Views: 4
ដោយៈ ប.ជ័យ / បន្ទាយមានជ័យ: នៅរសៀលថ្ងៃទី១ ខែធ្នូ ឆ្នាំ២០២២ លោកវរសេនីយ៍ឯក ឡុង សំណាង មេបញ្ជាការវរៈសេនាតូចនគរបាលការពារព្រំដែន លេខ៨០៧ បានចាត់តាំងលោកអនុសេនីយ៍ទោ ប៊ុន គឹមហេង នាយរងប៉ុស្តិ៍បឹងត្រកួន សហការជាមួយកម្លាំងយោធា (វរៈ១) គឺលោកអនុសេនីយ៍ឯក ហេង វ៉ា មេបញ្ជាការ (គ២) បានដឹកនាំកម្លាំង ជួបពិភាក្សាការងារជាមួយ ទាហានឈុតខ្មៅថៃ ដឹកនាំដោយ លោក អនុសេនីយ៍ឯក ប្រាក់យ៉ុង ប៊ុងសាក់គុណ មេបញ្ជាការកងរយ ១២០១ នៅចំណុច ប៉ុស្តិ៍លេខ០៣ នៅព្រំដែនខាងថៃ ឈមគ្នានឹងទឹកដីកម្ពុជា ឃុំគោករមៀត ស្រុកថ្មពួក ខេត្តបន្ទាយមានជ័យ។
ជំនួបពិភាក្សានេះ ភាគីកម្ពុជា-ថៃ បានផ្តោតសំខាន់លើ ៣ ចំណុចគឺៈ ១-ប្តេជ្ញារួមគ្នា ទប់ស្កាត់ការជួញដូរគ្រឿងញៀនតាមព្រំដែន ២-ទប់ស្កាត់ ពលរដ្ឋលួចឆ្លងដែនខុសច្បាប់ និងបទល្មើសឆ្លងដែនគ្រប់ប្រភេទ ៣-ទប់ស្កាត់បទល្មើសសេដ្ឋកិច្ច និងទំនិញគេចពន្ធ៕/V