Views: 8
ដោយៈ មុនីរ័ត្ន / ភ្នំពេញៈ លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានបញ្ជាក់អំពី ការដែលមិនរួបរួម ជាមួយគណបក្សប្រឆាំង របស់ទណ្ឌិត សម រង្ស៊ី គឺដោយសារតែសកម្មភាព របស់ទណ្ឌិត សម រង្ស៊ី និងថ្នាក់ដឹកនាំរបស់បក្សប្រឆាំង បានធ្វើឲ្យសមាជិកខ្លួនស្លាប់ ជាប់ពន្ធនាគារ រត់ចោលស្រុក ព្រាត់ប្រាស់គ្រួសារ រស់នៅដោយវេទនា និងជាពិសេស បានបំផ្លាញជាតិ ដោយឲ្យអន្តរជាតិផ្តាច់ជំនួយ និងគាបសង្កត់រដ្ឋាភិបាលកម្ពុជា ។ សកម្មភាពរបស់លោក សម រង្ស៊ី កន្លងមក និងរហូតមកដល់បច្ចុប្បន្ននេះ គឺមិនមែនធ្វើសកម្មភាព ដើម្បីផលប្រយោជន៍ប្រទេសកម្ពុជា និងប្រជាជនកម្ពុជាទេ។
ការបញ្ជាក់របស់លោក ញឹក ប៊ុនឆៃ បានធ្វើឡើង នៅក្នុងពិធីជួបស្វាគមន៍ និងទទួលអតីត ថ្នាក់ដឹកនាំ គណបក្សខ្មែរស្រឡាញ់ជាតិ ដែលភាគច្រើន គឺជាអតីតសមាជិក នៃអតីតគណបក្សសង្គ្រោះជាតិ នៅតាមបណ្តារាជធានី ខេត្ត ដែលបានចោទសួរ អំពីការមិនបង្រួបបង្រួម ជាមួយគណបក្សប្រឆាំង។
លោក ញឹក ប៊ុនឆៃ បានបញ្ជាក់យ៉ាងច្បាស់ ប្រាប់ទៅអតីតថ្នាក់ដឹកនាំគណបក្ស ខ្មែរស្រឡាញ់ជាតិថាៈ “កន្លងមកក្តី និងពេលនេះទៅមុខក្តី ខ្ញុំមិនរួបរួមជាមួយលោក សម រង្ស៊ី និងគណបក្សប្រឆាំងទេ។ ដោយមូលហេតុ គឺគោលនយោបាយរបស់លោកសម រង្ស៊ី និងគណបក្សប្រឆាំង លំអៀងផ្តាច់មុខ ទៅរកមហាអំណាចលោកខាងលិខ លោកសេរី ស្តាំនិយមផ្តាច់មុខ ហើយយកមហាអំណាច ឆ្វេងនិយមជាសត្រូវ។ នយោបាយនឹង ប្រទេសកម្ពុជា ធ្លាប់បានឆ្លងកាត់ហើយ នៅពេលដែលក្រុមលោកសេនាប្រមុខ លន់ នល់ ធ្វើរដ្ឋប្រហារ ថ្ងៃទី១៨ មីនា ១៩៧០ ទម្លាក់សម្តេចព្រះនរោត្តម សីហនុលុបចោល របបរាជានិយម ហើយបង្កើតរបបសាធារណរដ្ឋខ្មែរ ដែលមានមហាអំណាចអាមេរិក គាំទ្រទាំងស្រុង ហើយយកចិត្តជាសត្រូវ គឺប្រទេសកម្ពុជា អត់បានសុខទេ។ នយោបាយនេះហើយ ដែលខ្ញុំអត់ពេញចិត្ត និងអត់គាំទ្របានទេ ព្រោះនយោបាយនេះ ជានយោបាយដែលធ្វើឲ្យខ្មែរឈានទៅមានសង្គ្រាម ធ្វើឲ្យប្រជាជនខ្មែរស្លាប់ របួស …។ នយោបាយរបស់លោក សម រង្ស៊ី សព្វថ្ងៃនេះ ដូចគ្នានឹងនយោបាយសម័យសាធារណរដ្ឋ ខ្មែរ ឆ្នាំ១៩៧០-១៩៧៥ នោះដែរ។ ខ្ញុំឃើញថា នយោបាយនេះ គឺធ្វើឲ្យខ្មែរយើង អត់បានសុខ ហេតុនេះបានជាខ្ញុំ មិនអាចទៅរួមជាមួយលោក សម រង្ស៊ី បានទេ ។ ចំណែកគោលនយោបាយរបស់ខ្ញុំ គឺកណ្តាលអព្យាក្រឹត្យ ដូចរបបសម័យសង្គមរាស្ត្រនិយម របស់សម្តេចព្រះ នរោត្តម សីហនុ ក្នុងទសវត្សរ៍៦០ ដែលពេលនោះ មានសុខសន្តិភាព ពេញលេញ មានស្ថេរភាព មានការអភិវឌ្ឍប្រទេស រហូតដល់អន្តរជាតិ ទទួលស្គាល់ ប្រទេសកម្ពុជា នៅពេលលនេះថា ជាកោះសន្តិភាពមួយនៅអាស៊ី”។
លោក ញឹក ប៊ុនឆៃ បានបញ្ជាក់ទៅកាន់សមាជិកអតីតគណបក្សប្រឆាំងទៀតថាៈ “នយោបាយរបស់លោក សម រង្ស៊ី គឺនយោបាយមិនមមែនរួបរួមសាមគ្គីគ្នាទេ គឺនយោបាយ មានឯងអត់អញ មានអញអត់ឯង នយោបាយ ទឹកឡើងត្រីស៊ីស្រមោច ទឹកហោចស្រមោចស៊ីត្រី ជានយោបាយយកគ្នាជាសត្រូវ វាខុសពីគោលនយោបាយខ្ញុំ ដែលចង់ឲ្យខ្មែររួបរួមសាមគ្គីគ្នា ហើយគោលនយោបាយ វាខុសគ្នាឆ្ងាយ ដែលមិនអាចយកជាគ្នា។ ដូច្នេះខ្ញុំសូមបញ្ជាក់ឲ្យច្បាស់ថា ពីមុនមកក៏ដូចគ្នាដែរ ហើយពីនេះទៅមុខ ក៏ខ្ញុំអត់ទៅធ្វើការរួមជាមួយលោក សម រង្ស៊ី និងបក្សប្រឆាំងទេ ដោយសារតែគោលនយោបាយ”។
លោកបានអះអាងថាៈ សកម្មភាពរបស់លោកសម រង្ស៊ី កន្លងមក និងរហូតមកដល់ បច្ចុប្បន្ននេះ គឺមិនមែនធ្វើសកម្មភាព ដើម្បីផលប្រយោជន៍ប្រទេសកម្ពុជា និងប្រជាជនកម្ពុជាទេ។ ដូចជាឲ្យសហភាពអឺរ៉ុប គឺឲ្យគេគាបសង្កត់ខាងសេដ្ឋកិច្ច មកលើកម្ពុជា រហូតសហគមន៍អឺរ៉ុប បានកាត់ EBA ២០ ភាគរយ។ ឥឡូវ គាត់កំពុងតែប្រឹងប្រែង ឲ្យសហគមន៍អឺរ៉ុប កាត់ ៨០ ភាគរយទៀត ហើយគាត់ទំនាក់ទំនង ជាមួយសភាអាមេរិកសុំឲ្យអាមេរិកកុំបន្តសុពលភាព ទៅលើកិច្ចព្រមព្រៀង ជាមួយកម្ពុជា ក្នុងការអនុគ្រោះពន្ធ GSP ហើយមកដល់ពេលនេះ គឺអត់ទាន់មានតទេ ដាច់តាំងពីខែធ្នូ ឆ្នាំមុន ហើយនិងសកម្មភាពផ្សេងៗទៀត។ សកម្មភាពរបស់លោក សម រង្ស៊ី ប៉ះពាល់ ដល់ផលប្រយោជន៍ប្រទេសជាតិ ផលប្រយោជន៍ប្រជាជនកម្ពុជា ៕/V
