Views: 1
ប្រែសម្រួលៈបំណង(ដេល្លីម៉េល)៖នាវាដឹកយន្តហោះអាម៉េរិកមួយ រួមទាំងក្រុមប្រយុទ្ធរបស់វាបានចាប់ផ្តើមលំហាត់យោធាជាមួយក្រុមនាវាចម្បាំងកូរ៉េខាងត្បូងនៅថ្ងៃចន្ទទី២៦កញ្ញានេះនៅឯនាយឆ្នេរខាងកើតនៃឧបទ្វីបកូរ៉េ នៅក្នុងសមយុទ្ធយោធារួមគ្នាទ្រង់ទ្រាយធំដូច្នេះលើកដំបូងក្នុងរយៈពេលប្រឆ្នាំមកនេះ ។
វាកើតឡើងតែមួយថ្ងៃបន្ទាប់ពីកូរ៉េខាងជើងបាញ់សាកល្បងកាំជ្រួចផ្លោងចម្ងាយខ្លីមួយដែលទំនងជាការឆ្លើយតបនឹងសមយុទ្ធនេះ។
កូរ៉េខាងជើងអាចធ្វើការសាកល្បងបន្ថែមនៅប៉ុន្មានថ្ងៃខាងមុខនៅពេលខ្លួនចាត់ទុកសមយុទ្ធយោធារវាងអាម៉េរិកនិងកូរ៉េខាងត្បូងថាជាការហាត់សមសំរាប់ការឈ្លានពានណាមួយនិងច្រើនតែប្រតិកម្មជាមួយនឹងការបង្ហាញសព្វាវុធដែលរចនាឡើងសំរាប់វាយប្រហារសត្រូវ។
លំហាត់យោធារយៈពេលបួនថ្ងៃនេះមានបំណងបង្ហាញសម្ពន្ធមិត្តអំពី«ការតាំងចិត្តដ៏ខ្លាំងក្លាក្នុងការឆ្លើយតបចំពោះការបង្ករឿងរបស់កូរ៉េខាងជើង»និងធ្វើអោយប្រសើរលទ្ធភាពរបស់គេក្នុងប្រតិបត្តិការកងទ័ពជើងទឹករួមគ្នា នេះបើតាមការបញ្ជាក់ពីកងទ័ពជើងទឹកកូរ៉េខាងត្បូង។
នាវាចម្បាំងអាម៉េរិកនិងកូរ៉េខាងត្បូងជាង២០គ្រឿង រួមមាននាវាដឹកយន្តហោះUSS Ronald Reagan យន្តហោះប្រយុទ្ធនិងឧទ្ធមភាគចក្រយោធាកំពុងចូលរួមក្នុងសមយុទ្ធនេះ។វាជាសមយុទ្ធរួមគ្នាធំដូច្នេះលើកដំបូង ដែលមានការចូលរួមពីនាវាដឹកយន្តហោះនៅក្បែរឧបទ្វីបកូរ៉េចាប់តាំងពីឆ្នាំ២០១៧ ដែលពេលនោះអាម៉េរិកបញ្ជូននាវាដឹកយន្តហោះដល់ទៅបី សំរាប់ការហ្វឹកហាត់ជាមួយកូរ៉េខាងត្បូងក្នុងការឆ្លើយតបទៅនឹងការសាកល្បងនុយក្លេអ៊ែរនិងកាំជ្រួចរបស់កូរ៉េខាងជើង។
សម្ពន្ធមិត្តទាំងពីចាប់តាំងពីពេលនោះមកបានលុបចោលឬបន្ថយទំហំលំហាត់យោធារួមគ្នារបស់គេដើម្បីគាំទ្រកិច្ចពិភាក្សាជាមួយកូរ៉េខាងជើងនិងដើម្បីការពារកុំអោយឆ្លងកូវីដ១៩៕
នាវាដឹកយន្តហោះអាម៉េរិកUSS Ronald Reaganចាកចេញពីកំពង់ផែនៅប៊ូសាន កូរ៉េខាងត្បូងកាលពីថ្ងៃចន្ទទី២៦កញ្ញា ដើម្បីធ្វើសមយុទ្ធជាមួយនាវាជាងម្ភៃគ្រឿងទៀតនៅនាយឆ្នេរឧបទ្វីបកូរ៉េ
ទាហានអាម៉េរិកត្រួតពិនិត្យយន្តហោះF/A-18 Super Hornetនៅលើឃ្លុបនៃនាវាដឹកយន្តហោះUSS Ronald Reagan