Views: 2
ដោយ:ពៅនិមល/ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម សហការអង្គភាពប្រយុទ្ធប្រឆាំងអំពើពុករលួយ បានរៀបចំវគ្គបណ្តុះបណ្តាលស្តីពី ច្បាប់ស្តីពីការប្រឆាំងអំពើពុករលួយ ការស៊ើបអង្កេត នីតិវិធី និងបទពិសោធន៍ល្អៗ ដល់មន្ត្រីនគរបាលយុត្តិធម៌ នៃអគ្គនាយកដ្ឋាន ក.ប.ប. ដើម្បីការពារផលប្រយោជន៍អ្នកប្រើប្រាស់ និងជំរុញឱ្យការធ្វើពាណិជ្ជកម្មនៅកម្ពុជាប្រព្រឹត្តទៅប្រកបដោយសមធម៌ និងយុត្តិធម៌។
នៅក្នុងពិធីបើកវគ្គបណ្តុះបណ្តាល កាលពីព្រឹកថ្ងៃទី៩ ខែសីហា ឆ្នាំ២០២២នេះ នៅអគ្គនាយកដ្ឋាន ក.ប.ប. លោកកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រយុទ្ធប្រឆាំងអំពើពុករលួយ បានមានប្រសាសន៍ថា គោលបំណងនៃសិក្ខាសាលានេះ ដើម្បីចែករំលែកចំណេះដឹង បទពិសោធ និងពង្រឹងសមត្ថភាពមន្ត្រីពាក់ព័ន្ធតាមរយៈការពិភាក្សាលើប្រធានបទសំខាន់ៗមួយចំនួន ដូចជា៖ច្បាប់ស្តីពីការប្រឆាំងអំពើពុករលួយ, ការស៊ើបអង្កេតបទល្មើសពុករលួយ និងការកសាងសំណុំរឿងបញ្ជូនទៅតុលាការ, វឌ្ឍនភាព បញ្ហាប្រឈម និងកិច្ចសហការក្នុងការស៊ើបអង្កេតបទល្មើសសម្អាតប្រាក់ និងបទល្មើសការប្រើប្រាស់ និងការក្លែងបន្លំក្នុងអាជីវកម្មមិនត្រឹមត្រូវ។
លោកបណ្ឌិតបានលើកឡើងថា ដើម្បីប្រយុទ្ធប្រឆាំងអំពើពុករលួយប្រកបដោយប្រសិទ្ធភាព អង្គភាពប្រឆាំងអំពើពុករលួយបានអនុវត្តវិធានការប្រទាក់ក្រឡាគ្នាចំនួនចំនួន៣គឺ ១.ការអប់រំ ២.ការបង្ការ-ទប់ស្កាត់ និង៣.ការអនុវត្តច្បាប់បង្ក្រាបបទល្មើស។ លោកបន្តថា តាមរយៈការអនុវត្តការងារប្រឆាំងអំពើពុករលួយនាពេលកន្លងមក សង្គមកម្ពុជាបានមានការផ្លាស់ប្តូរមួយចំនួនពាក់ព័ន្ធនឹងអំពើពុករលួយ ហើយអង្គភាពប្រឆាំអំពើពុករលួយ ក៏ទទួលបាននូវបទពិសោធន៍ល្អៗជាច្រើនផងដែរ ទាំងការអនុវត្តវិធានការអប់រំ បង្ការ-ទប់ស្កាត់ និងការបង្ក្រាបបទល្មើស តាមរយៈការស៊ើបអង្កេត និងកសាងសំណុំរឿងពុករលួយបញ្ជូនទៅតុលាការ។
លោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានក.ប.ប. មានប្រសាសន៍ថាដើម្បីឱ្យការអនុវត្តច្បាប់ទទួលបាននូវប្រសិទ្ធភាព និងប្រសិទ្ធផល ទើប ក.ប.ប. គោរពស្នើសុំកិច្ចសហការពីអង្គភាពប្រយុទ្ធប្រឆាំងអំពើពុករលួយ ពិសេសការទទួលបាននូវព័ត៌មានសំខាន់ៗពីបណ្តាប្រព័ន្ធនានា ពាក់ព័ន្ធនឹងករណីស្រាវជ្រាវ និងកំណត់បទល្មើសស្តីពីការប្រកួតប្រជែងមិនស្មោះត្រង់ និងបទល្មើសផ្សេងទៀត។
