Views: 1
ដោយៈមុនីរ័ត្ន/ភ្នំពេញៈ លោកញឹក ប៊ុនឆៃ ប្រធានគណបក្សខ្មែររួបរួមជាតិ អមដំណើរដោយលោក សុខ វិសាល អគ្គលេខាធិការ លោក មូល ឈឿន អគ្គលេខាធិការរង លោក ម៉ោល គឹមម៉ន អគ្គលេខាធិការរង លោក ទិប ទាវ អគ្គលេខាធិការរង បានអញ្ជើញជាអធិបតីក្នុងពិធីសំណេះសំណាលទទួលស្វាគមន៍ ថ្នាក់ដឹកនាំដែលជាប្រធាន អនុប្រធាន បក្សខេត្ត ស្រុក ក្រុង ទូទាំងខេត្ត កំពង់ធំ របស់គណបក្សខ្មែរស្រឡាញ់ជាតិ មកចូលរួមជីវភាពនយោបាយ ជាមួយគណបក្សខ្មែររួបរួមជាតិ នៅថ្ងៃទី០៧ ខែសីហា ឆ្នាំ២០២២ ។
ថ្នាក់ដឹកនាំថ្នាក់ដែលជាប្រធាន អនុប្រធាន បក្សខេត្ត ស្រុក ក្រុង ខេត្ត របស់គណបក្សខ្មែរស្រឡាញ់ជាតិ ដែលមកចូលរួមជីវភាពនយោបាយជាមួយគណបក្សខ្មែររួបរួមជាតិ មានដូចជា នៅខេត្តសៀមរាប ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ធំ និងតាមបណ្តាខេត្តមួយចំនួនទៀត។
សូមជម្រាបថា បន្ទាប់ពី ប្រធាន អនុប្រធាន រួមទាំង សមាជិក គណៈកម្មាធិការ អចិន្ត្រៃយ៍ សរុប ៩ រូប របស់ គណបក្សខ្មែរស្រឡាញ់ជាតិ បានប្រកាសរំលាយគណបក្សរបស់ខ្លួន ចាប់ពីថ្ងៃទី២៩ ខែកក្កដា ឆ្នាំ ២០២២ តទៅ គឺ ថ្នាក់ដឹកនាំ គណបក្សខ្មែរស្រឡាញ់ជាតិ នៅតាមបណ្តាខេត្តមួយចំនួនបានមកចូលរួម ជីវភាពនយោបាយ ជាមួយគណបក្សខ្មែរួបរួមជាតិជាបន្តបន្ទាប់ ។
លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានប្រាប់រស្មីកម្ពុជាឱ្យដឹងថាៈ ថ្នាក់ដឹកនាំ គណបក្សខ្មែរស្រឡាញ់ជាតិមកចូលរួមជាមួយគណបក្សខ្មែររួបរួមជាតិ មានដូចជា សមាជិក គណៈកម្មាធិការ នាយក និង ជាប្រធាន គណបក្សខេត្តសៀមរាប ខេត្តបាត់ដំបង ខេត្តបន្ទាយមានជ័យ ខេត្តកំពង់ឆ្នាំង និង អនុប្រធានគណបក្សខេត្តព្រះសីហនុ , ប្រធានបក្សក្រុងសិរីសោភ័ណ , ប្រធានបក្ស ស្រុកអូរជ្រៅ រួមទាំងសមាជិកអចិន្ត្រៃយ៍ ខេត្តកំពង់ធំ ខេត្តកំពង់ចាម ខេត្តបន្ទាយមានជ័យ ខេត្តសៀមរាប និង ខេត្តកំពង់ឆ្នាំង រួមទាំង មន្ត្រីជាន់ខ្ពស់ មួយចំនួនទៀត ។
ចំណែក ថ្នាក់ដឹកនាំ គណបក្សខ្មែរស្រឡាញ់ជាតិ បាន អះអាងថាៈ ការ មក ចូលរួម ជាមួយ គណបក្ស ខ្មែរ រួបរួម ជាតិ គឺ ដោយសារ ពួកគាត់ អស់ជំនឿ លើប្រធាន និង អនុប្រធាន គណបក្សខ្មែរស្រឡាញ់ ជាតិ ដែលបានប្រកាសរំលាយគណបក្ស កាលពីថ្ងៃទី២៩ ខែកក្កដា ឆ្នាំ២០២២ ហើយពួកគាត់មក ចូលរួមជាមួយ គណបក្សខ្មែររួបរួមជាតិ គឺ ដោយស្ម័គ្រចិត្ត គ្មានការបង្ខិតបង្ខំនោះទេ និង ដោយសារ ឃើញ គោលនយោបាយរបស់គណបក្សខ្មែររួបរួមជាតិល្អ៕
