Views: 9
ដោយ៖ សុវណ្ណកុម្ភៈ / ភ្នំពេញ៖ ព្រឹត្តិការណ៍រត់ម៉ារ៉ាតុងចក្រភពខ្មែរ ដែលធ្វើនៅខេត្តសៀមរាប ថ្ងៃទី៧ សីហា ម្សិលមិញ លើវិញ្ញាសា ៤២គីឡូម៉ែត្រ ផ្នែកនារី លេខ១ កីឡាការិនី Lee Elaine មកពីហុងកុង លេខ២ កីឡាការិនី FUkunari Mizuki និងលេខ៣ កីឡាការិនី Marada Tamae ដែលជ័យលាភីទាំងពីរ មកពីជប៉ុន។
ចំពោះបុរស លេខ១ កីឡាករកម្ពុជា សម រចនា លេខ២ កីឡាករមកពីអេស្ប៉ាញ Ruis lucas Juan jose និងលេខ៣ កីឡាករជប៉ុន Torii Masaru Torii។ជ័យលាភីលើវិញ្ញាសា ២១គីឡូម៉ែត្រ ផ្នែកនារី លេខ១ កីឡាការិនីអាល្លឺម៉ង់ Distler Nicole លេខ២ កីឡាការិនីចក្រភពអង់គ្លេស Camwath Sarah និងលេខ៣ កីឡាការិនីអេស្ប៉ាញ Camrarena Soraya ខណៈផ្នែកបុរស លេខ១ កីឡាករកម្ពុជា អ៊ុក ហ្វារីត លេខ២ កីឡាករអាល្លឺម៉ង់ Schubert Jonas និងលេខ៣ កីឡាករកម្ពុជា Moeun Em។
ចំពោះវិញ្ញាសា ១០គីឡូម៉ែត្រ ផ្នែកនារី លេខ១ កីឡាការិនីកម្ពុជា ថន សុម៉ាវត្តី លេខ២ កីឡាការិនីកម្ពុជា ផល ស្រីផួង និងលេខ៣ កីឡាការិនីជប៉ុន Saito Masako ផ្នែកបុរស លេខ១ កីឡាករកម្ពុជា កាំង ធឿន លេខ២ កីឡាករកម្ពុជា សំ ពិសី និងលេខ៣ កីឡាករកម្ពុជា សាត ណានវីរៈយុទ្ធ។
លោក សែម ផល្លា នាយកចាត់ការទូទៅ ទិវាម៉ារ៉ាតុងចក្រភពខ្មែរ បានមានប្រសាសន៍ថាៈ ទិវានេះ មានអ្នកចុះឈ្មោះចូលរួមរត់ប្រណាំង ចំនួន ២.១០០ នាក់ ក៏ប៉ុន្តែចំនួនជាក់ស្តែង គឺលើសពីនេះ ដោយសារការរត់លក្ខណៈគ្រួសារ មានអ្នករត់ ខ្លះនាំកូនមករត់ជាមួយ ហើយគណៈកម្មការ បានអនុគ្រោះឲ្យចូលរួមរត់ ដោយមិនមានពាក់ស្លាកលេខសម្គាល់ ដើម្បីផ្តល់ភាពសប្បាយរីករាយ ជូនដល់ពួកគាត់។ ម្យ៉ាងទៀតនេះ ជាសញ្ញាវិជ្ជមានមួយ សម្រាប់ការស្តារឡើងវិញនូវទិវាកីឡាទេសចរណ៍អន្តរជាតិ នៅតំបន់អង្គរ ខេត្តសៀមរាបនេះ។
លោកបានវាយតម្លៃខ្ពស់ ចំពោះការរៀបចំ និងការចូលរួម របស់អ្នករត់ប្រណាំងទាំងអស់ ដោយបានចាប់ផ្តើម តាំងពីម៉ោង ៤:៣០ នាទីទៀបភ្លឺ លើវិញ្ញាសា ៤២.១៩៥គីឡូម៉ែត្រ រួមទាំងវិញ្ញាសា ២១គីឡូម៉ែត្រ ១០គីឡូម៉ែត្រ និងរត់កម្សាន្ត ៣គីឡូម៉ែត្រ ។
លោក សែម ផល្លា បានបន្ដថាៈ «ជារួម យើងបូកសរុប ទៅលើទិវារត់ប្រណាំងម៉ារ៉ាងតុង ចក្រភពខ្មែរ លើកទី៧ ឆ្នាំ២០២២ នេះ ទាំងមូល គឺយើងទទួលបានជោគជ័យ ពោលគឺ ការរៀបចំរបស់យើង បានដំណើរការដោយរលូន។ ទិដ្ឋភាពរៀបចំ ក៏ស្អាត អាជ្ញាធរខេត្ត ស្ថាប័នពាក់ព័ន្ធ ជាពិសេសឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិ អូឡាំពិកកម្ពុជា តំណាងឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ក៏បានអញ្ជើញផ្តល់ការលើកទឹកចិត្ត ដ៏ខ្ពង់ខ្ពស់ផងដែរ»។
លោកបានរំឭកថាៈ កាលពីទិវាម៉ារ៉ាតុង ឆ្នាំ២០១៩ ចំនួនអ្នករត់បានចូលរួមជាង ៤.០០០ នាក់ ហើយនៅឆ្នាំ២០២២ នេះ ចំនួនអ្នកចូលរួមបានជាង ២.០០០ នាក់ ដោយសារភ្ញៀវអន្តរជាតិ មិនទាន់អាចចូលរួមបានទូលំទូលាយ ដូចកាលមុនពេលកូវីដ-១៩៕/V