Views: 4
ដោយ៖ ដេប៉ូ / ភ្នំពេញ៖ ក្រុមអភិរក្សដំរីព្រៃនៅកម្ពុជា (CECG) ត្រូវបានបង្កើតឡើង នៅឆ្នាំ២០០៥ ដោយមានការចូលរួមពី ក្រសួងបរិស្ថាន រដ្ឋបាលព្រៃឈើ និងអង្គការសត្វព្រៃ និងរុក្ខជាតិអន្តរជាតិ និងអង្គការផ្សេងៗទៀត ដើម្បីអភិរក្សដំរីអាស៊ី នៅកម្ពុជា តាមរយៈការរក្សាស្ថិរភាព និងជំរុញឱ្យមានកំណើន ចំនួនប្រភេទសត្វដំរីនេះ នៅក្នុងព្រៃនៃប្រទេសកម្ពុជា ហើយផែនការសកម្មភាព ដើម្បីអភិរក្សសត្វដំរីអាស៊ី ឱ្យនៅគង់វង្ស ត្រូវបានរៀបចំឡើង សម្រាប់រយៈពេល ១០ ឆ្នាំ ពោលគឺ ចាប់ពីឆ្នាំ២០២០ ដល់ឆ្នាំ២០២៩។
ការថ្លែងបែបនេះ ធ្វើឡើងដោយលោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យ ក្រសួងបរិស្ថាន ក្នុងសន្និសីទសារព័ត៌មាន ស្តីពីយុទ្ធនាការអន្ទាក់សូន្យ ដែលបានរៀបចំឡើង នាខេត្តកំពង់ធំ កាលពីថ្ងៃទី១១ ខែសីហា ឆ្នាំ២០២២។
លោក រដ្ឋលេខាធិការ បានគូសបញ្ជាក់ថាៈ រាជរដ្ឋាភិបាលកម្ពុជា តាមរយៈក្រសួងបរិស្ថាន ជាមួយអង្គការដៃគូ ខិតខំរៀបចំផែនការសកម្មភាព ដើម្បីអភិរក្សសត្វដំរីអាស៊ី។
លោកបានបញ្ជាក់បន្ថែមថាៈ តាមរយៈការអភិរក្សសត្វដំរីនេះដែរ គេបានកំណត់នូវ បញ្ហាអាទិភាពចំនួន ៧ ក្នុងនោះរួមមាន ទី១៖ ការកាត់បន្ថយការបាត់បង់ទីជម្រក, ទី២៖ អភិរក្សនិងតភ្ជាប់ច្រករបៀង និងហ្វូងដំរីព្រៃឡើងវិញ, ទី៣៖ ពង្រឹងការអនុវត្តច្បាប់, ទី៤៖ បង្ការមិនឱ្យមានការចាប់ដំរីព្រៃ មកចិញ្ចឹម, ទី៥៖ បន្ធូរបន្ថយជម្លោះ រវាងសត្វដំរីព្រៃ និងមនុស្ស និងទី៦៖ អប់រំផ្សព្វផ្សាយ ទី៧៖ សិក្សាស្រាវជ្រាវ និងតាមដានត្រួតពិនិត្យ ចំនួនដំរីអាស៊ី។ តាមរយៈផែនការសកម្មភាពនេះ ក្រសួងបរិស្ថាន និងអង្គការដៃគូ បានរកឃើញថា ដំរីចាប់ផ្តើមបង្ហាញវត្តមាន នៅតំបន់មួយចំនួនឡើងវិញ ដូចជានៅតំបន់ ដែនជម្រកសត្វព្រៃ ព្រៃឡង់ជាដើម។
គួរបញ្ជាក់ថា យោងតាមការប៉ាន់ស្មាន ផែនការសកម្មភាព រយៈពេល ១០ ឆ្នាំ ដើម្បីអភិរក្ស សត្វដំរីព្រៃអាស៊ីនេះ ត្រូវការថវិកាចំនួន ៤០,៥ លានដុល្លារសហរដ្ឋអាមេរិក ដែលជាគម្រោងថវិកា រំពឹងថានឹងបានមកពីប្រភព រួមបញ្ចូលគ្នា ទាំងកញ្ចប់ថវិកា រាជរដ្ឋាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍នានា។
លោក រដ្ឋលេខាធិការក្រសួងបរិស្ថាន បានបង្ហាញសុទិដ្ឋិនិយមថា ជាមួយនឹងផែនការ អភិរក្ស សត្វដំរី ការដោះស្រាយជម្លោះ រវាងមនុស្សនិងដំរី និងការខិតខំប្រឹងប្រែងរបស់ រាជរដ្ឋាភិបាល និងដៃគូអភិវឌ្ឍន៍ លើការងារការពារ និងអភិរក្សតំបន់ការពារធម្មជាតិ នោះនឹងកាន់តែធ្វើឱ្យទីជម្រក របស់សត្ចដំរី កាន់តែមានសុវត្ថិភាព រួមនឹងការយល់ដឹង និងការចូលរួមអភិរក្ស ពីសំណាក់ប្រជាពលរដ្ឋផងដែរ។ ក្រៅពីក្របខណ្ឌអភិរក្ស រាជរដ្ឋាភិបាលកម្ពុជា មានការតាំងចិត្តខ្ពស់ ក្នុងការប្រយុទ្ធប្រឆាំង ការជួញដូរសត្វព្រៃ ខុសច្បាប់ និងលើកឡើងថា គ្រប់ភាគីពាក់ព័ន្ធ ត្រូវធ្វើការងាររួមគ្នា ដើម្បីលុបបំបាត់ ការជួញដូរ ខុសច្បាប់នេះ។
ទាក់ទិនក្នុងរឿងនេះដែរ លោក នេត្រ ភក្ត្រា បានថ្លែងថាៈ កម្ពុជា បានរៀបចំយន្តការ ក៏ដូចជា មានច្បាប់ និងអនុវត្តជាប្រចាំ ដើម្បីបង្ការ ទប់ស្កាត់ និងប្រឆាំងការជួញដូរសត្វព្រៃ ខុសច្បាប់នេះ ហើយបានបង្ក្រាបលើបទល្មើសជាច្រើន ហើយរំដោះសត្វព្រៃជាច្រើន ពីក្រញាំដៃ នៃក្រុមជនល្មើស ព្រមទាំងបានចាប់ខ្លួន បញ្ជូនសំណុំរឿង ទៅតុលាការ ផ្តន្ទាទោសតាមច្បាប់ ក៏ដូចជា ការផាកពិន័យជាប្រាក់ជាដើម៕/V