Views: 10
ដោយៈ ទេព មង្គល / ភ្នំពេញៈ ក្រសួងវប្បធម៌ និងវិចិត្រសិល្បៈ នៅព្រឹកថ្ងៃទី៣ ខែតុលា ឆ្នាំ២០២២ បានចាប់ផ្ដើមបើកមហោស្រពល្ខោនបាសាក់ទូទាំងប្រទេស ឆ្នាំ២០២២ ក្រោមប្រធានបទ «វប្បធម៌សន្តិភាព» ដែលកម្មវិធីនេះ មានរយៈពេល ២ថ្ងៃ គឺចាប់ពីថ្ងៃទី ៣ តុលា ដល់ថ្ងៃទី៤ ស្អែកនេះ នៅរោងមហោស្រពនាយកដ្ឋាន សិល្បៈទស្សនីយភាព ។
បើតាមមន្ត្រីជំនាញនៃ ក្រសួងវប្បធម៌ និងវិចិត្រសិល្បៈ បានបញ្ជាក់ថាៈ កម្មវិធីនេះ បានធ្វើឡើង ក្នុងគោលបំណងថែររក្សា ការពារ និងលើកស្ទួយសិល្បៈល្ខោនបាសាក់ ដែលជាមរតកវប្បធម៌ជាតិដ៏មានតម្លៃ ពុំអាចកាត់ថ្លៃបាន ដោយមានវត្តមានរបស់ ក្រុមសិល្បករល្ខោនបាសាក់ជាច្រើន ដែលមកពីបណ្តា រាជធានី-ខេត្ត ដែលបាន ដាក់ពាក្យចូលរួមប្រកួតប្រជែងសមត្ថភាពរបស់ខ្លួន លើវិធីសាស្ត្រ នៃការដឹកនាំរឿង, សិល្ប៍វិធីនៃការតាក់តែងនិពន្ធ និងសមត្ថភាពនៃ ការសម្តែង។
ក្នុងឱកាសបើកកម្មវិធី នៅព្រឹកថ្ងៃទី៣ តុលា នោះ លោកស្រី បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងនូវការកោតសសើរ និង អរគុណយ៉ាងជ្រាលជ្រៅ ចំពោះក្រសួង-ស្ថាប័នពាក់ព័ន្ធ អាជ្ញាធរមូលដ្ឋាន សប្បុរសជន ដៃគូអភិវឌ្ឍន៍ និងវិស័យឯកជន ដែលបានចូលរួមយ៉ាងជិតស្និទ្ធ និងឧបត្ថម្ភគាំទ្រកន្លងមក ដែលនេះគឺជាការចូលរួមយ៉ាងសកម្ម ដើម្បីជួយគាំទ្រលើកស្ទួយវិស័យសិល្បៈទស្សនីយ ភាព ពិសេសល្ខោនបាសាក់ ឱ្យចាប់ផ្តើមមានសកម្មភាពឡើងវិញ។
ក្រោមការខិតខំនិងយកចិត្តទុកដាក់របស់ ប្រមុខរាជរដ្ឋាភិបាល ដោយមានក្រសួងវប្បធម៌ និងវិចិត្រសិល្បៈ ជាសេនាធិការ លោកស្រី រដ្ឋមន្ត្រី បានចាត់ទុកថាៈ មហោស្រព ល្ខោនបាសាក់ទូទាំងប្រទេស ឆ្នាំ២០២២ នាពេលនេះ មិនត្រឹមតែជាវេទិកាសម្រាប់ ការបញ្ចេញនូវសមត្ថភាព និងទេពកោសល្យរបស់ក្រុមនីមួយៗតែប៉ុណ្ណោះទេ ប៉ុន្តែនេះគឺ ជាពេលវេលាមួយដ៏សំខាន់ សម្រាប់សិល្បករ ទាំងក្នុង និងក្រៅប្រព័ន្ធ មានឱកាសបាន ជួបជុំគ្នា និងផ្លាស់ប្តូរនូវបទពិសោធន៍ថ្មីៗ រវាងគ្នានិងគ្នា។ បន្ថែមអំពីនេះ លោកស្រី រដ្ឋមន្ត្រី ជឿជាក់ថា នេះគឺវេទិកាមួយដ៏សំខាន់ សម្រាប់ផ្សព្វផ្សាយជូនទៅដល់មហាជន គ្រប់ស្រទាប់ថ្នាក់ បានទស្សនា និងស្វែងយល់បន្តិចម្តងៗ អំពីទម្រង់សិល្បៈខ្មែរជាច្រើន ដែលទាមទារឱ្យមានការចូលរួមយកចិត្តទុកដាក់ ថែរក្សាការពារ និងលើកស្ទួយ ។
សម្រាប់ទិសដៅការងារទៅមុខ ដើម្បីពង្រឹងនិងពង្រីកវិសាលភាព នៃវិស័យសិល្បៈ ទស្សនីយភាពនៅកម្ពុជា ក្នុងនាមថ្នាក់ដឹកនាំក្រសួងវប្បធម៌ និងវិចិត្រសិល្បៈ លោកស្រី ភឿង សកុណា បានគាំទ្រយ៉ាងពេញទំហឹង ចំពោះសកម្មភាពវប្បធម៌ ក្នុងគោលបំណង ថែរក្សា និងលើកស្ទួយសិល្បៈល្ខោនបាសាក់ ជាពិសេស ការបង្កើតឱ្យមានមហោស្រព ឬព្រឹត្តិការណ៍វប្បធម៌នានា គឺជាការផ្សព្វផ្សាយ និងផ្តល់ឱកាសដល់សហគមន៍ យុវជន យុវនារី ដើម្បីចូលរួមថែរក្សា ការពារនូវសម្បត្តិវប្បធម៌ជាតិរបស់ខ្លួន ដូចពាក្យថា «កិច្ចថែរក្សាការពារបេតិកភណ្ឌវប្បធម៌ គឺជាភារកិច្ចរបស់ កូនខ្មែរគ្រប់ៗរូប» ៕/V
