Views: 9
ដោយៈ ភ្នំស្វាយ / បន្ទាយមានជ័យៈ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំកិច្ចប្រជុំ កាលពីថ្ងៃទី៣០ ខែកញ្ញា ឆ្នាំ២០២២ ស្តីពីការធ្វើបច្ចុប្បន្នភាព លើបញ្ជីឈ្មោះកម្លាំងការពារការិយាល័យបោះឆ្នោត នៅតាមក្រុង-ស្រុកទាំង៩ និងបូកសរុបលទ្ធផលការងារ ខែកញ្ញា ដើម្បីលើកទិសដៅ អនុវត្តន៍បន្ត សម្រាប់ខែតុលា ដល់កម្លាំងនគរបាលទូទាំងខេត្ត។
លោកឧត្តមសេនីយ៍ត្រី រ៉ែម វីរ: ស្នងការរងផែនការងារសេនាធិការ ស្នងការដ្ឋាន នគរបាលខេត្តបន្ទាយមានជ័យ បានរាយការណ៍ពីលទ្ធផលការងារ ដែលសម្រេចបាន កាលខែកន្លងមក និងផ្សព្វផ្សាយ អំពីផែនការធ្វើបច្ចុប្បន្នភាព កែសម្រួលសមាសភាព កម្លាំង ចូលនិវត្តន៍ មរណភាព កម្លាំងផ្លាស់ចេញ និង ការប្រែប្រួលចំនួនការិយាល័យ បោះឆ្នោត។
ក្នុងឱកាសនោះ លោកឧត្តមសេនីយ៍ទោ សិទ្ធិ ឡោះ ក៏បានដាក់ចេញនូវផែនការដល់ ថ្នាក់ដឹកនាំគ្រប់កងឯកភាព ត្រូវពង្រឹងការគ្រប់គ្រងកម្លាំងក្រោមឱវាទ បញ្ជីវត្តមាន វិន័យ។ ជំរុញដល់មន្ត្រីក្រោមឱវាទ បន្តអភិវឌ្ឍន៍សមត្ថភាព ចំណេះ ជំនាញ វិជ្ជាជីវៈ និងបច្ចេកវិទ្យា ដើម្បីបំពេញការងារ ភារកិច្ច ប្រដោយគុណភាព និង ឆាប់រហ័ស។
លោកក៏បានដាក់ចេញនូវបទបញ្ជា ដល់កម្លាំងនគរបាលទាំងអស់ ត្រូវត្រៀមកម្លាំង សម្ភារៈមធ្យោបាយ ២៤ម៉ោងលើ២៤ម៉ោង ពង្រឹងការយាមល្បាត និងត្រូតសភាព ការណ៍ បង្ការ ទប់ស្កាត់ រាល់បទល្មើសទាំងឡាយ ដែលអាចកើតមានជាយថាហេតុ និងត្រៀមអន្តរាគមន៍ សង្គ្រោះពលរដ្ឋ ពីគ្រោះធម្មជាតិ និងគ្រោះអគ្គិភ័យជាដើម។ កម្លាំងនគរបាលប៉ុស្តិ៍ ត្រូវជំរុញឲ្យពលរដ្ឋគ្រប់អាយុ និងពលរដ្ឋផុតសុពលភាព អត្តសញ្ញាណប័ណ្ណ ត្រូវទៅធ្វើអត្តសញ្ញាណប័ណ្ណសញ្ជាតិខ្មែរថ្មី ឲ្យបានគ្រប់គ្នា។ ក្រៅពីនេះ ត្រូវគ្រប់គ្រងឲ្យបានរាល់ការស្នាក់នៅ ខុសច្បាប់របស់ជនបរទេស ត្រូវបន្តបង្ក្រាបរាល់បនល្បែងស៊ីសងខុសច្បាប់ បទល្មើសជួញដូរមនុស្ស និងបទល្មើស ជួញដូរគ្រឿងញៀន៕ V / N