Views: 8
ដោយៈភ្នំស្វាយ / បន្ទាយមានជ័យ៖នៅថ្ងៃទី២៧ ខែកញ្ញា ឆ្នាំ២០២២នេះ លោកឧត្តមសេនីយ៍ សិទ្ធិ ឡោះស្នងការនគរបាលខេត្តបន្ទាយមានជ័យបានបន្តបញ្ជូនកម្លាំងនគរបាលទៅចុះជួយសម្រួលចរាចរណ៍ជូនប្រជាពលរដ្ឋ នៅតាមកំណាត់ផ្លូវឆ្លងកាត់ផ្លូវខេត្តលេខ២៦៨A ព្រៃមាន់-ភ្នំស្រុក-អាងត្រពាំងថ្មដោយសារជំនន់ទឹកភ្លៀងលិច និងហូរកាត់ចំណុចនៃកំណាត់ផ្លូវនេះ ។
កំណាត់ផ្លូវមួយខ្សែនេះចេញពីផ្លូវជាតិលេខ៥ត្រង់ព្រៃមាន់ឃុំរហាល ឆ្ពោះទៅឃុំស្រះជីក(ទីរួមស្រុកភ្នំស្រុក) និងតទៅតំបន់រមណីយដ្ឋានទេសចរណ៍អាងត្រពាំងថ្ម។សមត្ថកិច្ចបានដាក់ពង្រាយកម្លាំងនគរបាលនិងកម្លាំងប្រជាការពារដើម្បីចុះជួយសម្រួលចរាចរណ៍ជូនប្រជាពលរដ្ឋដែលធ្វើដំណើរឆ្លងកាត់ ទាំងថ្មើរជើង ម៉ូតូ និងរថយន្តធុនមធ្យម តូចខណៈកំណាត់ផ្លូវមួយនេះត្រូវបានទឹកលិចហូរ កាត់ផ្លូវខ្លាំង។ពោលគឺ ដើម្បីបញ្ចៀសគ្រោះថ្នាក់ផ្សេងៗ។
ទន្ទឹមគ្នានោះ គ្រប់បណ្តាអធិការដ្ឋាននគរបាលស្រុក-ក្រុង ឯទៀតក៏ត្រូវបានត្រៀមកម្លាំងយាម ល្បាតសម្ភារ មធ្យោបាយ ២៤ម៉ោងលើ២៤ម៉ោង ដើម្បីត្រៀមអន្តរាគមន៍ ឆ្លើយតបសភាពការណ៍បទល្មើសផ្សេងៗដែលអាច កើតឡើងជាយថាហេតុ ឬ គ្រោះធម្មជាតិ និងអគ្គិភ័យជាដើម៕សរន / N