Views: 1
ដោយៈ មុនីរ័ត្ន / ភ្នំពេញៈ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានអនុគណៈកម្មការសន្តិសុខ សណ្តាប់ធ្នាប់ និងសង្គ្រោះបឋម បានសម្តែងនូវ សេចក្តីសោមនស្សរីករាយ និងសូមថ្លែងអំណរគុណ យ៉ាងជ្រាលជ្រៅ ចំពោះឧត្តមសសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាល រាជធានីភ្នំពេញ និងមន្ត្រីនគរបាល នៃស្នងការដ្ឋាននគរបាល រាជធានីភ្នំពេញ ដែលបានបំពេញភារកិច្ច យ៉ាងខ្ជាប់ខ្ជួន ក្នុងការពង្រឹងសន្តិសុខ សណ្តាប់ធ្នាប់ សាធារណៈ និងសុវត្ថិភាពសង្គម រួមចំណែកធ្វើឲ្យដំណើរការរៀបចំ កិច្ចប្រជុំកំពូលអាស៊ាន លើកទី៤០-៤១ និងកិច្ចប្រជុំពាក់ព័ន្ធឆ្នាំ២០២២ ប្រព្រឹត្តប្រកប ដោយសុវត្ថិភាព និងជោគជ័យ។ នេះបើយោងតាមលិខិតថ្លែងអំណរគុណ របស់នាយឧត្តមសេនីយ៍ សន្តិបណ្ឌិត នេត សាវឿន ជូនចំពោះឧត្តមសសេនីយ៍ឯក ស ថេត កាលពីថ្ងៃទី២៥ ខែវិច្ឆិកា ឆ្នាំ២០២២។
នាយឧត្តមសេនីយ៍ សន្តិបណ្ឌិត នេត សាវឿន បានបន្តថា កិច្ចខិតខំប្រឹងប្រែងយកចិត្តទុកដាក់ ប្រកបដោយស្មារតីទទួលខុសត្រូវរបស់ឧត្តមសសេនីយ៍ឯក ស ថេត និងមន្ដ្រីនគរបាល នៃស្នងការដា្ឋននគរបាលរាជធានីភ្នំពេញ គឺជាសក្ខីកម្មឆ្លុះបញ្ចាំងឲ្យឃើញអំពីសុឆន្ទៈ និងមនសិការ ចូលរួមចំណែកជាមួយរាជរដ្ឋាភិបាល ធ្វើឲ្យបេសកកម្ម ជាប្រវត្តិសាស្ត្រ ប្រកបដោយមោទនភាពជាតិនេះ សម្រេចបាន ជោគជ័យយ៉ាងត្រចះត្រចង់ ដែលសកម្មភាពដ៏ឧត្តុង្គឧត្តមនេះ បានចូលរួមលើកស្ទួយកិត្តិយស និងកិត្យានុភាពជាតិ នៅលើឆាកអន្តរជាតិ។
ក្នុងនាមអនុគណៈកម្មការសន្តិសុខ សណ្តាប់ធ្នាប់ និងសង្គ្រោះបឋម និងក្នុងនាមអគ្គស្នងការ នៃអគ្គស្នងការដ្ឋាននគរបាលជាតិ សូមថ្លែងនូវការកោតសរសើរដោយស្មោះ និងសូមជូនពរ ឧត្តមសសេនីយ៍ឯក ស ថេត និងមន្តីនគរបាល នៃស្នងការដា្ឋននគរបាល រាជធានីភ្នំពេញ សូមមានសុខភាពល្អបរិបូរណ៍ កម្លាំងពលំមាំមួន សម្រេចបានជោគជ័យគ្រប់បេសកកម្ម ដែលរាជរដ្ឋាភិបាល និងក្រសួងមហាផ្ទៃ ប្រគល់ជូន ព្រមទាំងទទួលបាននូវពុទ្ធពរ ដ៏ប្រពៃថ្លៃថ្លា ៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕/V
