Views: 3
ប្រែសម្រួល : កញ្ញាដាលីស (ដេល្លីម៉េល) ៖ មេដឹកនាំសាសនានិងសហគមន៍បាននិយាយថា មេដឹកនាំរបបយោធារបស់បួគីណាហ្វាសូបានយល់ព្រមចុះចេញពីតំណែងកាលពីថ្ងៃអាទិត្យទី២តុលាពោលគឺពីរថ្ងៃបន្ទាប់ពីក្រុមមន្ត្រីកងទ័ពបានប្រកាសពីការបណ្តេញលោកនៅក្នុងរដ្ឋប្រហារដែលបង្កឱ្យមានចលាចលផ្ទៃក្នុងនិងការថ្កោលទោសអន្តរជាតិ។
មេដឹកនាំសាសនានិងសហគមន៍បាននិយាយនៅក្នុងសេចក្តីថ្លែងការណ៍មួយថា វរសេនីយ៍ទោ ប៉ូល-ហង់រី សាន់ដាវហ្គោ ដាមីបា (Paul-Henri Sandaogo Damiba)”ខ្លួនគាត់ផ្ទាល់បានផ្តល់ជូនការលាលែងពីតំណែងនេះដើម្បីបញ្ចៀសការប្រឈមមុខដាក់គ្នាជាមួយនឹងផលវិបាកធ្ងន់ធ្ងរដល់មនុស្សនិងសម្ភារៈ”។
ពួកគេបានបន្ថែមថា រឿងនេះកើតឡើងបន្ទាប់ពីមានការសម្របសម្រួលរវាងលោកដាមីបានិងមេដឹកនាំថ្មី លោក អ៊ីប្រាហ៊ីម ត្រាអូរ៉េ (Ibrahim Traore)ដែលប្រកាសដោយក្រុមមេដឹកនាំសាសនានិងសហគមន៍។
ប្រភពការទូតក្នុងតំបន់បាននិយាយថា លោកដាមីបា ដែលខ្លួនគាត់ផ្ទាល់កាន់អំណាចនៅក្នុងរដ្ឋប្រហារខែមករា បានភៀសខ្លួនទៅកាន់រដ្ឋធានីឡូមេ (Lome)របស់តូហ្គោកាលពីថ្ងៃអាទិត្យបន្ទាប់ពីការធ្វើរដ្ឋប្រហារលើកទីពីររបស់ប្រទេសអាហ្វ្រិកខាងលិចក្រីក្រនិងគ្មានស្ថិរភាពមួយនេះនៅឆ្នាំនេះ។
លោកត្រាអូរ៉េបានប្រកាសនៅពេលល្ងាចថ្ងៃអាទិត្យថា គាត់បានទទួលការគាំទ្រពីមេទ័ពដើម្បី “ស្តារឡើងវិញ” ការតស៊ូប្រឆាំងនឹងពួកជីហាដ។
នៅក្នុងសេចក្តីថ្លែងការណ៍មួយកាលពីថ្ងៃអាទិត្យ ប្លុកតំបន់អាហ្វ្រិកខាងលិច ECOWAS បានស្វាគមន៍តួអង្គផ្សេងៗគ្នានៅក្នុងឈុតឆាកបួគីណាហ្វាសូ ដែលទទួលយក”ដំណោះស្រាយដោយសន្តិភាពចំពោះការខ្វែងគំនិតគ្នារបស់ពួកគេ”។ សេចក្តីថ្លែងការណ៍បានបន្ថែមថា គណៈប្រតិភូ ECOWAS នឹងធ្វើដំណើរទៅកាន់រដ្ឋធានីអៅហ្គាឌូហ្គូ (Ouagadougou) នៅថ្ងៃចន្ទទី៣តុលា។
មេដឹកនាំសាសនានិងសហគមន៍បាននិយាយថា លោកដាមីបាបានកំណត់ “លក្ខខណ្ឌប្រាំពីរ” សម្រាប់ការចុះចេញពីតំណែង។ក្នុងចំណោមលក្ខខណ្ឌទាំងនោះគឺរួមបញ្ចូលការធានាសន្តិសុខសម្រាប់គាត់និងសម្ពន្ធមិត្តរបស់គាត់នៅក្នុងយោធាហើយថាការសន្យាដែលគាត់បានផ្តល់ឱ្យទៅប្លុកក្នុងតំបន់របស់អាហ្វ្រិកខាងលិចសម្រាប់ការវិលត្រឡប់ទៅកាន់ការគ្រប់គ្រងស៊ីវិលក្នុងរយៈពេលពីរឆ្នាំត្រូវបានគោរព។
មេដឹកនាំសាសនានិងសហគមន៍ ដែលមានឥទ្ធិពលខ្លាំងនៅបួគីណាហ្វាសូ បាននិយាយថា លោកត្រាអូរ៉េអាយុ ៣៤ ឆ្នាំបានទទួលយកលក្ខខណ្ឌ ហើយបានអំពាវនាវឱ្យមានភាពស្ងប់ស្ងាត់៕
មេដឹកនាំថ្មី លោក អ៊ីប្រាហ៊ីម ត្រាអូរ៉េ
