Views: 11
ដោយៈ សុផានីតា / កោះកុង៖ មន្ត្រីពន្ធដារ នៃអគ្គនាយកដ្ឋានពន្ធដារ បានលើកចិត្តដល់ ក្រុមអ្នកជាប់ពន្ធ ឬប្រជាពលរដ្ឋ មានកាតព្វកិច្ចបង់ពន្ធទាំងឡាយ ដាក់ពាក្យបណ្តឹងតវ៉ា សុំរកយុត្តិធម៌បាន ករណីប្រសិនបើពួកគាត់យល់ថា ការកំណត់ ឬវិធានការ តម្រូវឱ្យបង់ពន្ធ មិនត្រឹមត្រូវ។
លោក សេង ជាសិទ្ធ ប្រធាននាយកដ្ឋាននីតិកម្ម គោលនយោបាយសារពើពន្ធ និងសហប្រតិបត្តិការពន្ធដារអន្តរជាតិ នៃអគ្គនាយកដ្ឋានពន្ធដារ បានលើកឡើងថាៈ អ្នកជាប់កាតព្វកិច្ចបង់ពន្ធ ត្រូវច្បាប់តម្រូវឱ្យលក្ខខណ្ឌ ដោយទុកពេលឱ្យ ៣០ ថ្ងៃ សម្រាប់ការទាមទារ។ មិនអាចដាក់ពាក្យបណ្តឹងតវ៉ា ជាសមូហភាពឡើយ លើកលែងតែអ្នកតវ៉ា ត្រូវបានកំណត់ដោយពន្ធដាររួម។
មន្ត្រីពន្ធដារ បានបន្ថែមថាៈ ប្រជាពលរដ្ឋ ឬអ្នកជាប់ពន្ធទាំងឡាយ ពុំពេញចិត្តនឹងការ កំណត់ពន្ធ ឬវិធានការផ្សេង របស់មន្ត្រីពន្ធដារ គឺពួកគាត់ដាក់ពាក្យបណ្តឹងតវ៉ា ដោះស្រាយបាន នៅតាមសាខាពន្ធដារ ឬតាមប្រព័ន្ធអនឡាញ ប្រសិនពួកគាត់ យល់ថា មិនត្រឹមត្រូវ អយុត្តិធម៌ ចំពោះកាតព្វកិច្ចបង់ពន្ធ ណាមួយនោះ។
លោក សេង ជាសិទ្ធ បានបញ្ជាក់ទៀតថាៈ ពាក្យបណ្តឹង ត្រូវចុះហត្ថលេខលើពាក្យតវ៉ា ដោយអ្នកតវ៉ាផ្ទាល់ ឬតំណាងស្របច្បាប់ ដោយមានលាយលាក់ជាអក្សរ ខ្លឹមសារ និងព័ត៌មានគ្រប់ជ្រុងជ្រាយ។ ចំពោះនីតិវិធីការដោះស្រាយបណ្តឹងតវ៉ារបស់ពន្ធដារ គឺចុះបញ្ជី និងគ្រប់គ្រងបណ្តឹងតវ៉ា ពិនិត្យរបាយការណ៍បំភ្លឺ ដែលធ្វើឡើង ដោយអង្គភាព ពាក់ព័ន្ធ និងអង្គភាពប្រមូលពន្ធ អង្កេតដើមហេតុនៃបណ្តឹង ការសម្រេចលើបណ្តឹងតវ៉ា និងជូនដំណឹងពីសេចក្តីសម្រេចដោះស្រាយបណ្តឹង។ ព្រោះតែចង់បានមតិយោបល់ ធាតុចូលសំខាន់ៗរបស់អ្នកជាប់ពន្ធ ទើបអគ្គនាយកដ្ឋានពន្ធដារ បង្កើតឱ្យមានជា សិក្ខាសាលា ស្តីពីពន្ធលើប្រាក់បៀវត្ស ការដោះស្រាយបណ្ដឹងតវ៉ាពន្ធដារ និងការអនុវត្ត កិច្ចព្រមព្រៀង ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធ ពាក់ព័ន្ធនឹងពន្ធលើប្រាក់ចំណូល។
មន្ត្រីពន្ធដារ រំពឹងថា ផ្តល់អត្តប្រយោជន៍ដល់អ្នកជាប់ពន្ធ បង្កើនការគៀងគរថវិកាចំណូល ពន្ធដារជូនរដ្ឋ និងបង្កលក្ខណៈងាយស្រួលដល់អភិវឌ្ឍន៍ប្រទេសជាតិ និងធានាបាន ភាពច្បាស់លាស់ និងភាពគ្រប់ជ្រុងជ្រាយ សំដៅធ្វើយ៉ាងណាទប់ស្កាត់ការគេចវេស មិនបង់ពន្ធ ដោយអនុលោកតាមច្បាប់សារពើពន្ធ។
លោកស្រី ឈី វ៉ា អភិបាលស្តីទីខេត្តកោះកុង ទទួលស្គាល់ពីសារៈសំខាន់ នៃការធ្វើ បទបង្ហាញនីតិវិធីច្បាប់ពន្ធដារ ដល់ភាគីពាក់ព័ន្ធទាំងអស់ក្នុងខេត្ត ដើម្បីជាពុទ្ធិថ្មី បន្ថែមយកទៅអនុវត្ត ប្រកដោយប្រសិទ្ធភាព។
លោកស្រី សង្ឃឹមថាៈ ខ្លឹមសារនៃច្បាប់នីមួយៗ ផ្តល់សារៈប្រយោជន៍ សម្រាប់ប្រជាពលរដ្ឋ មន្ត្រីរាជការ អាជីវករ និងពាណិជ្ជករ អាចទទួលយកទៅអនុវត្តបន្ត ប្រកបដោយប្រសិទ្ធភាព ក្នុងការបំពេញកាតព្វកិច្ចសារពើពន្ធជូនរដ្ឋ។
លោកស្រី អភិបាលស្តីទីខេត្តកោះកុង ស្នើឱ្យមានភាគីពាក់ព័ន្ធ បង្កើនការយកចិត្តទុក ដាក់ខ្ពស់ ហើយបន្តពង្រឹងកិច្ចសហការ ជាមួយសាខាពន្ធដារខេត្តកោះកុង ដើម្បីជួយជំរុញម្ចាស់សហគ្រាស ដែលប្រកបអាជីវកម្ម នៅក្នុងមូលដ្ឋានរបស់ខ្លួន ទៅចុះបញ្ជីពន្ធដារ និងបំពេញកាតព្វកិច្ច បង់ពន្ធជូនរដ្ឋ ឱ្យបានត្រឹមត្រូវតាមច្បាប់កំណត់ ជៀសវាងការទទួលរងនូវទោសទណ្ឌ ដែលមានចែង ក្នុងច្បាប់ស្តីពីសារពើពន្ធ។
តាមរបាយាការណ៍ លទ្ធផលប្រមូលពន្ធដារ ខេត្តកោះកុង បង្ហាញថា ក្នុងរយៈពេល ៨ខែ នៃឆ្នាំ២០២២ ខេត្តទទួលបានចំណូល ១២.៧៧៨ លានរៀល។ ដោយឡែក នៅឆ្នាំ២០២១ ទទួលចំណូលប្រាក់ពន្ធ ១៣.៨៦១ លានរៀល៕ V / N