Views: 5
ប្រែសម្រួល : កញ្ញាដាលីស (ស្ត្រេតថែមស៍) ៖ មេដឹកនាំក្រុមសកម្មប្រយុទ្ធរដ្ឋអ៊ីស្លាមនៅអ៊ីរ៉ាក់និងស៊ីរី (ISIS)ឈ្មោះ អាប៊ូ អាល់ ហាសសាន់ អាល់ ហាសេមី អាល់ គូរ៉ៃស៊ី (Abu al-Hassan al-Hashemi al-Quraishi) ដែលស្លាប់កាលពីពាក់កណ្តាលខែតុលាក្នុងប្រទេសស៊ីរី តាមពិតគឺបំផ្ទុះសម្លាប់ខ្លួនឯងបន្ទាប់ពីគាត់និងជំនួយការរបស់គាត់ត្រូវបានឡោមព័ទ្ធដោយក្រុមអ្នកប្រយុទ្ធក្នុងតំបន់នៅក្នុងទីក្រុងចាសឹម (Jasem) នេះបើយោងតាមយុទ្ធជនដែលចូលរួមក្នុងការប៉ះទង្គិចគ្នានេះ និយាយដូច្នេះ។
យោធាអាម៉េរិកបាននិយាយកាលពីថ្ងៃពុធទី៣០វិច្ឆិកាថា គូរ៉ៃស៊ីត្រូវបានសម្លាប់នៅក្នុងប្រតិបត្តិការមួយ ដែលធ្វើឡើងដោយក្រុមឧទ្ទាមមួយឈ្មោះថា កងទ័ពរំដោះស៊ីរី (FSA) នៅខេត្តដេរ៉ាអា (Deraa) ភាគពាយព្យ។
ខេត្តនេះត្រូវបាននាំមកក្រោមការគ្រប់គ្រងរបស់កងទ័ពស៊ីរីវិញ បន្ទាប់ពីកិច្ចព្រមព្រៀងផ្សះផ្សាដែលសម្របសម្រួលដោយរុស្ស៊ីក្នុងឆ្នាំ ២០១៨ ដែលបានប្រគល់ការគ្រប់គ្រងភាគខាងត្បូងស៊ីរទៅរដ្ឋាភិបាលក្រុងដាម៉ាសវិញ។
ប្រភព ដែលរួមមានទាំងអ្នកប្រយុទ្ធ FSA និងសាច់ញាតិរបស់សមមិត្តដែលបានស្លាប់នៅក្នុងការប៉ះទង្គិចគ្នានេះក៏ដូចជាអ្នកស្រុកនៅចាសឹម បាននិយាយថាគូរ៉ៃស៊ីនិងជំនួយការរបស់គាត់ត្រូវបានរកឃើញនៅក្នុងកន្លែងលាក់កំបាំងនៅក្នុងផ្ទះមួយ។
លោក សាឡឹម អាល់ ហូរ៉ានី (Salem al Horani)ជាអ្នកស្រុកចាសឹមនិងជាអតីតយុទ្ធជនដែលបានចូលរួមក្នុងការឡោមព័ទ្ធផ្ទះទាំងបី ជាកន្លែងដែលក្រុមអាយស៊ីសត្រូវបានរកឃើញ បាននិយាយថា “មេដឹកនាំនិងដៃគូបានបំផ្ទុះគ្រាប់បែកសម្លាប់ខ្លួនជាមួយនឹងក្រវាត់គ្រាប់បែកអត្តឃាត បន្ទាប់ពីអ្នកប្រយុទ្ធរបស់យើងទទួលបានជោគជ័យក្នុងការសម្រុកចូលកន្លែងលាក់ខ្លួនរបស់ពួកគេ”។
ឧទ្ទាម FSA បានទទួលការគាំទ្រពីរដ្ឋលោកខាងលិចនិងឈូងសមុទ្រពែក្សរហូតដល់ពួកគេបានដកការគាំទ្រក្នុងឆ្នាំ២០១៨ ប៉ុន្តែអ្នកប្រយុទ្ធរបស់ខ្លួននៅតែស្ថិតក្នុងតំបន់នេះបន្ទាប់ពីកិច្ចព្រមព្រៀងផ្សះផ្សា ដែលក្នុងនោះពួកគេបានយល់ព្រមប្រគល់ជូនអាវុធធុនធ្ងន់ ប៉ុន្តែត្រូវបានអនុញ្ញាតឱ្យរក្សាអាវុធធុនស្រាល៕
រូបភាពផ្កាយរណបថ្ងៃទី២កុម្ភៈឆ្នាំ២០២២ បានបង្ហាញលំនៅឋានរបស់គូរ៉ៃស៊ី នៅភាគពាយព្យស៊ីរី មុនការវាយឆ្មក់ដោយកងកម្លាំងអាម៉េរិក
