Views: 10
ដោយ៖ ដេប៉ូ / ព្រះវិហារ៖ ក្រសួងបរិស្ថាន ដែលជាសេនាធិការ ឱ្យរាជរដ្ឋាភិបាល បានយកចិត្តទុកដាក់យ៉ាងខ្លាំង ក្នុងការបង្កើតមុខរបរឱ្យប្រជាសហគមន៍នៅតាមមូលដ្ឋាន ដូចជាការដាំដំណាំ បន្លែ ចិញ្ចឹមសត្វ ជំរុញឱ្យជីវភាពរបស់ពួកគាត់ កាន់តែមានភាពល្អ ប្រសើរ កាត់បន្ថយការពឹងផ្អែក ទៅលើផលអនុផលព្រៃឈើ ពិសេសក្នុងពេលបច្ចុប្បន្ន ប្រជាសហគមន៍ បានកំពុងចូលរួមចំណែក យ៉ាងសំខាន់ ក្នុងការចូលរួមការពារអភិរក្ស សម្បត្តិធនធានធម្មជាតិ ។ នេះជាការថ្លែងបញ្ជាក់ពីសំណាក់ លោក ខ្វៃ អាទិត្យា អនុរដ្ឋលេខាធិការ ក្រសួងបរិស្ថាន។
ការលើកឡើងរបស់មន្ត្រីជាន់ខ្ពស់ក្រសួងបរិស្ថានបែបនេះ ធ្វើឡើងក្នុងពិធីរៀបចំកិច្ចប្រជុំ បណ្តាញសហគមន៍អភិរក្សធនធានធម្មជាតិ ថ្នាក់តំបន់ខាងជើងបឹងទន្លេសាប ក្រោមប្រធានបទ “ជម្រើសមុខរបរសម្រាប់បង្កើតជីវភាពសហគន៍” ដែលរៀចំឡើង ដោយនាយកដ្ឋានជីវភាពសហគមន៍ នៃអគ្គនាយកដ្ឋានសហគមន៍មូលដ្ឋាន នៅសហគមន៍តំបន់ការពារធម្មជាតិ តាំងយូរ ស្ថិតក្នុងឃុំឈានមុខ ស្រុកត្បែងមានជ័យ ខេត្តព្រះវិហារ នាព្រឹកថ្ងៃទី២៩ ខែកញ្ញា ឆ្នាំ២០២២ ។
ក្នុងឱកាសនោះ លោក ខ្វៃ អាទិត្យា អនុរដ្ឋលេខាធិការក្រសួងបរិស្ថាន បានមានប្រសាសន៍ថាៈ ការរៀបចំបង្កើតសហគមន៍ តំបន់ការពារធម្មជាតិ ដើម្បីបង្កើតជាដៃគូសន្ទនា រវាងប្រជាសហគមន៍ និងរាជរដ្ឋាភិបាល ផ្តល់ការទទួលខុសត្រូវ ក្នុងការគ្រប់គ្រង ផ្លាស់ប្តូរយោបល់គ្នា ស្វែងរកដំណោះស្រាយ រួមគ្នា ចូលរួមក្នុងការការពារនិងអភិរក្សធនធានធម្មជាតិ ក៏ដូចជា ចូលរួមអភិរក្ស បេតិកភណ្ឌ វប្បធម៌ប្រពៃណី ឱ្យបានគង់វង្ស និងដើម្បីបង្កើនសេដ្ឋកិច្ចមូលដ្ឋាន ។
លោក អនុរដ្ឋលេខាធិការ បានថ្លែងដែរថាៈ ការថែររក្សាព្រៃឈើ មានសារៈសំខាន់ណាស់ ក្នុងការចូលរួមជួយ ក្នុងការបម្រែបម្រួលអាកាសធាតុ ដែលបានផ្តល់ជាជម្រកសត្វព្រៃ ធនធានធម្មជាតិជាច្រើន ដែលជាទីទាក់ទាញភ្ញៀវទេសចរណ៍ជាតិ-អន្តរជាតិ និងការសិក្សាស្វែងយល់ផ្សេងៗទៀត ដែលជំរុញឲ្យការស់នៅដោយចីរភាព។
