Views: 2
ដោយ៖ សុវណ្ណកុម្ភៈ / ភ្នំពេញ៖ សហព័ន្ធកីឡាប្រដាល់សកលកម្ពុជា បានប្ដេជ្ញារកមេដាយមាសឲ្យបាន នាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ជាមួយនឹងការប្ដេជ្ញា បែបនេះ កីឡាករប្រដាល់សកលជម្រើសជាតិ សព្វថ្ងៃ បានបង្កើនការហ្វឹកហាត់ពង្រឹង សមត្ថភាព បច្ចេកទេស ស្មារតី ដើម្បីធ្វើយ៉ាងណាឲ្យបានសម្រេចនូវគោលដៅមួយនេះ។
លោក ប៊ុយ សោភ័ណ្ឌ អគ្គលេខាធិការ សហព័ន្ធកីឡាប្រដាល់សកល បានឲ្យដឹងថាៈ ដើម្បីសម្រេចឲ្យបាន នូវទិសដៅមេដាយមាស ចំនួន១គ្រឿង ដែល CAMSOC បានដាក់ឲ្យនោះ សហព័ន្ធ បានរៀបចំយ៉ាងយកចិត្តទុកដាក់ គ្រប់ជ្រុងជ្រោយ ពិសេសគឺ នឹងព្យាយាមពង្រឹងកីឡាករបន្ថែមទៀត ដើម្បីធ្វើយ៉ាងណា យកមេដាយមាស ឲ្យបានលើសគោលដៅ ដែលបានកំណត់ ។
សម្រាប់ផែនការស៊ីហ្គេម ឆ្នាំ២០២៣ មានកីឡាករខ្មែរ ហាត់នៅថៃមួយរូប និងកីឡាករខ្មែរ ហាត់នៅវៀតណាម១រូប ដែលសហព័ន្ធ នឹងយកគេមក ហើយសហព័ន្ធ ក៏បានត្រៀម កីឡាករល្អៗ មួយចំនួនធំ ដែលមានចំនួន ១២ នាក់ ជាកីឡាករសុទ្ធ។ ក្នុងទិសដៅរបស់ សហព័ន្ធ គឺធ្វើយ៉ាងណា សម្រេចគោលដៅ ដែលគណៈកម្មាធិការជាតិរៀបចំស៊ីហ្គេម ឆ្នាំ២០២៣ (CAMSOC) បានដាក់ឲ្យ ដោយយកមេដាយមាស យ៉ាងហោចឲ្យបាន១ ។ ប៉ុន្តែ សហព័ន្ធ នឹងព្យាយាមធ្វើឲ្យបានលើសហ្នឹង គឺព្យាយាមយកឲ្យបាន ២ មេដាយមាស។
ទន្ទឹមការខិតខំប្រឹងប្រែង ក្រៅពីការបញ្ជូនកីឡាករ ទៅហាត់នៅថៃ រយៈពេល ២ សប្ដាហ៍ សហព័ន្ធ នឹងប្រឹងប្រែងស្វែងរកថវិកា ដើម្បីបានបញ្ជូនកីឡាករកម្ពុជា ចេញទៅប្រកួត លក្ខណៈអន្តរជាតិ ឲ្យបានច្រើន តាមដែលអាចធ្វើទៅបាន ដើម្បីឲ្យកីឡាករជម្រើសជាតិ ទទួលបានបទពិសោធន៍ កាន់តែច្រើន ព្រមទាំងអាចសម្រេចគោលដៅរបស់ រាជរដ្ឋាភិបាល។
សម្រាប់ឆ្នាំ២០២២ លោកក៏គ្រោងស្នើសុំទៅកាន់សហព័ន្ធកីឡាប្រដាល់សកលអន្តរជាតិ នូវថវិកាទ្រទ្រង់ដល់ការរៀបចំការប្រកួតប្រដាល់សកល ក្នុងស្រុក ឲ្យបានរៀងរាល់ ២ សប្ដាហ៍ម្ដង ចំនួន ៦ លើក ដូចកាលពីឆ្នាំ២០២១។
ថ្មីៗនេះ សហព័ន្ធប្រដាល់សកលកម្ពុជា ទើបតែបានទទួលគ្រូបង្វឹកម្នាក់ទៀតបន្ថែម គឺលោក Kkssymhanov Berikbol Amantayevich ជនជាតិកាហ្សាក់ស្ថាន ក្រោមការជួយឧបត្ថម្ភ របស់ CAMSOC ដែលកុងត្រារបស់លោក មានសុពលភាព រហូតដល់ខែកក្កដា ឆ្នាំ២០២៣ ៕/V
