Views: 3
ដោយៈ ប.ខុន / ភ្នំពេញៈ ចាប់ពីថ្ងៃទី១ ដល់ថ្ងៃទី៥ ខែសីហា ខណ្ឌរដ្ឋបាលជលផលព្រៃវែង បានបំផ្លាញចោលលូស្បៃមុង ចំនួន ៧១ មាត់ របាំងស្បៃមុង ប្រវែង ៤.០៥០ ម៉ែត្រ បង្គោលចម្រឹង ចំនួន ១.៥៥០ ដើម ចាក់លែងកូនត្រី ចូលបឹងធម្មជាតិវិញ ចំនួន ៥៨ គីឡូក្រាម និងរក្សាទុកស្បៃមុង ដែលនៅមានគុណភាព ប្រវែង ២០០ ម៉ែត្រ។
លោក អូន ស៊ីណាត នាយខណ្ឌរដ្ឋបាលជលផលព្រៃវែង បានប្រាប់ឱ្យរស្មីកម្ពុជាដឹង នៅថ្ងៃទី៦ ខែសីហា ឆ្នាំ២០២២ថាៈ ចាប់ថ្ងៃទី១ មកដល់ថ្ងៃទី៥ ខែសីហា សង្កាត់ ផ្នែកនៅក្រោមឱវាទខណ្ឌរដ្ឋបាលជលផលព្រៃវែង ក្រៅពីបានចុះពង្រឹងសមត្ថភាពថ្នាក់ដឹកនាំ និងសមាជិកបណ្តុំអាជីវកម្មចិញ្ចឹមត្រី និងបានត្រួតពិនិត្យការនាំចូលផលជលផល តាមច្រកទ្វារព្រំដែន បន្ទាយចក្រី និងច្រកទ្វារព្រំដែន កោះរការ នៅបានចុះត្រួតពិនិត្យ ទប់ស្កាត់ និងបង្ក្រាប បទល្មើសជលផលមួយចំនួន ដែលការងារនេះ បានធ្វើជាប់ជា ប្រចាំរហូតមក។
នាយខណ្ឌរដ្ឋបាលជលផល ខាងលើ បានបញ្ជាក់ នៅក្នុងរបាយការណ៍ថាៈ ចាប់ពីថ្ងៃទី១ ដល់ថ្ងៃទី៥ ខែសីហា ក្រុមការងារ បានចុះត្រួតពិនិត្យ ទប់ស្កាត់ និងបង្ក្រាប បទល្មើសជលផល បានចំនួន ៣ ករណី ដោយបំផ្លាញចោលវត្ថុតាង នៅនឹកន្លែង ដូចជា លូស្បៃមុង ចំនួន ៧១ មាត់ របាំងស្បៃមុង ប្រវែង ៤.០៥០ ម៉ែត្រ បង្គោលចម្រឹងចំនួន ១.៥៥០ ដើម ចាក់លែងកូនត្រី ចូលបឹងធម្មជាតិវិញ ចំនួន ៥៨ គីឡូក្រាម និង រក្សាទុកស្បៃមុង ដែលនៅមានគុណភាព ប្រវែង ២០០ ម៉ែត្រ។
លោក អូន ស៊ីណាត បាននិយាយឱ្យដឹងផងដែរថាៈ តាមរយៈនៃការចុះត្រួតពិនិត្យ ទប់ស្កាត់ និងបង្ក្រាប បទល្មើស ជាបន្តបន្ទាប់ កន្លងទៅនេះ ឃើញថា ស្ថានភាពកូនត្រី ឆ្នាំនេះ មានច្រើន ដោយសារទឹកឡើងចំពេលវេលាត្រីពងកូន និងឡើងមកហើយ ទោះបីជាមិនទាន់ខ្ពស់ តែមិនបានស្រកទាបទៅវិញ ជាសញ្ញាប្រាប់ថា នៅរដូវប្រមូលផល ខាងមុខ ទិន្នផលត្រី នៅក្នុងខេត្តព្រៃវែង អាចនឹងកើនឡើង៕/V
