Views: 4
ប្រែសម្រួលៈបំណង(ស្ត្រេតថែមស៍)៖ នាវាចម្បាំងចិននិងតៃវ៉ាន់បាន«លេងល្បែងឆ្មាចាប់កណ្តុរ»កាលពីថ្ងៃអាទិត្យទី៧សីហា នៅពេលតែពេលតែប៉ុន្មានម៉ោងមុន សមយុទ្ធយោធាទ្រង់ទ្រាយធំរយៈពេលបួនថ្ងៃរបស់កងទ័ពរំដោះប្រជាជនចិនចប់នៅថ្ងៃអាទិត្យនេះ។
នាវាតៃវ៉ាន់ Lan Yangអាចមើលឃើញចេញពីនាវាចម្បាំងចិនក្នុងអំឡុងពេលសមយុទ្ធកាលពីថ្ងៃសុក្រទី៥សីហា
ដំណើរទស្សនកិច្ចរបស់ប្រធានសភាអាម៉េរិកលោកស្រីណាន់ស៊ី ផេឡូស៊ី បានធ្វើអោយចិនប៉េកាំងខឹងជាខ្លាំងដោយសារតែវារំលោភអធិបតេយ្យភាពចិននិងផ្គើននឹងការព្រមានជាបន្តបន្ទាប់ពីរដ្ឋាភិបាលក៏ដូចជាកងទ័ពចិន។ជាការឆ្លើយតប ចិនបានប្រកាសធ្វើសមយុទ្ធយោធាទ្រង់ទ្រាយធំបំផុតមិនដែនមាននៅជុំវិញកោះតៃវ៉ាន់ និងបានបាញ់កាំជ្រួចផ្លោងដោយមួយចំនួនហោះរំលងកោះប្រជាធិបតេយ្យនេះថែមទៀត។
កាលពីថ្ងៃអាទិត្យ នាវាម្ខាងៗប្រមាណដប់គ្រឿងទៅពីចិននិងតៃវ៉ាន់ បានបើកជិតគ្នានៅក្នុងច្រកសមុទ្រតៃវ៉ាន់ដោយនាវាចិនឆ្លងកាត់ខ្សែបន្ទាត់កណ្តាលនៃច្រកសមុទ្រ នេះបើតាមប្រភពព័ត៌មានដែលដឹងរឿងនេះ។
មុននេះកាលពីថ្ងៃសៅរ៍ ក្រសួងយោធាតៃវ៉ាន់បាននិយាយថា នាវាចម្បាំង យន្តហោះប្រយុទ្ធ និងដ្រូនយោធាចិនបានធ្វើការហ្វឹកហាត់ហាក់ដូចជា ការវាយប្រហារព្រមគ្នាលើកោះនិងកងទ័ពជើងទឹករបស់តៃវ៉ាន់។
ប្រភពព័ត៌មានបាននិយាយថា នៅពេលកងកម្លាំងចិនប្រុងឆ្លងកាត់ខ្សែបន្ទាត់ដែលតៃវ៉ាន់គិតថាជាព្រំដែនខ័ណ្ឌផ្លូវទឹកនេះកាលពីថ្ងៃសៅរ៍ ភាគីតៃវ៉ាន់បានតាមដានជាប់ដើម្បីអាចរារាំងកុំអោយកងទ័ពចិនមានលទ្ធភាពឆ្លងចូល។ភាគីទាំងពីរបង្ហាញការអត់ធ្មត់ និងបានពណ៌ថាសមយុទ្ធនេះថាដូចជា«ល្បែងឆ្មាចាប់កណ្តុរ»មួយដោយភាគីម្ខាងព្យាយាមឆ្លងកាត់ និងម្ខាងទៀតនៅពាំងផ្លូវនិងបង្ខំអោយម្ខាងទៀតវិលចូលទៅវិញ។
ក្នុងពេលជាមួយគ្នា តៃវ៉ាន់បាននិយាយថា កាំជ្រួចប្រឆាំងនាវាតាំងលើឆ្នេរនិងកាំជ្រួចពីដីទៅអាកាសធុនភែតធ្រៀត( Patriot)របស់ខ្លួនត្រៀមជាស្រេច។
សមយុទ្ធរបស់ចិន នៅប្រាំមួយទីតាំងជុំវិញកោះតៃវ៉ាន់ បានចាប់ផ្តើមកាលពីថ្ងៃព្រហស្បតិ៍និងត្រូវបញ្ចប់នៅថ្ងៃត្រង់ថ្ងៃអាទិត្យទី៧សីហានេះ។យោធាចិនបាននិយាយកាលពីថ្ងៃសៅរ៍ថា ខ្លួនបានធ្វើសមយុទ្ធរួមរវាងកងទ័ពជើងទឹកនិងអាកាសនៅខាងជើង ខាងកើតនិងភាគនិរតីនៃកោះតៃវ៉ាន់ ដោយផ្តោតជាសំខាន់លើសមត្ថភាពវាយប្រហារលើគោលដៅក្នុងសមុទ្រនិងលើគោក។
អាម៉េរិកបានហៅសមយុទ្ធនេះថាជា«សកម្មភាពកាន់តែធ្វើអោយសភាពការណ៍អាក្រក់ឡើងក្នុងកិច្ចខិតខំផ្លាស់ប្តូរស្ថានការណ៍ជាក់ស្តែង បង្ករឿង មិនទទួលខុសត្រូវនិងបង្កើនហានិភ័យនៃការគិតគូរខុស»។តែចិនបាននិយាយថា លំហាត់យោធានេះត្រូវបានធ្វើឡើងក្នុងអធិបតេយ្យភាពទឹកដីរបស់ខ្លួននិងជាការឆ្លើយតបទៅនឹងការជ្រៀតជ្រែកកិច្ចការផ្ទៃក្នុងចិន ដោយសារតែអាម៉រិកសមគំនិតជាមួយកម្លាំងគាំទ្រឯករាជ្យតៃវ៉ាន់ លេងល្បិចនយោបាយប្រឆាំងខ្លួន។
ចិនក៏ព្រមានអាម៉េរិក«កុំអោយលលេងជាមួយភ្លើង កុំប្រញាប់ច្រឡោតនិងបង្កវិបត្តិធំឡើង »ហើយថាទំនាក់តំនងរបស់ខ្លួនជាមួយតៃវ៉ាន់ជាបញ្ហាផ្ទៃក្នុងមួយ និងខ្លួនរក្សាសិទ្ធិនាំកោះនេះមកនៅក្រោមការគ្រប់គ្រងរបស់ខ្លួន និងអាចប្រើកម្លាំងក្នុងករណីចាំបាច់៕