំពុងនាំទៅកាន់ការបង្កើនចំណាយយោធានៅក្នុងប្រទេសមួយចំនួនជុំវិញតំបន់ រួមមានជប៉ុននិងការបញ្ជូនយន្តហោះនិងនាវាចម្បាំងអាម៉េរិកបន្ថែម។វាជាផលប្រយោជន៍ចិនទេក្នុងការខិតខំទាក់ទាញអោយកូរ៉េខាងជើងរំសាយចោលនុយក្លេអ៊ែរ»។
សូមបញ្ជាក់ថាបន្ទាប់ពីធ្វើការសាកល្បងកាំជ្រួចក្នុងល្បឿនញឹកញាប់បំផុតនៅឆ្នាំ២០២២ មេដឹកនាំកូរ៉េខាងជើងលោកគីម ជុងអ៊ុននៅសប្តាហ៍នេះបាននិយាយថាប្រទេសលោកមានបំណងប្រែក្លាយខ្លួនទៅជាមហាអំណាចនុយក្លេអ៊ែរខ្លាំងបំផុតនៅលើលោក នៅពេលមន្ត្រីកូរ៉េខាងត្បូងនិងអាម៉េរិកនិយាយថា រដ្ឋាភិបាលទីក្រុងព្យុងយ៉ាងអាចត្រៀមសាកល្បងគ្រាប់បែកនុយក្លេអ៊ែរលើកទីប្រាំពីររបស់ខ្លួននិងជាលើកដំបូងចាប់តាំងពីឆ្នាំ២០១៧។
លោក យូន ស៊ុកយ៉ូល ជួបសមភាគីចិននៅក្រៅជំនួបកំពូលនៅកោះបាលីកាលពីពេលថ្មីៗ
ទាំងអាម៉េរិកនិងកូរ៉េខាងត្បូង បានយល់ស្របគ្នាថានឹងបញ្ជូន«ទ្រព្យយុទ្ធសាស្ត្រ»អាម៉េរិកបន្ថែមទៀត ដូចជានាវាដឹកយន្តហោះនិងយន្តហោះទម្លាក់គ្រាប់ចម្ងាយឆ្ងាយមកកាន់តំបន់ តែលោកយូនបាននិយាយថា លោកមិនរំពឹងថានឹងមានការកែប្រែចំនួនទាហានអាម៉េរិកចំនួន២៨.៥០០នាក់ដែលកំពុងឈរជើងនៅកូរ៉េខាងត្បូងនោះទេ។
នៅពេលត្រូវបានសួរថាតើកូរ៉េខាងត្បូងនិងដៃគូនឹងធ្វើអ្វីក្នុងករណីដែលកូរ៉េខាងជើងសាកល្បងនុយក្លេអ៊ែរជាថ្មី លោកយូនបានតបថា«ចម្លើយតបមួយដែលមិនធ្លាប់មានពីមុន។វាមិនឆ្លាតទាល់តែសោះសំរាប់កូរ៉េខាងជើងធ្វើការសាកល្បងនុយក្លេអ៊ែរលើកទីប្រាំពីររបស់ខ្លួន។យើងត្រូវតែឆ្លើយតបព្រមគ្នានិងសហការគ្នា»៕
