Views: 2
ដោយ៖ ដេប៉ូ / កំពង់ធំ៖ នាកន្លងមក តាមរយៈការបំផុសចលនាឱ្យប្រជាពលរដ្ឋ និងយុវជន ចូលរួមអភិរក្សធនធានធម្មជាតិ ការថែរក្សាព្រៃឈើ និងសត្វព្រៃ បានធ្វើឱ្យ យុវជន កាន់តែច្រើន បានយល់ដឹងពីបរិស្ថាន និងពួកគេ កាន់តែមានការស្រឡាញ់ ហើយនិងចូលរួមអភិរក្ស ធនធានធម្មជាតិ។ នេះជាការលើកឡើង ដោយកំពូលតារាចម្រៀង មាស សុខសោភា។
គួរបញ្ជាក់ថា ការលើកឡើងរបស់តារាចម្រៀង មានឈ្មោះបោះសម្លេង និងជាអ្នកសិល្បៈ ស្រឡាញ់បរិស្ថាន ដោយបានចូលរួម កិច្ចការពារធនធានធម្មជាតិ ជាច្រើន កន្លងមក រូបនេះ ធ្វើឡើងក្នុងសន្និសីទសារព័ត៌មាន ស្តីពីអន្ទាក់សូន្យ នៅខេត្តកំពង់ធំ នាថ្ងៃទី១១ ខែសីហា ឆ្នាំ២០២២។
តារាចម្រៀងស្រីដ៏លេចធ្លោ មាស សុខសោភា ក្នុងពិធីនេះ បានបង្ហាញការប្តេជ្ញាចិត្ត បន្ថែមទៀត ដល់អ្នកគាំទ្ររបស់ខ្លួន ចូលរួមយុទ្ធនាការ អភិរក្សធនធានធម្មជាតិ ទ្រង់ទ្រាយធំ ដើម្បីបញ្ជ្រាបការយល់ដឹង ពីតម្លៃធនធានធម្មជាតិ ហើយឱ្យពួកគាត់រួមគ្នា នូវសម្បត្តិធនធានធម្មជាត មិនអាចកាត់ថ្លៃបាន ទាំងអស់នេះ ដើម្បីជាប្រយោជន៍ ដល់កូនចៅជំនាន់ក្រោយ បន្តទៀត។
ឆ្លងតាមរយៈការរីករាលដាល នៃជំងឺកូវីដ ១៩ កន្លងមកអ្នកនាង មាស សុខសោភា បានលើកឡើងថាៈ នៅពេលអ្នកនាង ត្រូវសម្ងំនៅផ្ទះ ហើយមានឱកាសចេញមក បានមើលធម្មជាតិឡើងវិញ បានធ្វើឱ្យអ្នកនាង ចាត់ទុកបរិស្ថាន គឺជាព្រះ ហើយការបាត់បង់ព្រៃឈើ ប្រៀបដូចការបាត់បង់អាយុជីវិតរបស់សត្វព្រៃ ដ៏មានតម្លៃ មិនអាចកាត់ថ្លៃ ដូច្នេះដែរ។
ក្នុងពិធីនេះដែរ អ្នកនាង មាស សុខសោភា បានអំពាវនាវឱ្យប្រជាពលរដ្ឋ ចូលរួមបញ្ឈប់ការដាក់អន្ទាក់ ដើម្បីចាប់សត្វព្រៃ និងបញ្ឈប់ការបរិភោគសាច់សត្វព្រៃ ហើយនាំគ្នាងាកមកចូលរួម ថែរក្សាធនធានធម្មជាតិ។
លោក នេត្រ ភក្ត្រា រដ្ឋលេខាធិការ ក្រសួងបរិស្ថាន និងជាប្រធានយុទ្ធនាការអន្ទាក់សូន្យ បានថ្លែងថាៈ ការចូលរួមពីសិល្បករ សិល្បការិនី គឺជាផ្នែកមួយដ៏សំខាន់ ដោយសាតែ សិល្បករ សិល្បការិនី មានអ្នកគាំទ្រច្រើន ដូច្នេះការអំពាវនាវពីសំណាក់ពួកគាត់ ទៅកាន់អ្នកគាំទ្រ អាចមានប្រសិទ្ធភាព កាន់តែខ្លាំងក្លាបន្ថែមទៀត ដែលនេះជាវិធីសាស្ត្រ ចម្រុះ ដើម្បីផ្សព្វផ្សាយពីប្រយោជន៍ នៃធនធានធម្មជាតិ និងសត្វព្រៃ បន្ថែមលើមន្ត្រី រាជរដ្ឋាភិបាល។
គួរបញ្ជាក់ថា ខេត្តកំពង់ធំ គឺជាខេត្តទី៥ ដែលក្រសួងបរិស្ថាន បានដឹកនាំបើកយុទ្ធនាការ អន្ទាក់សូន្យ ដោយមានការចូលរួមពី អង្គការដៃគូ បន្ទាប់ពីខេត្តស្ទឹងត្រែង ខេត្តព្រះវិហារ ខេត្តក្រចេះ ខេត្តមណ្ឌលគីរី និងខេត្តកំពង់ធំ។
សូមរំលឹកថា យុទ្ធនាការអន្ទាក់សូន្យ ធ្វើរហូតដល់ពេលនេះ គឺមានរយៈពេល ៥ខែ ហើយដែលរយៈពេល ៥ខែនេះ ឃើញលទ្ធផលវិជ្ជមានជាច្រើន តាមរយៈលទ្ធផល បានមកពីយុទ្ធនាការអន្ទាក់សូន្យ នៅក្នុងនោះ គឺទី១.ការយល់ដឹងរបស់សាធារណជន ពីផលប៉ះពាល់នៃអន្ទាក់។ ទី២.ចូលរួមការកាត់បន្ថយ ការហូបសាច់សត្វ។ ៣.ទទួលដឹងថា សាច់សត្វ អាចផ្ទុកមេរោគ ដែលប៉ះពាល់ដល់សុខភាព ដែលវាមិនមែនជាថ្នាំប៉ូវ ឬថ្នាំជំនួយសុខភាពទេ និងទី៤.ធ្វើឱ្យប្រជាពលរដ្ឋ បានយល់ដឹងពី យុទ្ធនាការអន្ទាក់សូន្យ មានគោលបំណងសំខាន់ ក្នុងការធ្វើឱ្យជីវចម្រុះ មានសុវត្តិភាពជាដើម៕/V