Views: 6
ប្រែសម្រួល : កញ្ញាដាលីស (ដេល្លីម៉េល) ៖ នាយករដ្ឋមន្ត្រីអ៊ីស្រាអែល លោក យែរ ឡាភីដ (Yair Lapid) បានប្រាប់អង្គការសហប្រជាជាតិកាលពីថ្ងៃព្រហស្បតិ៍ទី២២កញ្ញាថាសហគមន៍អន្តរជាតិគួរតែប្រើប្រាស់កម្លាំងយោធា ប្រសិនបើអ៊ីរ៉ង់បង្កើតអាវុធនុយក្លេអ៊ែរ ខណៈលោកបានរំលឹកឡើងវិញនូវការគាំទ្រសម្រាប់ការបង្កើតរដ្ឋប៉ាឡេស្ទីន “សន្តិភាព”។
អ៊ីស្រាអែលបាននិងកំពុងធ្វើការវាយលុកផ្នែកការទូតយ៉ាងខ្លាំងក្លាក្នុងរយៈពេលប៉ុន្មានខែថ្មីៗនេះ ដើម្បីព្យាយាមបញ្ចុះបញ្ចូលសហរដ្ឋអាម៉េរិក និងមហាអំណាចអឺរ៉ុបដូចជា អង់គ្លេស បារាំង និងអាល្លឺម៉ង់ កុំឱ្យបន្តកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។
ក្នុងរយៈពេល ១០ ថ្ងៃកន្លងមកនេះ មន្ត្រីជាច្រើនបានលើកឡើងថា កិច្ចព្រមព្រៀង ដែលប្រធានាធិបតីអាម៉េរិកលោក ដូណាល់ ត្រាំ លុបចោលក្នុងឆ្នាំ ២០១៨ប្រហែលជាមិនត្រូវបន្តបានទេរហូតដល់ពាក់កណ្តាលខែវិច្ឆិកា ជាថ្ងៃផុតកំណត់ដែលលោកឡាភីដព្យាយាមប្រើដើម្បីរុញឱ្យលោកខាងលិចដាក់ចេញវិធីសាស្ត្រតឹងរ៉ឹងក្នុងការចរចារបស់ពួកគេ។
លោកឡាភីដបាននិយាយនៅក្នុងសុន្ទរកថានៅឯមហាសន្និបាតអ.ស.បថា”មធ្យោបាយតែមួយគត់ក្នុងការរារាំងអ៊ីរ៉ង់ពីការទទួលបានអាវុធនុយក្លេអ៊ែរគឺត្រូវដាក់ការគំរាមកំហែងផ្នែកយោធាដែលអាចជឿទុកចិត្តបាននៅលើតុ”។មានតែអ៊ីចឹងទេទើបអាចចរចា “កិច្ចព្រមព្រៀងដែលមានរយៈពេលវែងនិងរឹងមាំជាងនេះ”។
លោកបាននិយាយថា “គេត្រូវតែបញ្ជាក់ឱ្យច្បាស់លាស់ចំពោះអ៊ីរ៉ង់ថា ប្រសិនបើអ្នកឯងជំរុញកម្មវិធីនុយក្លេអ៊ែររបស់ខ្លួន ពិភពលោកនឹងមិនឆ្លើយតបដោយពាក្យសម្តីទេ ប៉ុន្តែជាមួយនឹងកម្លាំងយោធា”។
ហើយគាត់មិនបានលាក់បាំងទេដោយនិយាយថា អ៊ីស្រាអែលខ្លួនឯងនឹងមានឆន្ទៈក្នុងការចូលរួមវាយដែរ ប្រសិនបើខ្លួនមានអារម្មណ៍ថាត្រូវបានគំរាមកំហែង។
លោកបាននិយាយថា “យើងនឹងធ្វើអ្វីគ្រប់យ៉ាង។ អ៊ីរ៉ង់នឹងមិនទទួលបានអាវុធនុយក្លេអ៊ែរទេ”។
មន្ត្រីជាន់ខ្ពស់អាម៉េរិកម្នាក់បាននិយាយសម្រាលការខ្វែងគំនិតគ្នាណាមួយរវាងលោកឡាភីដនិងប្រធានាធិបតីចូ បៃដិន ដែលបានប្តេជ្ញាថានឹងមិនអនុញ្ញាតឱ្យអ៊ីរ៉ង់បង្កើតគ្រាប់បែកបរមាណូ។
មន្ត្រីរូបនេះបាននិយាយក្នុងលក្ខខណ្ឌមិនបញ្ចេញឈ្មោះថា ការទូតគឺជា “វិធីល្អបំផុត” ដើម្បីសម្រេចបាននូវគោលដៅនោះ ប៉ុន្តែ “ជាមធ្យោបាយចុងក្រោយ គាត់នឹងងាកទៅរកកម្លាំងយោធាប្រសិនបើនោះជាអ្វីដែលចាំបាច់ត្រូវតែធ្វើ”។
អ៊ីស្រាអែល ដែលចាត់ទុកអ៊ីរ៉ង់ជាសត្រូវរបស់ខ្លួន ក៏ស្តីបន្ទោសរដ្ឋាភិបាលក្រុងតេអេរ៉ង់សម្រាប់ការផ្តល់ហិរញ្ញប្បទានដល់ចលនាប្រដាប់អាវុធ រួមទាំងក្រុមហេសប៊ូឡាលីបង់និងក្រុមហាម៉ាសប៉ាឡេស្ទីនផងដែរ៕
នាយករដ្ឋមន្ត្រីអ៊ីស្រាអែល លោក យែរ ឡាភីដ