ព្យុងយ៉ាង ៖ មេដឹកនាំកូរ៉េខាងជើង លោក គីម ជុងអ៊ុន បានលើកឡើងថា គោលដៅចុងក្រោយរបស់កូរ៉េខាងជើង គឺដើម្បីទទួលបាននូវកម្លាំងនុយក្លេអ៊ែរដ៏មានឥទ្ធិពលបំផុតរបស់ពិភពលោក។ ខណៈលោកបានដំឡើងឋានន្តរសក្តិមន្ត្រីយោធារាប់សិបនាក់ ដែលជាប់ពាក់ព័ន្ធនឹងការបាញ់បង្ហោះមីស៊ីលផ្លោងធំបំផុតជាប្រវត្តិសាស្ត្ររបស់ខ្លួន កាលពីពេលថ្មីៗកន្លងទៅ។ នេះបើយោងតាមប្រភពពីទីភ្នាក់ងារសារព័ត៌មាន Reuters ចេញផ្សាយនៅថ្ងៃទី២៧ ខែវិច្ឆិកា ឆ្នាំ២០២២។ គួររំលឹកថា កូនស្រីរបស់មេដឹកនាំកូរ៉េខាងជើងបង្ហាញខ្លួនជាសាធារណៈលើកដំបូង
ការប្រកាសនេះធ្វើឡើង បន្ទាប់ពីលោក គីម បានត្រួតពិនិត្យដោយផ្ទាល់ ការសាកល្បងកាំជ្រួចមីស៊ីលឆ្លងទ្វីប Hwasong-17 ថ្មី ហើយបានសន្យាថា នឹងទប់ទល់នឹងការគំរា.មកំហែងពីសំណាក់សហរដ្ឋអាមេរិកជាមួយនឹងអាវុធនុយក្លេអ៊ែរ ដែលបានបង្ហាញ កាលពីថ្ងៃទី១៨ ខែវិច្ឆិកា កន្លងទៅ។
ការកសាងកម្លាំងនុយក្លេអ៊ែរ គឺដើម្បីការពារសេចក្តីថ្លៃថ្នូរ និងអធិបតេយ្យភាពរបស់រដ្ឋ និងប្រជាជនកូរ៉េខាងជើង ប្រកបដោយទំនុកចិត្ត ហើយគោលដៅចុងក្រោយរបស់ប្រទេសអាស៊ីខាងកើតមួយនេះ គឺមានកម្លាំងយុទ្ធសាស្ត្រដ៏មានឥទ្ធិពលបំផុតរបស់ពិភពលោក ដែលជាកម្លាំងដាច់ខាតមិនធ្លាប់មានពីមុនមកក្នុងប្រវត្តិសាស្ត្ររបស់ខ្លួន។ នេះបើតាមការលើកឡើងរបស់លោក Kim នៅក្នុងពិធីដំឡើងឋានន្តរសក្តិមន្ត្រីយោធារបស់ខ្លួន។
លោក គីម បានហៅមីស៊ីល Hwasong-17 ថា ជាអាវុធយុទ្ធសាស្ត្រដ៏ខ្លាំងបំផុតរបស់ពិភពលោក ហើយក៏ដូចជា ដើម្បីបង្ហាញពីការតាំងចិត្ត និងសមត្ថភាពរបស់កូរ៉េខាងជើង ក្នុងការកសាងកងទ័ពដ៏ខ្លាំងបំផុតរបស់ពិភពលោក។
ទន្ទឹមជាមួយគ្នានោះ លោក គីម បាននិយាយដោយមិនបានបញ្ជាក់លម្អិតថា អ្នកវិទ្យាសាស្ត្រកូរ៉េខាងជើងបានធ្វើការលោតផ្លោះដ៏អស្ចារ្យបំផុតមួយ ដើម្បីឆ្ពោះទៅមុខក្នុងការអភិវឌ្ឍន៍បច្ចេកវិទ្យានៃការដំឡើងក្បាលគ្រាប់នុយក្លេអ៊ែរនៅលើមីស៊ីលផ្លោង»។
នៅក្នុងពេលវេលានៃការបើកទំព័រប្រវត្តិសាស្ត្ររបស់កូរ៉េខាងជើង គណៈកម្មាធិការអចិន្ត្រៃយ៍នៃសភាប្រជាជនកំពូលដ៏មានឥទ្ធិពលកូរ៉េខាងជើង បានផ្តល់ពានរង្វាន់សម្រាប់មីស៊ីល Hwasong-17 ជាមួយនឹងចំណងជើង «វីរៈបុរសកូរ៉េខាងជើង និងមេដាយផ្កាយមាស រួមនិងសណ្តាប់ធ្នាប់នៃទង់ជាតិថ្នាក់ទី១» ថែមទៀតផង៕