លោក ខៀវ បូរិន អគ្គនាយកនៃអគ្គនាយកដ្ឋាន សហគមន៍មូលដ្ឋាន ក្រសួងបរិស្ថាន បានឱ្យដឹងថាៈ កិច្ចប្រជុំបណ្តាញសហគមន៍ អភិរក្សធនធានធម្មជាតិនេះ រៀបចំឡើង ក្នុងគោលបំណងចែករំលែកព័ត៌មាន បទពិសោធន៍ល្អ និងជម្រើសមុខរបរ សម្រាប់ការបង្កើនប្រាក់ចំណូល សម្រាប់សហគមន៍មូលដ្ឋាន ពិនិត្យនិងកែសម្រួល សេចក្តីព្រៀងលក្ខន្តិកៈបណ្តាញសហគមន៍ អភិរក្សធនធានធម្មជាតិ តាមរយៈលទ្ធផល នៃកិច្ចប្រជុំនេះ សហគមន៍នឹងបានរៀនសូត្របទពិសោធន៍ ពីគ្នាទៅវិញទៅមក ព្រមទាំងរៀបចំផែនកា សម្រាប់អភិវឌ្ឍន៍ នៅតាមសហគមន៍របស់ខ្លួន ទៅតាមស្ថានភាពជាក់ស្តែង ។
ទន្ទឺមនឹងគ្នានេះ លោកបានបញ្ជាក់បន្ថែមថាៈ ក្រៅពីការជួយរៀបចំបង្កើត និងផ្តល់ការទទួលស្គាល់ សហគមន៍តំបន់ការពារធម្មជាតិ ឱ្យមានលក្ខណៈស្របច្បាប់ ពេញលេញ ក្រសួងបរិស្ថាន តែងតែយកចិត្តទុកដាក់ ផ្តល់ការគាំទ្រដល់ពួកគាត់ ទាំងជាទិសដៅ រយៈពេលវែង តាមរយៈការជំរុញការអនុវត្តគោលនយោបាយ យុទ្ធសាស្ត្រ និងផែនការនានារបស់រដ្ឋ ជាអាទិ៍ អេកូទេសចរណ៍ កសិកម្មបែបទំនើប សុខភាពសហគមន៍ ទឹកស្អាត និងអាហារូបត្ថម្ភ ទាំងជាលក្ខណៈជួយអន្តរាគមន៍បន្ទាន់ ចំពោះមុខ ជាពិសេសក្នុងកំឡុងវិបត្តិកូវីដ១៩ និងការផ្តល់ជាបន្លែ សត្វចិញ្ចឹម មាន គោ ក្របី ជ្រូក មាន់ ពពែជាដើម-ល- ។
សូមបញ្ជាក់ថា ដើម្បីលើកកម្ពស់ការចូលរួមគ្រប់គ្រង និងអភិរក្សធនធានធម្មជាតិ ការលើកកម្ពស់ជីវភាពសហគមន៍ និងចូលរួមចំណែកដោះស្រាយបញ្ហាផ្សេងៗ ជាមួយស្ថាប័នជំនាញ និងចូលរួមអនុវត្តគោលនយោបាយរបស់រដ្ឋាភិបាល គិតត្រឹមឆមាសទី២ ឆ្នាំ២០២២ ក្រសួងបរិស្ថាន បានរៀបចំបង្កើតសហគមន៍ តំបន់ការពារធម្មជាតិចំនួន ១៩០សហគមន៍ គ្រប់គ្រងផ្ទៃដីទំហំ ៣២៤,២៣៨ហិកតា ស្ថិតនៅក្នុងតំបន់ការពារធម្មជាតិ ចំនួន៣៤ ក្នុងខេត្តចំនួន១៦ និងមានសមាសភាព គណៈកម្មការសហគមន៍ចំនួន ១.៨៦៣ នាក់ ក្នុងនោះស្ត្រីមានចំនួន ៣៥១ នាក់ ។ V / N
