Views: 12
ប្រែសម្រួលៈបំណង(ដេល្លីម៉េល)៖ សម្ពន្ធមិត្តម្នាក់របស់ពូទីន និងជាអតីតប្រធានាធិបតីរុស្ស៊ីនៅថ្ងៃអង្គារទី២៧កញ្ញានេះបានលើកឡើងអំពីលទ្ធភាពនៃការវាយប្រហារដោយប្រើគ្រាប់បែកនុយក្លេអ៊ែរលើអ៊ុយក្រែន ដោយលោកអះអាងថាសម្ពន្ធភាពយោធាដឹកនាំដោយអាម៉េរិកនឹងនៅតែមិនចូលពាក់ព័ន្ធផ្ទាល់ក្នុងជម្លោះនេះដោយខ្លាចអន្តរាយខ្លួនដោយសព្វាវុធនុយក្លេអ៊ែរ។
ឌីមីទ្រី ម៉េដវ៉េដេវ(Dmitry Medvedev) អតីតប្រធានាធិបតី ដែលឥឡូវជាអនុប្រធានក្រុមប្រឹក្សាសន្តិសុខរុស្ស៊ី បាននិយាយថា រុស្ស៊ីមានសិទ្ធិការពារខ្លួនជាមួយនឹងសព្វាវុធនុយក្លេអ៊ែរ បើសិនជាវារុញអោយហួសព្រំដែនរបស់ខ្លួន និងថា«នេះជារឿងប្រាកដប្រជា មិនមែនកម្លា»ទេ។
លោកប្រធានាធិបតី វ្ល៉ាឌីមៀ ពូទីន កាលពីថ្ងៃពុធបានចេញបញ្ជាអោយរុស្ស៊ីធ្វើកំណែនទ័ពជាលើកដំបូងចាប់តាំងពីសង្គ្រាមលើកលើកទីពីរ និងគាំទ្រផែនការកាត់យកទឹកដីអ៊ុយក្រែនប៉ែកខាងកើតប្រមាណ១៥ភាគរយមកដាក់ជាទឹកដីរុស្ស៊ី ហើយបានព្រមានលោកខាងលិចថា លោកមិនកម្លាទេនៅពេលលោកប្រាប់ថាលោកបានត្រៀមខ្លួនជាស្រេចក្នុងការប្រើសព្វាវុធនុយក្លេអ៊ែរដើម្បីការពាររុស្ស៊ី។
លោកម៉េដវ៉េដេវ បាននិយាយបង្ហោះក្នុងតេឡេក្រាមថា «ចូរស្រម៉ៃមើលថារុស្ស៊ីត្រូវបង្ខំអោយប្រើសព្វាវុធគួរអោយខ្លាចបំផុតលើរបបគ្រប់គ្រងអ៊ុយក្រែន ដែលប្រព្រឹត្តអំពើឈ្លានពានទ្រង់ទ្រាយធំណាមួយដែលគ្រោះថ្នាក់ដល់អត្ថិភាពនៃរដ្ឋរបស់យើង»។
យោងតាមគោលលទ្ធិនុយក្លេអ៊ែររបនស់រុស្ស៊ី លោកប្រធានាធិបតីអាចប្រើសព្វាវុធនុយក្លេអ៊ែរ បើសិនជារដ្ឋប្រឈមការគំរាមអំពីអត្ថិភាពគឺភាពគង់វង្សរបស់ខ្លួន រួមទាំងសព្វាវុធធម្មតាផង។«ខ្ញុំជឿថាសម្ពន្ធភាពយោធាណាតូនឹងមិនហ៊ានចូលអន្តរាគមន៍ដោយផ្ទាល់ នៅក្នុងជម្លោះសូម្បីតែក្នុងសេណារីយ៉ូបែបនេះ»។
សូមបញ្ជាក់ថា រុស្ស៊ីនិងអាម៉េរិកគ្រប់គ្រងក្បាលគ្រាប់នុយក្លេអ៊ែរលើកលោកប្រមាណ៩០ភាគរយ។
លោក ម៉េដវ៉េដេវ បាននិយាយថា«ខ្ញុំត្រូវតែព្រមានអ្នកជាថ្មី សំរាប់អ្នកត្រចៀកថ្លង់ដែលស្តាប់តែសម្តីខ្លួនឯង។រុស្ស៊ីមានសិទ្ធិប្រើសព្វាវុធនុយក្លេអ៊ែរ បើចាំបាច់»។
ការព្រមានរបស់ម៉េដវ៉េដេវ កើតឡើងនៅពេលរុស្ស៊ីត្រៀមកាត់យកទឹកដីអ៊ុយក្រែនមួយចំរៀកធំក្រោយការបោះប្រជាមតិនៅក្នុងតំបន់ដែលរុស្ស៊ីទើបវាយកាន់កាប់។អ៊ុយក្រែននិងលោកខាងលិចបានថ្កោលទោសទង្វើនេះ និងប្រកាសមិនទទួលស្គាល់៕
ឌីមីទ្រី ម៉េដវ៉េដេវ ចេញមករំលឹកថា រុស្ស៊ីមានសិទ្ធិប្រើសព្វាវុធនុយក្លេអ៊ែរដើម្បីការពារអត្ថិភាពរបស់ខ្លួន