Views: 2
ប្រែសម្រួល : កញ្ញាដាលីស,បំណង (ដេល្លីម៉េល) ៖ នាយក CIA លោក វីលលៀម បឺន (William Burns) បាននិយាយកាលពីថ្ងៃព្រហស្បតិ៍ទី២កុម្ភៈថា ទីភ្នាក់ងារស៊ើបការណ៍សម្ងាត់នេះវាយតម្លៃថា ប្រាំមួយខែទៀតនឹងក្លាយជារយៈពេល “សំខាន់ស្លាប់រស់” សម្រាប់អ៊ុយក្រែនក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី។
ថ្លែងនៅក្នុងព្រឹត្តិការណ៍គោលនយោបាយការបរទេសនៅសាកលវិទ្យាល័យចចថោន (Georgetown)ក្នុងទីក្រុងវ៉ាស៊ីនតោន លោកបឺនក៏បាននិយាយដែរថារដ្ឋាភិបាលអ៊ីរ៉ង់កំពុងមានការមិនស្ងប់ចិត្តខ្លាំងឡើងចំពោះកិច្ចការនៅក្នុងប្រទេស ដោយលើកឡើងពីភាពក្លាហានរបស់ស្ត្រីអ៊ីរ៉ង់ “ដែលអាក់អន់ចិត្ត”។
លោកបឺនក៏បាននិយាយដែរថា លោកមានការព្រួយបារម្ភអំពីការរំពឹងទុកនៃអំពើហិង្សាកាន់តែខ្លាំងរវាងអ៊ីស្រាអែលនិងប៉ាឡេស្ទីន។
នាយក CIA លោក វីលលៀម បឺន
នាយកទីភ្នាក់ងារស៊ើបការណ៍កណ្តាលអាម៉េរិករូបនេះក៏បាននិយាយថា មហិច្ឆតារបស់ប្រធានាធិបតីចិន ស៊ី ជីនភីងចំពោះកោះតៃវ៉ាន់មិនគួរត្រូវបានគេមើលរំលងទេ ។លោកបឺនបាននិយាយថា អាម៉េរិកបានដឹងថាលោកស៊ីបានបញ្ជាអោយយោធារបស់លោកត្រៀមខ្លួនជាស្រេចដើម្បីធ្វើការវាយចូលតៃវ៉ាន់នៅយ៉ាងយូរត្រឹមឆ្នាំ២០២៧។«ឥឡូវ មិនថាគាត់សំរេចចិត្តធ្វើការឈ្លានពានណាមួយនៅឆ្នាំ២០២៧ឬក៏ឆ្នាំណាផ្សេងឬអត់ទេ តែចាំថាវាជាការផ្តោតអារម្មណ៍និងជាមហិច្ឆតារបស់លោក។ការវាយតំលៃរបស់យើងនៅCIAគឺថា ខ្ញុំមិនមើលស្រាលមហិច្ឆតារបស់ប្រធានាធិបតីស៊ីចំពោះតៃវ៉ាន់ទេ»។
លោកបឺនក៏បាននិយាយថាមេដឹកនាំចិនទំនងជា«មានការភ្ញាក់ផ្អើលនិងមិនស្រួលអារម្មណ៍»ចំពោះអ្វីកើតឡើងនៅអ៊ុយក្រែនហើយព្យាយាមទាញមេរៀនពី«ប្រតិបត្តិការសឹកដ៏អន់ណាស់»របស់យោធារុស្ស៊ីនិងប្រព័ន្ធសព្វាវុធប្រើនៅអ៊ុយក្រែន»។
សូមបញ្ជាក់ថា ចិននិងរុស្ស៊ីបានចុះកិច្ចព្រមព្រៀងបង្កើតភាពជាដៃគូ«គ្មានព្រំដែន»មួយកាលពីខែកុម្ភៈឆ្នាំមុននៅមុនរុស្ស៊ីបញ្ជូនទាហានចូលអ៊ុយក្រែនតែបន្តិច ហើយទំនាក់ទំនងសេដ្ឋកិច្ចរបស់ប្រទេសទាំងពីរបានរីកចំរើននៅពេលទំនាក់ទំនងរបស់រុស្ស៊ីជាមួយលោកខាងលិចដាំក្បាលចុះ។
ការឈ្លានពានរបស់រុស្ស៊ីនៅអ៊ុយក្រែនក៏បង្កអោយមានការព្រួយបារម្ភខ្លាចក្រែនចិនធ្វើដូចគ្នាលើតៃវ៉ាន់ ជាកោះដែលចិនចាត់ទុកជាខេត្តបំបែកខ្លួនមួយរបស់ខ្លួន ដែលត្រូវតែធ្វើការបង្រួមបង្រួមជាមួយចិនដីគោកវិញនៅថ្ងៃណាមួយ និងអាចប្រើកម្លាំងយោធាក្នុងករណីចាំបាច់៕