Views: 9
ប្រែសម្រួល : កញ្ញាដាលីស (ស៊ីនហួ) ៖ ប្រធានាធិបតីចិន លោក ស៊ី ជីនភីង បាននិយាយកាលពីថ្ងៃអង្គារទី២៩វិច្ឆិកាថាចិនត្រៀមខ្លួនជាស្រេចក្នុងការធ្វើការជាមួយរុស្ស៊ីដើម្បីបង្កើតភាពជាដៃគូកាន់តែជិតស្និទ្ធនៅក្នុងកិច្ចសហប្រតិបត្តិការថាមពល។
លោកស៊ីបាននិយាយនៅក្នុងលិខិតអបអរសាទរមួយផ្ញើទៅកាន់វេទិកាធុរកិច្ចថាមពលចិន-រុស្ស៊ីលើកទី៤ថាកិច្ចសហប្រតិបត្តិការថាមពលគឺជាមូលដ្ឋានគ្រឹះដ៏សំខាន់នៃកិច្ចសហប្រតិបត្តិការជាក់ស្តែងរវាងចិននិងរុស្ស៊ី ហើយក៏ជាកម្លាំងវិជ្ជមានសម្រាប់ការរក្សាសន្តិសុខថាមពលពិភពលោកផងដែរ។
ប្រឈមមុខនឹងហានិភ័យនិងបញ្ហាប្រឈមពីខាងក្រៅ ប្រទេសទាំងពីរបានពង្រឹងទំនាក់ទំនងនិងការសម្របសម្រួល និងជំរុញគម្រោងកិច្ចសហប្រតិបត្តិការសំខាន់ៗដែលបានបង្ហាញឱ្យឃើញពីភាពធន់រឹងមាំនៃកិច្ចសហប្រតិបត្តិការថាមពលចិន-រុស្ស៊ី និងការរំពឹងទុកយ៉ាងទូលំទូលាយនៃភាពជាដៃគូសហការយុទ្ធសាស្ត្រគ្រប់ជ្រុងជ្រោយរវាងចិន-រុស្សីក្នុងយុគសម័យថ្មី។
លោកស៊ីក៏បាននិយាយផងដែរថា ភាគីចិនត្រៀមខ្លួនជាស្រេចក្នុងការសហការជាមួយរុស្ស៊ីដើម្បីជំរុញការអភិវឌ្ឍថាមពលស្អាតនិងបៃតងព្រមទាំងការពារសន្តិសុខថាមពលអន្តរជាតិនិងស្ថិរភាពនៃខ្សែសង្វាក់ផ្គត់ផ្គង់ឧស្សាហកម្ម ដោយហេតុនេះបានរួមចំណែកថ្មីដល់ការអភិវឌ្ឍទីផ្សារថាមពលពិភពលោកយូរអង្វែង មានសុខភាពល្អ និងមាននិរន្តរភាព។
កាលពីថ្ងៃអង្គារផងដែរ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានផ្ញើលិខិតអបអរសាទរទៅកាន់វេទិកាអាជីវកម្មថាមពល៕
លោកស៊ីនិងលោកពូទីនជួបគ្នានាពេលកន្លងមក