ក្នុងឱកាសនោះ លោកអគ្គនាយក បានបញ្ជាក់ជូនអង្គប្រជុំថា អគ្គនាយកដ្ឋាន ក.ប.ប. ត្រូវបានរាជរដ្ឋាភិបាលកម្ពុជា ប្រគល់តួនាទីនិងភារកិច្ច ឱ្យស្រាវជ្រាវ រៀបចំ កសាង គោលនយោបាយ និងផែនការយុទ្ធសាស្ត្រពាក់ព័ន្ធនឹងគុណភាព សុវត្ថិភាពលើផលិតផលទំនិញ និងសេវា ការពារអ្នកប្រើប្រាស់និងកិច្ចការប្រកួតប្រជែង ត្រួតពិនិត្យទំនិញនិងសេវា ទាំងក្នុងក្របខ័ណ្ឌទទួលខុសត្រូវផ្ទាល់ និងកិច្ចសហប្រតិបត្តបត្តិការ ទប់ស្កាត់និងបង្ក្រាបការក្លែងបន្លំពាណិជ្ជកម្ម ចាត់វិធានការចំពោះការព្រមព្រៀងដែលរិតត្បិត រារាំង ឬបង្ខូចដល់ការប្រកួតប្រជែង ធានាគុណភាព សុវត្ថិភាព និងអនុលោមភាពនៃផលិតផលទំនិញនិងសេវា ទីផ្សារប្រកួតប្រជែង និងការពារសិទ្ធិនិងផលប្រយោជន៍របស់អ្នកប្រើប្រាស់។
លោកបន្តថា ដើម្បីអនុវត្តតួនាទី និងភារកិច្ចខាងលើ អគ្គនាយកដ្ឋាន ក.ប.ប. មានមូលដ្ឋានគ្រឹះសំខាន់ៗ ដូចជា៖ ១.រចនាសម្ព័ន្ធទន់៖ អគ្គនាយកដ្ឋាន ក.ប.ប. មានមូលដ្ឋានច្បាប់ចំនួន៤ ដែលបានផ្តល់សិទ្ធិឱ្យអនុវត្តគឺ ច្បាប់ស្តីពីការគ្រប់គ្រងគុណភាព សុវត្ថិភាពលើផលិតផលទំនិញ និងសេវា, ច្បាប់ស្តីពីកិច្ចការពារអ្នកប្រើប្រាស់, ច្បាប់ស្តីពីការប្រកួតប្រជែង និងច្បាប់ស្តីពីសុវត្ថិភាពម្ហូបអាហារ។ ក្រៅពីនោះ នៅមានឯកសារគតិយុត្តជាច្រើនទៀតមានដូចជា៖ អនុក្រឹត្យ សេចក្តីសម្រេច ប្រកាសអន្តរក្រសួង ប្រកាស គោលការណ៍ណែនាំជាដើម ដែលបើកផ្លូវឱ្យមន្ត្រីជំនាញ នៃអគ្គនាយកដ្ឋានក.ប.ប. យកទៅអនុវត្តដើម្បីកំណត់បទល្មើស និងចាត់វិធានការសមស្របនានានិង២.រចនាសម្ព័ន្ធរឹង៖អគ្គនាយកដ្ឋាន ក.ប.ប. មានមន្ទីរពិសោធន៍នៅថ្នាក់កណ្តាល ដែលមានបំពាក់ឧបករណ៍វិភាគគីមីសាស្ត្រមីក្រូជីវសាស្ត្រលើផលិតផលផលម្ហូបអាហារ និងឧបករណ៍វិភាគគុណភាពប្រេងឥន្ធនៈ និងរបស់របរប្រើប្រាស់មួយចំនួន។ បន្ថែមលើនេះ អគ្គនាយកដ្ឋានក៏មានមន្ទីរពិសោធន៍ខ្នាតតូចនៅតាមបណ្តាសាខា ក.ប.ប.ខេត្តចំនួន ១៥ និងរថយន្តពិសោធន៍ចល័តផ្នែកម្ហូបអាហារនិងប្រេងឥន្ធនៈចំនួន៨ សម្រាប់គាំទ្រដល់ការងារត្រួតពិនិត្យ។
សូមជម្រាបថា សិក្ខាសាលាផ្សព្វផ្សាយច្បាប់ ស្តីពីការប្រឆាំងអំពើពុករលួយ ការស៊ើបអង្កេត នីតិវិធី និងបទពិសោធន៍ល្អៗ ដល់មន្ត្រីនគរបាលយុត្តិធម៌នៃអគ្គនាយកដ្ឋាន ក.ប.ប. មានរយៈពេល២ថ្ងៃ គឺថ្ងៃទី៩ និងទី១០ ខែសីហា ឆ្នាំ២០២២៕srn