Views: 11
ប្រែសម្រួល : កញ្ញាដាលីស (ដេល្លីម៉េល) ៖ ទីបំផុតមេធាវីជនជាតិឥណ្ឌាម្នាក់បានឈ្នះការតស៊ូក្តីនៅតុលាការរយៈពេល ២២ ឆ្នាំប្រឆាំងនឹងក្រុមហ៊ុនផ្លូវដែករបស់ប្រទេសនេះបន្ទាប់ពីគាត់បានប្តឹងពួកគេរឿងគិតថ្លៃលើស ២៥ សេនដុល្លារសម្រាប់សំបុត្រត្រឡប់ទៅវិញក្នុងឆ្នាំ ១៩៩៩។
កាលពីសប្តាហ៍មុន លោក ទុងណាត ឆាតួវេឌី (Tungnath Chaturvedi) ត្រូវបានសងមកវិញ ២៥ សេនបូកនឹងការប្រាក់រយៈពេលពីរទសវត្សរ៍ ស្មើនឹង ៣,៥៤ ដុល្លារ។ គាត់ក៏ទទួលបានលុយពិន័យ ១៨៨ ដុល្លារពីក្រុមហ៊ុនដឹកជញ្ជូនផ្លូវដែកជាតិរបស់ឥណ្ឌាផងដែរ។
លោកឆាតួវេឌីបាននិយាយថា “អ្នកមិនអាចដាក់តម្លៃលើថាមពលនិងពេលវេលាដែលខ្ញុំបានបាត់បង់នោះទេ” ដោយលាតត្រដាងថា គាត់បានចូលរួមសវនាការជាង ១០០ក្នុងរយៈពេលជាច្រើនឆ្នាំមកនេះ ចាប់តាំងពីគាត់បានដាក់ពាក្យប្តឹង។
ប៉ុន្តែលោកបានបន្ថែមថា “នេះគឺអំពីការតស៊ូដើម្បីយុត្តិធម៌និងការប្រយុទ្ធប្រឆាំងនឹងអំពើពុករលួយជានិច្ច ដូច្នេះវាមានតម្លៃណាស់”។
លោកឆាតួវេឌីបានបង់ប្រាក់ចំនួន ២០ រូពី (២៥សេនដុល្លារ) លើសពីថ្លៃសម្រាប់សំបុត្រចំនួនពីរនៅលើសេវាផ្លូវដែកភាគឦសានពីទីក្រុងម៉ាធូរ៉ា (Mathura) ទៅកាន់ទីក្រុងម៉ូរ៉ាដាបាដ(Moradabad) ក្នុងឆ្នាំ ១៩៩៩។លោកបានប្រគល់លុយ ១០០ រូពីសម្រាប់សំបុត្រពីរនៅលើខ្សែរថភ្លើងក្នុងតំបន់ ដែលមានតម្លៃ ៣៥ រូពីក្នុងសំបុត្រនីមួយៗ។
គាត់គួរបានលុយអាប់៣០រូពីមកវិញ ប៉ុន្តែអ្នកគិតលុយបានឱ្យមកវិញតែ១០រូពី ដោយកេងយកលុយគាត់២០រូពី។
បន្ទាប់ពីការតស៊ូផ្លូវច្បាប់រយៈពេល ២២ ឆ្នាំជាមួយក្រុមហ៊ុននិងអ្នកគិតលុយ តុលាការបានផ្ដល់សំណងដល់លោកឆាតួវេឌីចំនួន ១៥.០០០ រូពី (១៨៨ដុល្លារ)៕
លោកឆាតួវេឌីទីបំផុតឈ្នះក្តីរឿងក្រុមហ៊ុនរថភ្លើងជាងកេងលុយគាត់អស់ ២០ រូពី