Views: 5
ប្រែសម្រួល : កញ្ញាដាលីស (ដេល្លីម៉េល) ៖ នាយករដ្ឋមន្ត្រីហ្វាំងឡង់ លោកស្រី សានណា ម៉ារីន (Sanna Marin)កាលពីថ្ងៃសុក្រទី២ធ្នូ បានផ្តល់ការវាយតម្លៃ “ដោយស្មោះត្រង់យ៉ាងព្រៃផ្សៃ”អំពីសមត្ថភាពរបស់អឺរ៉ុប បន្ទាប់ពីសង្គ្រាមរបស់រុស្ស៊ីលើអ៊ុយក្រែន ដោយបញ្ជាក់ដោយត្រង់ៗថា “យើងមិនខ្លាំងគ្រប់គ្រាន់” ដើម្បីតតាំងនឹងរដ្ឋាភិបាលក្រុងមូស្គូតែឯងនោះទេ។
ក្នុងពេលកំពុងបំពេញទស្សនកិច្ចនៅប្រទេសអូស្ត្រាលី មេដឹកនាំនៃប្រទេសត្រៀមចូលជាសមាជិកណាតូមួយនេះ បាននិយាយថាការលុកលុយនិងការកាន់កាប់អ៊ុយក្រែនពីសំណាក់លោក វ្ល៉ាឌីមៀ ពូទីន បានលាតត្រដាងឱ្យឃើញទាំងភាពទន់ខ្សោយនិងកំហុសយុទ្ធសាស្ត្ររបស់អឺរ៉ុបក្នុងការដោះស្រាយជាមួយរុស្ស៊ី។
លោកស្រីបានប្រាប់នៅវិទ្យាស្ថានឡូវី (Lowy) ក្នុងទីក្រុងស៊ីតនីថា “ខ្ញុំត្រូវតែស្មោះត្រង់ ស្មោះត្រង់យ៉ាងព្រៃផ្សៃជាមួយអ្នក។ អឺរ៉ុបមិនខ្លាំងគ្រប់គ្រាន់ទេនៅពេលនេះ។យើងនឹងមានបញ្ហាបើគ្មានសហរដ្ឋអាម៉េរិក”។
លោកស្រីម៉ារីនបានទទូចថា អ៊ុយក្រែនត្រូវតែទទួលបាន “នូវអ្វីដែលពួកគេត្រូវការ” ដើម្បីឈ្នះសង្គ្រាម ដោយបន្ថែមថាសហរដ្ឋអាម៉េរិកបានដើរតួយ៉ាងសំខាន់ក្នុងការផ្គត់ផ្គង់ដល់រដ្ឋាភិបាលក្រុងគៀវជាមួយនឹងអាវុធ ហិរញ្ញវត្ថុ និងជំនួយមនុស្សធម៌ដែលចាំបាច់ ដើម្បីរារាំងការរុលទៅមុខរបស់រុស្ស៊ី។
លោកស្រីបាននិយាយទៀតថា “យើងត្រូវតែធ្វើឱ្យប្រាកដថាយើងក៏កំពុងកសាងសមត្ថភាពទាំងនោះផងដែរ នៅពេលនិយាយអំពីការការពារអឺរ៉ុប ឧស្សាហកម្មការពារអឺរ៉ុប និងធ្វើឱ្យប្រាកដថា យើងអាចទប់ទល់គ្រប់ស្ថានភាពផ្សេងៗ”។
ហ្វាំងឡង់បានទទួលឯករាជ្យពីរុស្ស៊ីកាលពីជិត ១០៥ ឆ្នាំមុន ហើយមិនយូរប៉ុន្មានបានបង្កការស្លាប់និងរបួសយ៉ាងធ្ងន់ធ្ងរលើកងទ័ពឈ្លានពានសូវៀតត្បិតហ្វាំងឡង់បានចាញ់ប្រៀបខាងសព្វាវុធយ៉ាងសម្បើមក៏ដោយ។
មេដឹកនាំហ្វាំងឡង់អាយុ ៣៧ ឆ្នាំបានរិះគន់គោលនយោបាយសហភាពអឺរ៉ុប ដែលបានសង្កត់ធ្ងន់លើសារៈសំខាន់នៃការភ្ជាប់ទំនាក់ទំនងជាមួយលោកពូទីន ហើយបាននិយាយថាប្លុកអឺរ៉ុបគួរតែស្តាប់រដ្ឋសមាជិក ដែលជាផ្នែកមួយនៃសហភាពសូវៀតរហូតដល់វាដួលរលំ។
ចាប់តាំងពីបានចូលជាសមាជិកសហភាពអឺរ៉ុបក្នុងឆ្នាំ ២០០៤ មក បណ្តាប្រទេសដូចជាអេស្តូនីនិងប៉ូឡូញបានជំរុញឱ្យសមាជិកសហភាពអឺរ៉ុបដទៃទៀតប្រកាន់ជំហរតឹងរ៉ឹងលើលោកពូទីនដែលជំហរនេះត្រូវបានបន្ទន់ដោយបារាំង អាល្លឺម៉ង់ អ៊ីតាលី និងក្រិក ដែលគាំទ្រឱ្យមានទំនាក់ទំនងសេដ្ឋកិច្ចកាន់តែជិតស្និទ្ធជាមួយរដ្ឋាភិបាលក្រុងមូស្គូ។
លោកស្រីម៉ារីនបាននិយាយថា “យើងគួរតែស្តាប់មិត្តភក្តិនៅតំបន់បាល់ទិកនិងប៉ូឡូញរបស់យើងឱ្យបានឆាប់។អស់រយៈពេលជាយូរមកហើយ អឺរ៉ុបកំពុងបង្កើតយុទ្ធសាស្ត្រឆ្ពោះទៅរករុស្ស៊ីដើម្បីធ្វើឱ្យទំនាក់ទំនងសេដ្ឋកិច្ចរបស់យើងកាន់តែជិតស្និទ្ធ និងដើម្បីទិញថាមពលពីរុស្ស៊ី…យើងបានគិតថា នេះនឹងទប់ស្កាត់សង្គ្រាមបាន”។
លោកស្រីបានបន្ថែមថា វិធីសាស្ត្រនេះត្រូវបាន “សបញ្ជាក់ឱ្យឃើញថាខុសទាំងស្រុង។ពួកគេមិនខ្វល់ពីទំនាក់ទំនងសេដ្ឋកិច្ចទេ ពួកគេមិនខ្វល់ពីការដាក់ទណ្ឌកម្មទេ។ពួកគេមិនខ្វល់ពីបញ្ហានេះនោះឡើយ”៕
លោកស្រីម៉ារីនបានប្រាប់នៅវិទ្យាស្ថានឡូវីថា ការឈ្លានពានអ៊ុយក្រែនពីសំណាក់រុស្ស៊ីបានលាតត្រដាងចំណុចខ្សោយរបស់អឺរ៉ុប
