Views: 9
ដោយៈ ប.ជ័យ / បន្ទាយមានជ័យ: មន្ត្រីសមត្ថកិច្ច បានអះអាងថាៈ ពលរដ្ឋជម្លៀសពីទឹកជំនន់ និងជំនន់ទឹកភ្លៀង នៃស្ទឹងសិរីសោភ័ណ និងស្ទឹងមង្គលបូរី មកស្នាក់នៅក្នុងជំរំតង់ ទួលសុវត្ថិភាព មានសន្តិសុខ សុវត្ថិភាព សណ្តាប់ធ្នាប់ មានសន្តិសុខ ម្ហូបអាហារ ថ្នាំសង្កូវ សេវាទឹកស្អាត អគ្គិសនី ការថែទាំ និងការផ្តល់សេវាល្អគ្រប់ផ្នែក ។
លោកឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ នៅថ្ងៃទី២២ ខែកញ្ញា ឆ្នាំ២០២២ បានទទួលជ្រាបដូច្នេះ ពេលដឹកនាំលោកស្នងការរង និងកម្លាំងនគរបាល ក្រោមឱវាទ ចុះពិនិត្យស្ថានភាពទឹកជំនន់ នៅចំណុចផ្លូវជាតិលេខ៥ វាងក្រុងសិរីសោភ័ណ នៅក្នុងភូមិព្រែកជីក ឃុំបត់ត្រង់ ស្រុកមង្គលបូរី ដែលទឹកជំនន់ កំពុងហក់ឡើងខ្លាំង។
នោះមកពីក្រោយពីមានភ្លៀងធ្លាក់ ទាំងថ្ងៃទាំងយប់ ជាបន្តបន្ទាប់ មួយរយ:ចុងក្រោយនេះ។
ក្នុងឱកាសនោះដែរ លោកឧត្តមសេនីយ៍ទោ សិទ្ធិ ឡោះ ក៏បានចុះសួរសុខទុក្ខ និងសំណេះសំណាល ជាមួយបងប្អូនប្រជាពលរដ្ឋ ដែលត្រូវបានអាជ្ញាធរ និងសមត្ថកិច្ច ជម្លៀសមកស្នាក់នៅទីទួលសុវត្ថិភាពផងដែរ។ លោកក៏បានផ្តាំផ្ញើដល់ប្រជាពលរដ្ឋទាំងអស់ ត្រូវបន្តរស់នៅប្រកបដោយអនាម័យ និងត្រូវហាមប្រាមកូនតូចៗរបស់លោកអ្នក កុំឲ្យចុះលេងទឹក ព្រោះទឹកកំពុងជន់លិច វាអាចបង្កឲ្យលង់ស្លាប់បាន។ បន្ថែមពីលើនេះ ត្រូវថែរក្សាការពារទ្រព្យសម្បត្តិ វត្ថុមានតម្លៃ និងសត្វចិញ្ចឹម ឲ្យបានល្អដោយខ្លួនឯង ក្នុងករណីចាំបាច់ ត្រូវរាយការណ៍ជូនសមត្ថកិច្ច ដែលនៅជិតបំផុត ដើម្បីជួយអន្តរាគមន៍។
សូមរំលឹកថា គឹតត្រឹមថ្ងៃទី២២ ខែកញ្ញា ឆ្នាំ២០២២ នេះ មានប្រជាពលរដ្ឋ ឃុំបត់ត្រង់ ស្រុកមង្គលបូរី ចំនួន ៥៤ គ្រួសារ និងពលរដ្ឋសង្កាត់ព្រះពន្លា សង្កាត់អូរអំបិល និងសង្កាត់ភ្នៀត ក្រុងសិរីសោភ័ណ ចំនួនជាង ៥០ គ្រួសារ ដែរត្រូវបាននគរបាល យោធា កងរាជអាវុធហត្ថ និងអាជ្ញាធរដែនដី ក្រុមការងារផ្សេងទៀត ចុះជួយសង្គ្រោះ អន្តរាគមន៍ ជម្លៀសចេញពីតំបន់ ឬផ្ទះសម្បែងដែលជន់លិច ឲ្យមកស្នាក់នៅទីទួលមានសុវត្ថិភាព ជាបណ្តោះអាសន្ន៕ V / N