Views: 8
ប្រែសម្រួលៈបំណង(ស្ត្រេតថែមស៍)៖ រុស្ស៊ីបាននិយាយកាលពីថ្ងៃសៅរ៍ថា ទាហានរបស់ខ្លួនបានបោះបង់ចោលមូលដ្ឋានរបស់ពួកគេនៅទីក្រុងលីម៉ាន(Lyman)នៅអ៊ុយក្រែនខាងកើតដោយសារខ្លាចត្រូវកងកម្លាំងអ៊ុយក្រែនឡោមព័ទ្ធ ហើយមេដឹកនាំតំបន់ឆេចឈ្នីម្នាក់ដែលជាសម្ពន្ធមិត្តជិតដិតបំផុតរបស់ពូទីន បាននិយាយថារដ្ឋាភិបាលទីក្រុងមូស្គូគួរពិចារណាប្រើសព្វាវុធនុយក្លេអ៊ែរកម្លាំងខ្សោយមួយជាការឆ្លើយតប។
ការបាត់បង់ទីប្រជុំជននេះជាការដើរថយក្រោយធំមួយសំរាប់រដ្ឋាភិបាលទីក្រុងមូស្គូបន្ទាប់ពីប្រធានាធិបតីវ្ល៉ាឌីមៀ ពូទីនប្រកាសតំបន់ចំនួនបួននៅអ៊ុយក្រែនខាងកើតដែលកងកម្លាំងគាត់ទើបវាយកាន់កាប់ដាក់ជាឧបសម្ពន្ធ(បញ្ចូលជាផ្នែក)របស់រុស្ស៊ីក្នុងពិធីមួយកាលពីថ្ងៃសុក្រដែលរដ្ឋាភិបាលទីក្រុងគៀវនិងលោកខាងលិចថ្កោលទោស។
ក្រសួងការពារជាតិរុស្ស៊ីបាននិយាយថា « កងកម្លាំងសម្ពន្ធមិត្តបានដកចេញពីនិគមនជនលីម៉ាន ទៅកាន់ខ្សែត្រៀមមានប្រៀបជាងដោយសារមានហានិភ័យពីការឡោមព័ទ្ធ»។
សេចក្តីថ្លែងការណ៍នេះបានបញ្ចប់ភាពស្ងប់ស្ងាត់ផ្លូវការរាប់ម៉ោងពីទីក្រុងមូស្គូ បន្ទាប់ពីរដ្ឋាភិបាលទីក្រុងគៀវដំបូងបាននិយាយថា ខ្លួនបានឡោមព័ទ្ធទាហានរុស្ស៊ីនៅក្នុងតំបន់នេះនិងបន្ទាប់មកថាកងកម្លាំងរបស់ខ្លួនបានចូលក្នុងក្រុងលីម៉ាន។
ទាហានអ៊ុយក្រែនត្រដាងទង់ជាតិអ៊ុយក្រែននៅច្រកចូលទីក្រុងក្នុងតំបន់ដូណិតសខ៍
ទាហានអ៊ុយក្រែនបង្ហាញទាហានសត្រូវដែលត្រូវបានចាប់ខ្លួន
រ៉ាមហ្សាន់ កាឌីរ៉ូវ (Ramzan Kadyrov) មេដឹកនាំតំបន់ឆេចឈ្នី ដែលបានពណ៌នាខ្លួនឯងថាជាមនុស្សជំនិតក្រៅផ្លូវការរបស់ពូទីន បាននិយាយថាលោកមិនអាចនៅស្ងៀមបានតទៅទៀតទេក្រោយពីរដ្ឋាភិបាលទីក្រុងមូស្គូបោះបង់ចោលទឹកដីនេះ ដែលរដ្ឋាភិបាលទីក្រុងមូស្គូបានប្រកាសថាជាផ្នែករបស់រុស្ស៊ីកាលពីមួយថ្ងៃមុននេះ។
កាឌីរ៉ូវ បានសរសេរបង្ហោះក្នុងតេឡេក្រាមថា «តាមមតិផ្ទាល់របស់ខ្ញុំ គួរគិតគូរអំពីវិធានការគំហ៊ុកខ្លាំងឡើង ដូចជាប្រកាសច្បាប់អាជ្ញាសឹកនៅតំបន់ព្រំដែននិងប្រើសព្វាវុធនុយក្លេអ៊ែរកំលាំងខ្សោយ»។
អ្នកនាំពាក្យក្រសួងការពារជាតិអ៊ុយក្រែនបាននិយាយថាការដណ្តើមបានទីក្រុងលីម៉ានអនុញ្ញាតអោយកងកម្លាំងរបស់រដ្ឋាភិបាលទីក្រុងគៀវរុលចូលតំបន់លូហាន់សខ៍ ដែលរដ្ឋាភិបាលទីក្រុងមូស្គូប្រកាសការគ្រប់គ្រងទាំងស្រុងកាលពីដើមខែកក្កដា។លោកថា«លីម៉ានសំខាន់ដោយសារវាជាជំហានបន្ទាប់ឆ្ពោះទៅរំដោះតំបន់ដុនបាសរបស់អ៊ុយក្រែន។វាជាឳកាសមួយដើម្បីចូលទៅកាន់តំបន់ក្រេមីនណា(Kreminna)និងស៊ីវីរ៉ូដូណិតសខ៍(Sievierodonetsk) ហើយវាសំខាន់ណាស់ខាងចិត្តសាស្ត្រផងដែរ»។
សូមបញ្ជាក់ថា តំបន់ដូណិតសខ៍និងលូហាន់សខ៍ រួមគ្នាបង្កើតបានជាតំបន់ដុនបាសធំមួយនៅអ៊ុយក្រែនខាងកើត ដែលជាចំណុចផ្តោតជាសំខាន់នៃការវាយកាន់កាប់របស់កងកម្លាំងរុស្ស៊ីចាប់តាំងពីពេលរុស្ស៊ីបើកប្រតិបត្តិការយោធាពិសេសចូលអ៊ុយក្រែនកាលពថ្ងៃ២៤កុម្ភៈ។
លោកពូទីន បានប្រកាសដាក់តំបន់ដូណិតសខ៍ និងលូហាន់សខ៍ ព្រមទាំងឃើសុននិងហ្សាប៉ូរីហ្ស៍យ៉ាជាផ្នែកមួយនៃទឹកដីរុស្ស៊ីកាលពីចុងសប្តាហ៍ហើយមុននោះពីរបីថ្ងៃលោកបានព្រមានទុកថាលោកមិនខ្លាចប្រើសព្វាវុធដែលរុស្ស៊ីមាន(នុយក្លេអ៊ែរ)ដើម្បីការពារទឹកដីរុស្ស៊ីទេ៕
