Views: 7
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃសុក្រទី៣០កញ្ញាបានចោទប្រកាន់លោកខាងលិចថាបានបំផ្លិចបំផ្លាញបំពង់បង្ហូរឧស្ម័នធម្មជាតិដែលសាងសង់ដោយរុស្ស៊ីនៅក្រោមសមុទ្របាល់ទិកទៅកាន់ប្រទេសអាល្លឺម៉ង់ ជាការចោទប្រកាន់មួយត្រូវបានបដិសេធយ៉ាងដាច់អហង្ការដោយសហរដ្ឋអាម៉េរិកនិងសម្ពន្ធមិត្តរបស់ខ្លួន។
បណ្តាប្រទេសនៅតំបន់ន័រឌីក (Nordic) បាននិយាយថា ការផ្ទុះនៅក្រោមសមុទ្រ ដែលបានបំផ្លាញបំពង់បង្ហូរប្រេងនៅសប្តាហ៍នេះនិងនាំឱ្យមានការលេចធ្លាយឧស្ម័នមេតានយ៉ាងច្រើន គឺពាក់ព័ន្ធនឹងការផ្ទុះជាច្រើនរយគីឡូក្រាម។
ការប៉ះទង្គិចគ្នារវាងសហរដ្ឋអាម៉េរិកនិងរុស្ស៊ីបានបន្តនៅពេលក្រោយទៀតនៅក្នុងកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិនៅទីក្រុងញូវយ៉កដែលកោះប្រជុំដោយរុស្ស៊ីជុំវិញការវាយប្រហារលើបំពង់បង្ហូរឧស្ម័ន Nord Stream 1 និង 2 និងខណៈដែលអ្នកស្រាវជ្រាវន័រវែសបានបោះពុម្ពផ្សាយផែនទី ដែលព្យាករណ៍ថាបរិមាណឧស្ម័នមេតានយ៉ាងច្រើនដែលធ្លាយចេញពីបំពង់បង្ហូរដែលខូចនឹងធ្វើដំណើរលើតំបន់ដ៏ធំនៃតំបន់ន័រឌីក។
ថ្លែងកាលពីថ្ងៃសុក្រនៅទីក្រុងមូស្គូក្នុងពិធីមួយដើម្បីដាក់បញ្ចូលតំបន់ចំនួនបួនរបស់អ៊ុយក្រែនចូលទៅក្នុងប្រទេសរុស្ស៊ី លោកពូទីនបានអះអាងថា ពួក “Anglo-Saxons”នៅលោកខាងលិចបានប្រែក្លាយពីការដាក់ទណ្ឌកម្មលើរុស្ស៊ីទៅជា “ការវាយប្រហារភេរវកម្ម” ដែលបំផ្លាញបំពង់បង្ហូរ Nord Stream 1 និង 2 នៅក្នុងអ្វីដែលគាត់បានពណ៌នាថាជាការប៉ុនប៉ងមួយដើម្បី”បំផ្លាញហេដ្ឋារចនាសម្ពន្ធថាមពលអឺរ៉ុប”។
លោកបានបន្ថែមថា “អ្នកដែលទទួលផលចំណេញពីវាបានធ្វើវា” ដោយមិនបាននិយាយចំឈ្មោះប្រទេសជាក់លាក់នោះឡើយ។
នៅទីក្រុងវ៉ាស៊ីនតោន ប្រធានាធិបតីអាម៉េរិក លោក ចូ បៃដិន បានច្រានចោលការអះអាងរបស់ពូទីនអំពីបំពង់បង្ហូរប្រេងថាជារឿងភ្លាវណាស់។
លោកបៃដិនបាននិយាយថា “វាជាអំពើបំផ្លិចបំផ្លាញដោយចេតនា។ ហើយឥឡូវនេះរុស្ស៊ីកំពុងបញ្ចេញព័ត៌មានមិនពិតនិងការភូតកុហក។យើងនឹងធ្វើការជាមួយសម្ពន្ធមិត្តរបស់យើងដើម្បីដឹងការពិតអំពីអ្វីដែលបានកើតឡើង” ដោយបន្ថែមថា អ្នកមុជទឹកនឹងត្រូវបញ្ជូនទៅដើម្បីពិនិត្យបំពង់។ “កុំស្តាប់អ្វីដែលពូទីននិយាយ។ អ្វីដែលគាត់និយាយ យើងដឹង គឺមិនពិតទេ”។
ក្រុមមន្ត្រីអាម៉េរិកបាននិយាយថា ការអះអាងរបស់លោកពូទីនកំពុងព្យាយាមបង្វែរការយកចិត្តទុកដាក់អំពីការកាត់យកផ្នែកខ្លះរបស់អ៊ុយក្រែនកាលពីថ្ងៃសុក្រ។
អ្នកនាំពាក្យក្រុមប្រឹក្សាសន្តិសុខជាតិរបស់សេតវិមានលោកស្រី អេឌ្រាន វ៉ាតសុន (Adrienne Watson) បាននិយាយកាលពីថ្ងៃសុក្រថា “យើងនឹងមិនអនុញ្ញាតឱ្យព័ត៌មានមិនពិតរបស់រុស្ស៊ីរំខានយើង ឬពិភពលោកពីការប៉ុនប៉ងក្លែងបន្លំរបស់ខ្លួនក្នុងការកាត់យកទឹកដីអ៊ុយក្រែនដោយតម្លាភាពនោះទេ”៕
បរិមាណឧស្ម័នមេតានយ៉ាងច្រើននឹងធ្វើដំណើរលើតំបន់ដ៏ធំនៃតំបន់ន័រឌីក
