Views: 1
ប្រែសម្រួល : កញ្ញាដាលីស (ដេល្លីម៉េល) ៖ លោកអេឡុន ម៉ាសបានបញ្ជាក់ថាគាត់គ្រាន់តែនិយាយលេងសើចទេបន្ទាប់ពីបានប្រកាសនៅលើ Twitter ថាគាត់នឹងទិញក្លិបបិសាចក្រហម Manchester United។
សហគ្រិនមហាសេដ្ឋីបច្ចេកវិជ្ជារូបនេះបានបង្ហាញការទិញក្លិបបាល់ទាត់នេះនៅក្នុង Tweetខ្លីមួយកាលពីថ្ងៃអង្គារទី១៦សីហា ប៉ុន្តែក្រោយមកបានឆ្លើយតបទៅនឹងការបញ្ចេញមតិមួយដែលសួរថាតើគាត់គិតចង់ទិញមែនទែនឬយ៉ាងណា ដោយនិយាយថាវាជា “ការលេងសើចក្នុង Twitter ជាយូរមកហើយ” និងមិនមែនជាការពិតទេ។
លោកម៉ាសអាយុ ៥១ ឆ្នាំបានបង្ហោះសារទៅកាន់អ្នកគាំទ្រ ១០៣ លាននាក់របស់គាត់ថា “ដើម្បីឱ្យជាក់ច្បាស់ ខ្ញុំគាំទ្រពាក់កណ្តាលខាងឆ្វេងនៃគណបក្សសាធារណរដ្ឋនិងពាក់កណ្តាលខាងស្តាំនៃគណបក្សប្រជាធិបតេយ្យ!” ហើយនៅក្នុង Tweet បន្តបន្ទាប់មួយបានបង្ហោះថា “ខ្ញុំក៏នឹងទិញក្លិប Manchester United ដែរ សូមស្វាគមន៍”។
ក្នុងការឆ្លើយតបទៅនឹងការបញ្ចេញមតិមួយ គាត់បានសរសេរថា “ទេ នេះគ្រាន់តែជាកំប្លែងសើចជាយូរមកហើយនៅលើ Twitter។ ខ្ញុំមិនទិញក្រុមកីឡាទេ”។
សារបង្ហោះដំបូងនោះបានទទួលការចុចចែករំលែក (Retweet) ជិត ៤០.០០០ ដង និងការចូលចិត្តជាង ២០០.០០០ ក្នុងរយៈពេលតែប៉ុន្មានម៉ោង។
រឿងនេះកើតឡើងបន្ទាប់ពីម្ចាស់ក្រុមហ៊ុន Tesla រូបនេះកំពុងមានក្តីក្តាំជាមួយក្រុមហ៊ុន Twitter ជុំវិញការដកខ្លួនចេញពីការទិញក្រុមហ៊ុនបណ្តាញសង្គមនេះក្នុងតម្លៃ ៤៤ ពាន់លានដុល្លារ។
កាលពីសប្តាហ៍មុន លោកម៉ាសបានលក់ហ៊ុន ៥,៨ ពាន់លានដុល្លារក្នុងក្រុមហ៊ុន Tesla នៅមុនការតស៊ូក្តី ដែលគ្រោងធ្វើឡើងនៅខែតុលា។
គួរបញ្ជាក់ដែរថា ក្លិបបិសាចក្រហម Man U ត្រូវបានកាន់កាប់ដោយក្រុមគ្រួសារត្រកូលក្លេសសឺ (Glazer) ដែលមានមូលដ្ឋាននៅរដ្ឋផ្លរីដាតាំងពីឆ្នាំ ២០០៥។ គ្រួសារនេះតែងតែរងការរិះគន់ពីសំណាក់អ្នកគាំទ្រចំពោះការជំពាក់បំណុល ការចែកភាគលាភគ្នាមិនគិតពីក្លិប និងការគ្រប់គ្រងមិនត្រឹមត្រូវ ក្រោយពួកគេកាន់កាប់ក្លិប៕
លោកម៉ាសមិនទិញ Man U ទេ