Views: 1
ដោយ: សរិទ្ធ/ភ្នំពេញ: នៅថ្ងៃទី៥ ខែធ្នូ ឆ្នាំ២០២២ នេះ កម្លាំងនាយកដ្ឋាននគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ ចុះស្រាវជ្រាវ និងឈានដល់ការបង្ក្រាបទីតាំងដេប៉ូចែកចាយប្រេង យីហោ សេង លីមជី ស្ថិតនៅផ្ទះលេខ៥៧២ ផ្លូវ៣៧១ សង្កាត់ស្ទឹងមានជ័យ ខណ្ឌមានជ័យ ដែលលក់ប្រេងរំអិលម៉ាក TOTAL ក្លែងក្លាយ ។
ការចុះបង្ក្រាបនេះ អនុវត្តតាមបទបញ្ជារបស់លោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាន និងធ្វើឡើងតាមពាក្យបណ្ដឹងរបស់ ក្រុមហ៊ុន Tilleke & Gibbins ក្រោមការដឹកនាំសម្របសម្រួលនីតិវិធីផ្ទាល់ពីលោក សាយ ណូរ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
គួរម្លឹកថា ប្រតិបត្តិការនេះ សមត្ថកិច្ចដកហូតបានប្រេងរំអិលម៉ាក TOTAL ក្លែងក្លាយ ៤ប្រភេទ ចំនួន ៦ធុង ស្មើនឹង៦០០លីត្រ ។ ក្រោយពីធ្វើការឆែកឆេរ តំណាងអយ្យការ សម្រេចឲ្យសមត្ថកិច្ចធ្វើការដកហូតវត្ថុតាងទាំងអស់ យកមករក្សាទុកជាបណ្តោះអាសន្ន នៅនាយកដ្ឌាន និងតម្រូវឲ្យម្ចាស់ទីតាំងមកសាកសួរបំភ្លឺនៅនាយកដ្ឋាន ដើម្បីបន្តនីតិវិធី ៕/R