Views: 2
ប្រែសម្រួលៈបំណង(ស្ត្រេតថែមស៍)៖ ប្រធានាធិបតីបារាំងលោក អេមម៉ានុយអែល ម៉ាក្រុង កាលពីថ្ងៃពុធបានទៅទស្សនាទីស្នាក់ការអង្គការអវកាសអាម៉េរិកហៅថា ណាសា និងបានបញ្ជាក់អំពីសារសំខាន់នៃបទដ្ឋានប្រតិបត្តិក្នុងទីអវកាសនៅពេលលោកចាប់ផ្តើមដំណើរទស្សនកិច្ចមួយមកកាន់សហរដ្ឋអាម៉េរិកដើម្បីពិភាក្សាបញ្ហាមួយចំនួនចាប់ពីសង្គ្រាមនៅអ៊ុយក្រែនរហូតដល់ចិន ជាមួយក្រុមមេដឹកនាំអាម៉េរិក។
ការងារដំបូងក្នុងដំណើរទស្សនកិច្ចនេះគឺការធ្វើដំណើរទៅទីស្នាក់ការណាសាជាមួយអនុប្រធានាធិបតី កាម៉ាឡា ហារីស ដែលបាននិយាយថា មេដឹកនាំទាំងពីរបានពិភាក្សាអំពីកិច្ចសហការអវកាសដើម្បីដោះស្រាយការប្រែប្រួលអាកាសធាតុនិងសន្តិសុខ។
ប្រធានាធិបតីបារាំង លោក ម៉ាក្រុង និងអនុប្រធានាធិបតី កាម៉ាឡា ហារីស នៅទីស្នាក់ការរបស់អង្គការណាសា
បើតាមលោកម៉ាក្រុងអវកាសតំណាងអោយ«កន្លែងជម្លោះថ្មីមួយ»និងវាសំខាន់សំរាប់បារាំងនិងអាម៉េរិកធ្វើកិច្ចសហការគ្នាលើការកំណត់ក្បួនច្បាប់និងបទដ្ឋានដោយសារតែវាតំណាងអោយតំលៃប្រជាធិបតេយ្យរួមនិងការងារវិទ្យាសាស្ត្រជាមួយគ្នា។«យើងមានអ្នកដើរតួឆ្គួតៗនៅក្នុងទីអវកាសផងដែរ ហើយយើងក៏មានរដ្ឋអាក្រក់នៅទីនោះ ព្រមទាំងយើងមានការវាយប្រហារកូនកាត់ថ្មី»។
រំលឹកថា លោកម៉ាក្រុងនិងហារីសបានប្រកាសកិច្ចសហការបារាំង-អាម៉េរិកថ្មីលើវិស័យអវកាសក្នុងអំឡុងពេលលោកស្រីធ្វើទស្សនកិច្ចទីក្រុងប៉ារីសកាលពីមួយឆ្នាំមុន។
បារាំងបានចូលរួមជាមួយអាម៉េរិកនិងប្រទេសជាច្រើនក្នុងការច្រានចោលការសាកល្បងកាំជ្រួចបំផ្លាញផ្កាយរណបបន្ទាប់ពីរុស្ស៊ីសាកល្បងបាញ់កំទេចផ្កាយរណបរបស់ខ្លួនមួយកាលពីឆ្នាំមុនដោយនាំអោយបែកកំទេចផ្កាយក្នុងទីអវកាសនិងបង្កការថ្កោលទោសពីអាម៉េរិកនិងសម្ពន្ធមិត្ត។
លោកម៉ាក្រុងបានទៅដល់ទីក្រុងវ៉ាស៊ីនតោនកាលពីថ្ងៃអង្គារសំរាប់ដំណើរផ្លូវរដ្ឋលើកទីពីររបស់លោកនៅអាម៉េរិកចាប់តាំងពីការចូលកាន់តំណែងនៅឆ្នាំ២០១៧ និងត្រូវរំពឹងថានឹងប្រឈមជាមួយលោកប្រធានាធិបតី ចូ បៃដិនលើបញ្ហាឧបត្ថម្ភថ្មីរបស់រដ្ឋាភិបាលអាម៉េរិកសំរាប់ឧស្សាហកម្មអាម៉េរិក ដែលកំពុងធ្វើអោយក្រុមមេដឹកនាំអឺរ៉ុបមួម៉ៅមិនសប្បាយចិត្តក្រោយពួកគេរងផលអាក្រក់ពីការឈ្លានពានរបស់រុស្ស៊ីនៅអ៊ុយក្រែន។
ក្នុងថ្ងៃទីមួយនៃដំណើរទស្សនកិច្ចរបស់លោកមុនលោកជួបសមភាគីអាម៉េរិកនៅថ្ងៃព្រហស្បតិ៍ លោកម៉ាក្រុង បានវាយប្រហារលើម្ចាស់ផ្ទះអាម៉េរិកដោយបានប្រាប់ពួកសមាជិកសភានិងក្រុមមេដឹកនាំជំនួញអាម៉េរិកកាលពីថ្ងៃពុធថា ការឧបត្ថម្ភឧស្សាហកម្មអាម៉េរិកជា«មហាឈ្លានពានលើដៃគូប្រកួតប្រជែងអឺរ៉ុប។ នេះជាការបំពានធំណាស់សំរាប់ធុរជនរបស់យើង»។
មុនជួបសមភាគីអាម៉េរិកនៅថ្ងៃ១ធ្នូ លោកម៉ាក្រុងបានឆ្លៀតវាយប្រហារគោលនយោបាយរបស់គូសន្ទនាស្តីពីឧបត្ថម្ភធន
មេដឹកនាំបារាំងរូបនេះចង់សំដៅគោលនយោបាយនាំមុខរបស់បៃដិនដែលហៅថា”ច្បាប់កាត់បន្ថយអតិផរណា»ដែលរដ្ឋាភិបាលអាម៉េរិកលៃទុកប្រាក់រាប់ពាន់លានដុល្លារដើម្បីជះចូលក្នុងឧស្សាហកម្មមិនប៉ះពាល់បរិស្ថានដែលជាការគាំទ្រខ្លាំងដល់ឧស្សាហករតាំងនៅអាម៉េរិក។
ដំណើររបស់ម៉ាក្រុងកើតឡើងចំពេលរដ្ឋមន្ត្រីណាតូជួបប្រជុំនៅទីក្រុងប៊ុយការ៉េសនិងបានសន្យាផ្តល់ជំនួយបន្ថែមទៀតដល់អ៊ុយក្រែនដែលកំពុងរងការវាយប្រហារពីរុស្ស៊ីលើហេដ្ឋារចនាសម្ពន្ធថាមពលនៅពេលរដូវរងារចូលមកដល់។សម្ពន្ធភាព ដែលរួមមានអាម៉េរិកនិងបារាំង ក៏បានពិភាក្សារបៀបដោះស្រាយការប្រឈមបង្កឡើងដោយការបង្កើនកម្លាំងយោធាចិន និងកិច្ចសហការរបស់រដ្ឋាភិបាលទីក្រុងប៉េកាំងជាមួយរុស្ស៊ី ។
អ្នកនាំពាក្យសន្តិសុខជាតិប្រចាំសេតវិមាន បានប្រាប់អ្នកយកព័ត៌មានថា ចិនក៏នឹងស្ថិតក្នុងរបៀបវារៈនៃកិច្ចពិភាក្សារបស់ម៉ាក្រុងនិងមន្ត្រីអាម៉េរិក៕